1 Co 4 - Chuj San Sebastian Bible

A smunljel eb' schecb' Jesucristo

¹ Yuj cha, yel xo wach' man̈oc 'ayn̈ tzeya'ch e nab'en on̈. Yujto ton̈j ya'mal servil Cristo caj on̈. A copiso on̈, to tzcac' cuyxoc jun tzo'n̈ cuynb'il yic Dios on̈, atn jun tzo'n̈ ch'oxb'il yuj 'ayn̈ec.

² A mach tz'ajx yopiso, yowlal caw tzyiclj wal smunlj 'a jun tz'a'n yopiso cha.

³ Palta an tic, matz in 'och 'il, toto ax tzin e b'eyc'ojlej yuj jun wopiso tic. Wach' cab' chuc jun tzo'n̈ocx eb' tzin b'eyc'ojlani, palta matz in na xon jab'oc. An̈jtona 'in, matz tac' in b'eyc'ojlan in b'a yuj jun wopiso tic.

⁴ Toto 'ay junc in paltail man̈ wojcoc, palta an̈ja matz tac' walni, to may jac in paltail, yujto cojn Cajlilec tztac' in sb'eyc'ojlani.

⁵ Yuj cha, man̈x e b'eyc'ojloc junc xo mach ticnec. To tze tan̈wj sjaw Cajlilec, yujto a 'oj ch'oxnc 'el smasnil tas. 'Icha junc tas c'ub'b'il 'el 'a q'uic'q'uinal, ax tzc'och sacq'uinl 'a 'a, c'uxn tzcheclj 'eli, 'ixta 'oj 'aj scheclj smasnil tas ta'. A Cajlilec chi 'oj 'a'nc checljoc 'el tas 'ay 'a qui nab'enec qui masnil. At wal ta 'oj yal Dios qui wach'lec, a tzyala tas qui munljel junjn on̈ec.

⁶ Ex wu'tac, ex wanab', 'ix wal't 'ayex, tas waji, tas yaj pax Apolos, sec tznachj 'el jun tzo'n̈ cuynb'il tic eyu'uj. Yujto an yet' Apolos cha, ch'oxnb'il caj 'ayx on̈, sec wach' eyojtac, to matz tac' tzex 'ec' 'a yib'n̈ tas tzyal Ch'an̈ U'un̈. Yujto may junc mach tztac' e b'an̈ni, may pax junc mach tztac' e patquiln can 'eli.

⁷ May junc on̈ tztac' qui b'an̈n qui b'a, yujto lajnn̈ej quel'chec qui masnil. Tzann̈j tas tztac' cujec, yujto a Dios tz'a'n 'ayn̈ec. Yuj cha, matz tac' qui b'an̈nec qui b'a yu'uj. Matz tac' calnec, to mun quiquec, yujto a Dios tz'a'n 'ayn̈ec.

⁸ Ax xo, ¿tom tz'acn exx tze na'a? ¿Tom e chajnacx smasnil yic Dios e nan ticnec? Tecn wan e nani, to yajl ex xo ticnec. Palta an̈ xo tic on̈, ma'on̈ 'och yajlil eyet' on̈. Tocwal ex 'och yajlil 'a caw yel, to 'ixta', on̈ 'och pax yajlil eyet' on̈.

⁹ A tzin na'a, 'ix sch'ox Dios, to an̈ schecb' on̈ Cristo on̈, slajb' xoj caj on̈. 'Icha junc mach 'ayx 'och 'a yol sc'ab' chamel, tzmilx chamoc, 'ixta 'on̈ on̈. Ax eb' 'anma 'a yolyib'n̈q'uinl tic, yet' pax eb' ángel, ton̈j tz'och q'ueln eb', tzsat sc'ojl eb' yuj chajtl quilx on̈.

¹⁰ 'Icha to may jac qui nab'en 'a sat eb' 'anma 'on̈, yujto 'aych qui nab'en 'a Cristo on̈. Palta ax xo, caw jeln ex xo 'a yic Cristo chi e nani. Cojc on̈, man̈toc te'n on̈ on̈. Ax xo, 'icha to caw te'n ex xo. An̈ tic on̈, tzon̈ spatquilj can 'el eb' 'anma 'on̈. Palta ax xo, caw 'ay eyel'ch 'a sat eb'.

¹¹ A ticnec, 'ay 'aj caw tzcab' syal yuj wejl on̈, yet' tacn̈ti'al. Caw may pax qui pichl on̈. 'Ay 'aj tzon̈ smac' eb' 'anma on̈. May pax catut on̈.

¹² Caw wal tz'el quip qui munlj yet' qui c'ab' tic on̈. Ax eb' 'anma', tzb'uchwj eb' 'ayn̈ on̈, palta tzqui c'an cot swach'c'ojlal Dios 'a yib'n̈ eb' on̈. 'Ay 'aj tzya'ch eb' yailal 'a quib'n̈ on̈, palta tzcac' techjoc on̈.

¹³ 'Ay 'aj tzyal eb' qui peclal on̈, caw tu tzyal eb' 'ayn̈ on̈. Palta an̈ja 'emmquilal tzcutj caln yab'x eb' on̈. A 'a yolyib'n̈q'uinl tic, 'icha wal c'alem, 'ixta 'on̈ 'a sat eb' 'anma 'on̈. 'Ixta pax ticnec, scanmal xoj 'anma cajcn 'a sat eb' on̈.

¹⁴ Man̈ yujoc ex wa'n q'uixwc 'eli, tzin tz'ib'n 'at jun tzo'n̈ tic 'ayex. Palta tzin nib'j tzwac' e nab'enoc. Q'uinloc 'ay junc wunnal caw xajn wu'uj, 'ixta eyaj wuj ticnec.

¹⁵ Toxn̈ej 'ay lajn̈e'oc mil e cuymal tzex cuyn 'a yic Cristo, palta junn̈j caw 'icha e mam yaji. An ton tic mamb'il waj 'ayex, yujto an in b'ab'l aljnac wach' 'ab'x 'ayx ta'.

¹⁶ Yuj cha, tzin tew 'ayex, caw tze b'eylb'ej in b'eyb'al tic.

¹⁷ Yuj wal jun tic, tzin checn 'at Timoteo tic 'ayex. A Timoteo tic, 'icha to wunnal yaj 'a sat Cajlilec. Caw chamc'ojlb'il wu'uj, caw yiclum pax tzyutj sb'a. A 'oj 'at alnoc 'ayex, ax e nan coti, tas xwutj in b'eyb'al 'a yic wa'n 'och in nab'en 'a Cristo. 'Icha tzwutj in cuyn eb' creyente 'a junjn iglesia, 'ixta 'oj yutc ex scuyn jun xo.

¹⁸ 'Ay ab' jaywn̈ eb' tzyij chan̈ sb'a 'a e cal, yujto tzna eb', man̈x 'oj 'at ex wila'.

¹⁹ Palta tzin na'a, jab'xoj 'oj in 'at ex wila', toto 'ixta tznib'j Cajlilec. Atta 'oj wila', toto yel 'ay tas tztac' yuj eb' cha, mto ton̈j tzyal eb'.

²⁰ Yujto man̈ yujocn̈ej junc tas tzcala, tzcheclj 'eli, to 'ayn̈ec xo 'och 'a yol sc'ab' Dios. Palta toto 'aych spoder Dios quet'ec, to 'ixta', yel 'ayn̈ec xo 'och 'a yol sc'ab'.

²¹ Palta a ticnec, ¿'aja junc tas tze nib'j tz'at in b'o 'ayex? ¿Tom tze nib'j tz'at ex wac' cuenta yuj e mul? ¿Mto tze nib'ej, to tz'at in ch'ox in chamc'ojlal 'ayex, 'emmquilal tz'at wutc in b'a 'ayex?