1 Co 3 - Chuj San Sebastian Bible

Quit munljumalec qui b'a*r* ca'n servil Dios

¹ Ex wu'tac, ex wanab', yic wec' 'a e cal, ma'ix stac' waln 'ayx 'icha tzwutj waln 'a eb' yiclum 'a Yespíritu Dios. Yujto mun a e nab'en tzex 'a'n mandar, 'unn ext 'a sat Cristo.

² 'Icha junc tz'ulc 'unin, mantzac stac' xon swan jac wa'il, 'ixta 'ex ta'. Yuj cha, 'icha tz'aj yajx chuw junc tz'ulc 'unn cha, 'ixta 'ec' wutjnac waln jun tzo'n̈ cuynb'il 'ayex. An̈j jun tzo'n̈ cuynb'il man̈ 'ajltacc 'ec' waljnac 'ayex, yujto a jun tzo'n̈ cuynb'il ya, mantzac techj eyuj ta'. Palta an̈jtona', 'ixta 'ex to pax ticnec,

³ yujto an̈ja a e nab'en tzex 'a'n mandar. 'In an̈ja 'ay e chichnc'ojlal, an̈ja tze nib'j tze pojl e b'a. Yuj cha, tzyal 'el'chi, an̈ja e nab'en tzex 'a'n mandar. Lajnn̈ej tzeyutj e b'a yet' eb' mant 'ojtnacoc Dios.

⁴ Yujto 'ayx tzeyala: Yic in Pablo, xe chi. 'Ayx pax tzeyala: An tic, yic in Apolos, xe chi. A yic tzeyaln 'ixta', caw lajnto e nab'en yet' eb' mant 'ojtnacoc Dios cha.

⁵ ¿Tom 'ay wel'ch an Pablo in tic? An̈jtona pax Apolos cha, ¿tom 'ay yel'ch paxi? Yujto an̈ tic on̈, ton̈j ya'mal on̈ servil Dios on̈. Cuj on̈, eya'n 'och e c'ojl 'a Cajlil. Ton̈j tzon̈ munlj junjn on̈ on̈, 'icha yaj ya'n Dios copiso tic on̈.

⁶ An tic, yic wec' 'a e cal, 'icha to 'ec' wawjnac can jun tzo'n̈ 'in̈t ta'. Ax Apolos, 'icha to a 'ec' 'a'jnac 'och yalil. Palta atn Dios ex q'uib'tzani.

⁷ Yuj cha, a junc 'awum, yet' junc tz'a'n 'och yalil, may jac yel'chi. Cojxn Dios 'ay yel'chi, yujto a tz'a'n q'uib'oc.

⁸ A eb' 'awum yet' eb' tz'a'n 'och yalil, lajnn̈ej yel'ch smunljel eb'. Palta 'oj scha eb' spac 'a Dios, a tzyala jantc smunljel junjn eb'.

⁹ Yuj cha, an̈ tic on̈, quit munljumal qui b'a ca'n servil Dios on̈. Ax xo tic, 'icha jun tzo'n̈ 'awb'ente', 'ixta 'ex 'a Dios. An̈jtona', 'icha junc n̈a wan sb'o yuj Dios, 'ixta 'ex.

¹⁰ An xo tic, 'icha junc b'om n̈a tznachj 'el sb'on junc n̈a cha, 'ixta 'in yuj swach'c'ojlal Dios. An tic, yic wec' 'a e cal ta', 'icha to 'ec' wa'jnac 'ejm yipnub'al yich junc n̈a. Ax ticnec, chucx mach wan smunlj 'a e cal. 'Icha to wan ya'n q'ue xamit 'a yib'n̈ jun yipnub'al yich cha. A junjn mach tzmunlj ta', yowlal caw tzyila, chajtl tzyutj ya'n q'ue jun tzo'n̈ xamit cha.

¹¹ May junc mach tztac' ya'n 'ejm junc xo yipnub'al yich cha. Yujto a jun yipnub'al yich 'emnc xo cha, atn Jesucristo.

¹² Ax eb' tzmunlj 'a jun munljel tic, 'ay eb' caw wach' smunljel. 'Icha to a q'uen oro, q'uen plata, yet' jun tzo'n̈ xo q'uen chan̈ stojol, a tzyac' q'ue eb' 'a yib'n̈ jun yipnub'al yich cha, yujto caw wach' smunljel eb'. 'Ay pax eb' man̈ wach'c smunljel. 'Icha to te tzc'an eb'. 'Icha 'ac, mto 'icha 'aj 'ixta jun tzo'n̈ chi tzyac' q'ue eb' 'a yib'an̈.

¹³ Palta a qui munljel junjn on̈ec, caw 'oj checljoc 'eli, a yic 'oj jawc jun c'u yic b'eyc'ojlal. 'Icha junc c'ac' tzjawi, 'ixta 'oj 'aj sjaw jun b'eyc'ojlal cha. Ax yajx prowal qui munljel junjn on̈ec, toto wach', mto ma'ay.

¹⁴ 'Ay eb' wach' smunljel. 'Icha junc n̈a matz tz'a yuj c'ac', 'ixta smunljel eb' cha, yujto 'oj techjoc jun b'eyc'ojlal chi yu'uj. Atn eb' chi 'oj chanc spac smunljel.

¹⁵ Palta 'ay pax eb' man̈ wach'c smunljel. 'Icha junc n̈a 'ac yich, c'un stz'a'i, 'ixta 'oj 'aj smunljel eb' chi yuj jun b'eyc'ojlal cha. Yuj cha, may xon jac spac 'oj scha eb'. 'Oj colchjoc ton eb', palta 'icha junc mach teb'il tzcolchj 'elt 'a scal c'ac', 'ixta 'oj 'aj eb' scolchj 'eli.

¹⁶ ¿Tom man̈ eyojcoc, to yatut Yespíritu Dios eyaji, a Yespíritu chi cajn 'ec' 'a e cal?

¹⁷ Toto 'ay mach tz'a'n juwc 'el yatut Dios cha, ax Dios 'oj satnc 'el jun cha. Yujto a yatut Dios, caw yicn̈ej yaji. A yatut tzwal tic, ax ton tic.

¹⁸ Caw man̈ e cha 'ixtxoc paxti e b'a. Toto 'ayx tze na'a, to jeln ex 'a yic yolyib'n̈q'uinl tic, yowlal tzeyij 'ejm e b'a 'a 'emmquilal, 'icha to may xon tas eyojtac, sec a Dios 'oj 'a'nc e jelnal cha.

¹⁹ Yujto a jun jelnal yic yolyib'n̈q'uinl tic, caw may jac yel'ch 'a sat Dios. Yujto 'ixta yaj stz'ib'x can 'a Ch'an̈ U'un̈, 'a 'aj tzyal 'ixtic: A tztenn 'och wan eb' maysch'olnil snab'en cha, sec matz 'el'ch tas tznib'j eb', xchi.

²⁰ Tzyaln pax junx tic: Yojc Cajlil si'mb'il, to a eb' jelan, cojn man̈ nab'enal tzna eb', xchi Ch'an̈.

²¹ Yuj cha, matz tac' eya'n 'och e nab'en 'a junc 'anma', tze b'an̈n e b'a yu'uj. Yujto xyac' Dios smasnil tas eyico'oc quet' on̈.

²² Yuj cha, an Pablo in tic, yet' Apolos, yet' pax Pedro, eya'mal servil caj on̈, 'icha to eyic caj on̈. An̈jtona pax yolyib'n̈q'uinl tic, yet' qui q'uinlec, chamel, jun tzo'n̈ tas 'ayc' ticnec, yet' jun tzo'n̈ xo tas tot 'oj jawoc, 'ix yac' Dios quico'oquec smasnil.

²³ Ax tic, yic ex xo Cristo quet' on̈. Ax Cristo, yic Dios yaji.