1 Co 16 - Chuj San Sebastian Bible

A jun ofrenda tzq'ue wa'an

¹ A ticnec 'oj wal't 'ayx yuj jun ofrenda 'oj q'ue wan 'a e cal, yic 'oj 'ajxc 'a eb' quit creyenteal 'ay 'a Jerusalén. A jun tzo'n̈ checnb'il tic 'oj wal't 'ayx tic, waljnacx 'a eb' creyente 'a yol yic Galacia. Yuj cha, 'ixta 'oj eyutc e b'a junx yet' eb'.

² A 'a junjn domingo tzeyila jantc tas tzeyac' ganar. Tzeyi'n can 'el eyofrenda junjn ex, tze molni. Toto 'ixta', man̈ yowlalc at tzin c'ochi, tzeya'n lista eyofrenda cha.

³ Tze sic' 'elt jaywn̈oc eb' 'oj in checb't 'a Jerusalén. At 'oj in c'ochi, ax in b'on scarta eb', sec chequel, to 'ay yopiso eb'. Atn eb' 'oj 'i'nc 'at eyofrenda 'a eb' creyente ta'.

⁴ A yic 'oj in c'och eyet' ta', 'oj wila', to ma'ay, tecn wach' an 'oj in 'at 'a Jerusalén cha. To 'ixta', a wet' 'oj 'at pax eb'.

Tzna Pablo yuj sviaje

⁵ A yic 'oj in 'at ex wila', yowlal 'oj wec' chab' 'oxe'oc c'u 'a yol yic Macedonia. 'Ixta to b'i'an, ax in c'och 'ayex.

⁶ Lemb'il 'oj woch wan junc tiempoal eyet' ta'. Toq'ue 'aynto 'ec' ta', ax ye'cn n̈ab'lq'uinal. Ax yic 'oj in 'atxi, 'oj e colwj 'ayn 'a yol b'e 'aj 'oj in 'atx cha.

⁷ Tzin nib'j man̈ ji'ltic tzin 'ec' 'ayx cha. Tzin nib'j tzin 'och wan junc tiempoal eyet'oc, toto tzyal sc'ojl Cajlilec.

⁸ Palta a 'a Efeso tic 'oj in cann̈j b'el, masnto 'oj 'e'cn jun q'uin̈ Pentecostés, ax in 'ati.

⁹ Yujto tzwila, caw wach' tzin munlj 'a yic Cajlilec 'a tic. Wach'xam niwn eb' tzchichn 'och 'ayin, palta libre waj in munlji.

¹⁰ Toto 'oj c'och Timoteo 'ayx ta', caw tzex tzaljn̈ej yet'oc, sec ma'oj cusoc, yujto tzmunlj 'a yic Cajlilec 'icha 'in tic.

¹¹ Yuj cha, may junc ex tztac' e patquiln can 'el ta'. An xo tic, tic wan in tan̈wni sjaw 'a tic, yet' jun tzo'n̈ xo eb' cu'tac 'oj jawc yet'oc. Yuj cha, a yic 'oj cotx 'a yol b'e, tzex colwj 'a 'a, sec tzaljc'ojlal 'oj cotoc.

¹² Ax cu'tac Apolos, caw in tew 'och 'a 'a, xin nib'j 'at ex yila'. Palta ma'ix yal sc'ojl x'at ex yil 'a jun tiempoal tic, at ab' 'a yic 'ay scolnal, 'oj 'at ex yila'.

Tz'ajx 'at stzatzl sc'ojl eb'

¹³ Macwjan̈ec, caw te'n tzeyutj e b'a eya'n 'och e c'ojl 'a Cajlilec. Man̈ ex xiwoc. Caw tze te'wtzej e b'a junjn ex.

¹⁴ Jantcn̈ej tas tze b'o'o, tze b'o wal yet' e chamc'ojlal.

¹⁵ A ticnec ex wu'tac, ex wanab', eyojtac a Estéfanas yet' yistzil yet' pax eb' yunnal, b'ab'l creyente eb' 'a yol yic Acaya 'aj 'ayx cha. A eb' cha, caw tzyac' servil eb' jun tzo'n̈ xo eb' quit creyenteal 'a smasnil sc'ojol.

¹⁶ Tzin tew wal 'ayex, to tzeyiclj tas tzyal eb'. Tzeyiclj pax jantcn̈ej eb' lajn tzyutj sb'a 'icha eb', yujto caw tzcolwj eb', tzmunlj eb' 'a Cajlilec.

¹⁷ Caw tzin tzalj ticnec, yujto xjaw Estéfanas wet' 'a tic, yet' Fortunato, yet' Acaico. A eb' tic, caw tzcolwj eb' 'ayin. 'Icha to e jel yajl eb' 'ayn 'a tic, yujto matz tac' e jawi.

¹⁸ 'Icha xyutj eb' ya'n sniwnal e c'ojl ta', 'ixta tzyutj eb' ya'n pax sniwnal in c'ojl 'a tic. Comnoc 'ay yel'ch eb' 'a e sat. Toto 'ay jun tzo'n̈ xo eb' 'icha eb' tic, 'ay cab' yel'ch pax eb' 'a e sat.

¹⁹ A eb' 'a junjn iglesia 'a yol yic Asia tic, tic tzya't eb' stzatzl e c'ojl e masnil ta'. An̈jtona pax Aquila, yet' Priscila, yet' smasnil eb' tzyam sb'a 'a yatut eb', tic tzya't eb' stzatzl e c'ojl 'a sb'i Cajlilec.

²⁰ Smasnil eb' creyente 'a tic, tic tzya't eb' stzatzl e c'ojl ta'. A yic tzlaj e chanc e b'a, tzlaj eyamlac e c'ab' yet' chamc'ojlal, yujto yic ex xo Dios.

²¹ A jun stzatzl e c'ojl tic, caw an Pablo in tic, an tzin tz'ib'j 'ati.

²² Toto 'ay junc mach matz chamc'ojlan Cajlil Jesucristo, 'ay cab' yowl sc'ojl Dios 'a yib'an̈. Ach Cajlil on̈, comnoc tzach jaw muc'uc.

²³ Tzin nib'j tzyac' Cajlil Jesucristo swach'c'ojlal 'ayx ta'.

²⁴ 'Ay in chamc'ojlal 'ayx e masnil yuj Cristo Jesús. [Ya' cab'i'.]