1 Co 13 - Chuj San Sebastian Bible

A chamc'ojlal

¹ Q'uinloc caw jeln tzlaj cutquec qui paxtin 'a sti smasnil 'anma', yet' pax 'a sti eb' ángel. Palta toto may qui chamc'ojlalec, lajn on̈c 'icha junc tinab'. Mto 'icha jun tzo'n̈ q'uen pachb'mb'a yic son, 'ixta on̈ec.

² Wach'xam caw 'ac'b'il copiso calnec 'el spaxti Dios, mto tznachj 'el tas cujec, smasnil tas mant 'a mach 'ojtnac, toxn̈ej cojquec cab' smasnil tas 'a yolyib'n̈q'uinl tic, wach'xam caw tzca'c 'och qui c'ojl 'a Dios si'mb'il, sec tztac' qui'nec 'el junc witz 'a yet'ul, palta toto may qui chamc'ojlalec, to 'ixta', caw may jac copisoec.

³ Wach'xam tzqui siyjec 'ec' smasnil tas 'ay 'ayn̈ec 'a eb' meb'a', toxn̈ej tzca'c 'och qui b'a 'a yol sc'ab' chamel, toxn̈ej tz'a qui niwnalec tic, toto may qui chamc'ojlalec, nab'an̈ej tzquixtjec qui b'a, may jac spac 'oj qui cha'ec.

⁴ 'Oj wala', tas tzcutjec qui b'a, toto yel 'ay qui chamc'ojlalec. Caw niwn tzcutjec qui c'ojl 'a eb' quit 'anma'il, tzqui ch'oxnec pax qui wach'c'ojlal 'a eb'. Man̈ comnoc tzon̈ chichnec 'och 'a junc xo mach yuj tas 'ay 'a 'a. Man̈ qui b'an̈c qui b'a, mto tzquijec chan̈ qui b'a.

⁵ Toto yel 'ay qui chamc'ojlalec, may 'aj tzca'c sq'uixwloc junc xo mach. Tzqui nib'ej, man̈oc on̈n̈ej 'ay caln quico'. Man̈ 'utznoc tzcutjec qui c'ojol. May 'aj tzqui na'ec, tas tzcutjec ca'n qui pac 'a junc mach.

⁶ May 'aj tzon̈ tzaljec yuj maysch'olnil tzb'o junc xo mach. Cojn jun tzo'n̈ caw yel, a tzon̈ tzaljec yet'oc.

⁷ Toto yel 'ay qui chamc'ojlalec, 'oj ca'c techjoc smasnil tas. 'Oj ca'c 'och 'a qui c'ojol, chajtlto wach'n̈j tas tzb'o eb' quit 'anma'il. 'Oj ca'c 'ochn̈ej pax eb' yipc qui c'ojol. Tzann̈j junc tas tzjaw 'a quib'n̈ec, te'nn̈ej 'oj cutquec qui b'a.

⁸ A jun chamc'ojlal tic, may b'a'n̈ 'oj lajwoc. 'Ay jun tiempoal 'oj jawoc, man̈x yowlalc 'ay mach tz'ajx yopiso yuj Dios yaln 'el spaxti'. A 'a jun tiempoal cha, man̈x yowlalc 'ay mach tzpaxtin 'a jun tzo'n̈ chucchc ti'al. An̈jtona', man̈x 'a yopiso qui jelnalec ta'.

⁹ Yujto mant tz'acnoc qui jelnalec ticnec. An̈jtona', mant tz'acnoc tzcutjec caln 'el spaxti Dios.

¹⁰ Palta a yic 'oj tz'acwoc smasnil, atta 'oj lajwc yopiso smasnil jun tzo'n̈ man̈ tz'acnoc tzqui b'oc tic.

¹¹ Q'uinloc an tic ticnec, a yic 'unn in to, paxtinnacnn̈ej 'icha spaxtin eb' 'unin. In najnac jun tzo'n̈ tas 'icha tzna eb' 'unin, yujto lajn in nab'en yet' eb'. Ax ticnec, 'ichm in winc xo. Yuj cha, wactjnac can jun in b'eyb'al yic 'unnal cha. 'Icha in 'a 'unnal cha, 'ixta on̈ec qui masnil ticnec.

¹² Yujto a ticnec, mantzac nachj 'el wal yic Dios cujec. 'Ichan̈ej quilnec jun tzo'n̈ tas 'a junc nen q'uic'moynac sat, 'ixta cajec. Palta a yic jun tiempoal cha, 'oj nachjc 'el smasnil tas yic Dios cujec. Yujto si'mb'il 'oj quilc wal smasnil tas. A ticnec, mantzac tz'acw cojcanec 'el yic Dios, palta a 'a jun tiempoal cha, 'oj cojcoquec 'eli. A ticnec, yojc on̈c Dios si'mb'il. 'Ixta 'oj 'aj cojcanec 'el smasnil yic Dios ta'.

¹³ A ticnec, tzca'c 'och Dios 'a qui c'ojol, tzca'nec pax 'och yipc qui c'ojol. Tzqui chamc'ojlanec pax eb' quit 'anma'il. A 'oxe tic, 'ay yopiso 'a smasnil tiempo. Palta a jun chamc'ojlal cha, 'ec'b'al 'a yib'n̈ chab'x tic 'a sat Dios.