1 Co 12 - Chuj San Sebastian Bible

A tas tz'ajx qui b'o yuj Yespíritu Dios

¹ Ex wu'tac, ex wanab', tzin nib'j tznachj 'el eyu'uj, tastc 'opisoal tzsiyj Yespíritu Dios 'ayn̈ junjn on̈ec.

² Eyojc xoni, a yic mant ex creyenteoc, ex 'ijx 'at 'a jun tzo'n̈ xeyalch e diosaloc. Ex 'at tic, ex 'at tic e sayn 'eq'ui. Palta matz tac' spaxtin jun tzo'n̈ cha.

³ Yuj cha, tzin nib'j 'oj eyojcoc 'el jun tzo'n̈ xo tic. Toto 'ay junc mach tzaln 'ixtic: 'Och cab' yowl sc'ojl Dios 'a yib'n̈ Jesús, toto xchi, a jun cha, man̈ 'ayc 'och Yespíritu Dios yet'oc yic tzyalni. Toto 'ay mach tzalni: A Jesús Wajlil, toto xchi, cojxn yuj Yespíritu Dios tztac' yaln 'ixta'.

⁴ An̈ec tic, chucchc 'opiso tzqui chaj junjn on̈ec, palta junn̈j mach tz'a'n 'ayn̈ec, atn Yespíritu Dios.

⁵ Chucchc tzcutjec ca'n servil junjn on̈ec, palta junn̈j mach tzca'c servil qui masnil, atn Cajlilec.

⁶ An̈jtona', chucchc qui munljel junjn on̈ec, palta junn̈j Dios wan smunlj quet' qui masnil.

⁷ A Dios tzch'oxn 'ayn̈ junjn on̈ec, chajtlto 'aych Yespíritu quet'ec, sec caw wach' quic qui masnil.

⁸ Yuj Yespíritu tic, 'ay eb' tztac' yaln sjelnal Dios, 'ay pax eb' tznachj 'el yuj scuywji.

⁹ Yuj Yespíritu tic, 'ay pax eb' tzwach' 'a'j 'och sc'ojl 'a Dios. Yu'uj, 'ay pax eb' tz'ajx spoder ya'n b'oxc sc'ojl eb' ya'ay,

¹⁰ 'ay eb' tz'ajx spoder sch'oxn 'el jun tzo'n̈ milagro, 'ay pax eb' tz'ajx yal-l spaxti Dios. Yuj Yespíritu tic, 'ay eb' tz'ajx yojcoc 'eli, toto a 'aych yet' junc mach, mto a junc demonio 'aych yet'oc. Yu'uj, 'ay pax eb' tz'ajx paxtinc 'a jun tzo'n̈ chucchc ti'al. 'Ay pax jun tzo'n̈ xo eb' tz'ajx alnoc, tas wal tzyal 'el'ch jun tzyal eb' cha.

¹¹ Til wal jun tzo'n̈ tas tz'ajx qui b'o'ec, palta junn̈j Espíritu tz'a'n qui b'oc jun cha. Chucchc tas tzyac' qui b'o junjn on̈ec, a tzyala tas tznib'j yac' qui b'o'ec.

Junn̈j niwnal cajc qui masnil

¹² A qui niwnalec tic, wach'xam niwn tas 'ay 'a 'a, palta junn̈j yaji. 'Icha jun tzo'n̈ tas 'a qui niwnalec tic, 'ixta cajc 'och 'a Cristo. 'Icha to sniwnal Cristo cajc qui masnil.

¹³ Yujto qui masnilec, wach'xam israel on̈ec, wach'xam ma'ay, junn̈j cajc qui masnil. Wach'xam 'ayn̈ 'och smosooc junc mach, wach'xam mun quic qui b'a, palta junn̈j cajec. Yujto a yic on̈ 'ajx bautisar, junn̈j on̈ 'ajc can yet' Cristo. Yujn̈ej Yespíritu Dios, 'icha to junn̈j niwnal cajec, yujto a 'ochnc can 'ayn̈ qui masnil.

¹⁴ 'Iltec nab'n qui niwnalec tic; niwn tas 'ay 'a 'a, man̈toc junn̈ej.

¹⁵ Q'uinloc a woc tzaln 'ixtc ticnec: An tic, man̈ in c'ab'oc, yuj cha, man̈ in yico'oc jun niwnal tic, toto xchi. Wach'xam tzyal 'ixta', palta an̈ja yic jun in niwnal tic.

¹⁶ Q'uinloc a jun in chicn tic tzaln 'ixtic: An tic, man̈ in yol satoc, yuj cha, man̈ in yico'oc jun niwnal tic, toto xchi. Wach'xam tzyal 'ixta', palta an̈ja yic jun in niwnal tic.

¹⁷ Q'uinloc a jun in niwnal tic, nab'a yol satn̈ej sb'a. To 'ixta', ¿tas wal tzwutj wab'ni? Q'uinloc nab'a schicnn̈ej sb'a. To 'ixta', ¿tas wal tzwutj in su'lni junc tas?

¹⁸ Palta a Dios 'ix laj b'on junjn tas 'a qui niwnalec tic 'icha tznib'ej.

¹⁹ Q'uinloc a jun qui niwnalec tic, junn̈j tas 'ay 'a 'a. To 'ixta', man̈ niwnaloc.

²⁰ Cojquec, niwn tas 'ay 'a qui niwnalec tic, palta junn̈j yaji.

²¹ A yol qui satc tic, matz tac' yaln 'a qui c'ab', to may yopiso yu'uj. An̈jtona qui jolmec, matz tac' yaln 'a coc, to may yopiso yu'uj.

²² 'Ay jun tzo'n̈ tas 'a qui niwnalec tic, 'icha to may yopiso. Palta atn jun tzo'n̈ tic yel xo 'ay yopiso cujec.

²³ Yet' jun tzo'n̈ tas 'icha to may yel'chi, atn wal jun tzo'n̈ chi yel xo 'ay yel'ch 'a qui satec. A jun tzo'n̈ tas man̈ wach'c yilxi, tzca'c 'och spichul. 'Ixta tzcutjec qui ch'oxni, to 'ay yel'ch 'ayn̈ec.

²⁴ Ax jun tzo'n̈ tas wach' yilxi, man̈ yowlalc tzca'c 'och spichul. 'Ixta xyutj Dios sb'on qui niwnalec tic, sec wach' a jun tzo'n̈ tas mayn̈ej yel'chi, atn jun tzo'n̈ chi yel xo 'ay yel'ch 'a qui satec.

²⁵ Yuj cha, matz tac' spojn sb'a qui niwnalec tic. Yujto tzmol coltj sb'a junjn tas 'ay 'a 'a.

²⁶ Q'uinloc 'ay junc eb' tzyab' syail, tzyab' syal pax smasnil yet'oc. Toto 'ay pax junc tzaljc'ojlal yaji, tzaljc'ojlal yaj eb' smasnil yet'oc.

²⁷ Yuj cha, an̈ec tic, 'icha to sniwnal Cristo cajec. Junjn on̈ec, 'icha to stz'acb' sniwnal chi cajec, 'ixta cajc 'och qui masnil 'a 'a.

²⁸ Yuj cha, 'ayn̈ec xyac' Dios copisoec 'a yiglesia. B'ab'el, 'ayn̈ec schecb' Cristo cajec. Schab'il, 'ayn̈ec tz'ajx copisoec caln 'el spaxti Dios. Yoxil, 'ayn̈ec cuywjum on̈ec. An̈jtona' 'ayn̈ec tzqui ch'oxl milagro. 'Ayn̈ec tztac' ca'n b'oxc sc'ojl eb' ya'ay. 'Ayn̈ec tztac' tzon̈ colwji. 'Ayn̈ec tzon̈ 'a'w cuenta. 'Ayn̈ec pax tztac' tzon̈ paxtinec 'a jun tzo'n̈ chucchc ti'al.

²⁹ Palta 'in man̈ on̈ schecb'oc Cristo qui masnil. Man̈ qui masnilc tz'ajx copiso caln 'el spaxti Dios. Man̈ on̈ cuywjumoc qui masnil. Matz tac' qui ch'oxn 'el milagro qui masnil.

³⁰ Man̈ qui masniloc tztac' ca'n b'oxc sc'ojl eb' ya'ay. Man̈ qui masniloc tztac' tzon̈ paxtinec 'a jun tzo'n̈ chucchc ti'al. An̈jtona', man̈ qui masniloc tztac' calni, tas tzyal 'el'ch jun tzo'n̈ chucchc til cha.

³¹ Yuj cha, tzeyac' 'ip e sayn jun tzo'n̈ opiso yel xo wach' tzyac' Dios. Palta 'ayt wal junx b'eyb'al yel xo caw wach' 'oj wal 'ayex.