1 Co 11 - Chuj San Sebastian Bible

¹ Yuj cha, caw tze b'eylb'ej in b'eyb'al, 'icha tzwutj in b'eylb'an sb'eyb'al Cristo.

A tas tzb'eylb'ej eb' 'ix 'ix 'a culto

² Ex wu'tac, ex wanab', tzex wal wach'l ta', yujto smasnil tiempo tzin e na coti. Wan e b'eylb'an pax jun tzo'n̈ cuynb'il waljnac can 'ayex.

³ Palta tzin nib'j tzeyojquej 'eli, to a Cristo, a Yajl yaj 'a junjn winac, 'icha to sjolm yaji. Ax yichmil junjn eb' 'ix 'ix, a yajl yaj 'a eb', 'icha Dios, Yajl yaj 'a Cristo.

⁴ Tzann̈j junc winac, a yic tzleslwi, mto tzyaln 'el spaxti Dios, toto c'oxb'il junc tas yuj 'a sjolom, a tzyac' sq'uixwloc.

⁵ Ax eb' 'ix 'ix, toto may jac tas 'ay q'ue 'a sjolm eb', tzleslwi eb', tzyaln 'el eb' spaxti Dios, a sjolm eb' chi tzyac' sq'uixwloc. 'Icha to joxb'il 'el sjolm eb' cha.

⁶ Toto 'ay eb' 'ix 'ix matz yal sc'ojl tzyac' q'ue junc tas 'a sjolom, wach' joxx cab' 'el sjolm eb' cha. Toto tzq'uixw eb', yic tzjoxx 'el sjolm eb' cha, yac' cab' q'ue eb' junc tas 'a sjolm cha.

⁷ An̈ winc on̈ec, man̈ smojc tzca'c q'ue junc tas 'a qui jolom, yujto 'icha to yechl Dios cajec, tzqui ch'oxnec 'eli, chajtl yaji. Ax eb' 'ix 'ix, a eb' tzon̈ ch'oxnec 'el an̈ winc on̈ tic.

⁸ Yujto a yic sb'on Dios win b'ab'l winac, man̈oc 'a 'ix 'ix chi 'elnc ta winac. A 'ix 'ix cha, a 'a win winc chi 'elnc ta 'ix.

⁹ A 'ix 'ix cha, b'ob'il 'ix, sec wach' yic win winac. Man̈ yujoc swach'l yic 'ix, sb'o winac.

¹⁰ Yuj cha, smoj tzyac' q'ue eb' 'ix junc tas 'a sjolom. 'Ixta tzyutj eb' sch'oxn 'eli, to 'aych eb' 'a yol sc'ab' yichmil. Smoj 'ixta tzyutj sb'a eb', yujto q'ueln 'och eb' ángel 'a eb'.

¹¹ Palta tznib'j Cajlilec, to 'ay cab' yel'ch eb' 'ix 'a qui sat an̈ winc on̈c tic. Tznib'n paxi, to 'ay pax cab' quel'ch 'a sat eb' 'ix 'ix cha.

¹² Yel toni, a 'a win winc cha, ata 'elnc ta 'ix b'ab'l 'ix. Palta a ticnec, a 'a eb' 'ix 'ix, ata tzon̈ pitzwec 'eli. Palta qui masnilec, a Dios b'ojnacn̈ec.

¹³ Ax xo, tze na wal si'mb'il, ¿tom smoj tzleslwi junc 'ix 'a Dios, toto may tas 'ay q'ue 'a sjolom?

¹⁴ 'In yojc eb' 'anma smasnil, an̈ winc on̈c tic, toto niwc xil qui jolm 'icha junc 'ix, tzon̈ q'uixwec.

¹⁵ Ax eb' 'ix 'ix, yujto niwc xil sjolm eb', yel xo wach' yilx eb'. A yopiso xil sjolm eb' cha, tzch'oxo, to smoj 'ay tas 'ay q'ue 'a sjolm eb'.

¹⁶ Toto 'ay ex, tzcot eyowl yuj jun tzo'n̈ cuynb'il tic, yowlal tznachj cab' 'el eyu'uj, chajtlto an̈ tic on̈, toxn matz qui chaj junc xo chuc b'eyb'al on̈. An̈jtona', 'ixta pax eb' creyente 'a junjn yiglesia Dios, matz chaj eb' junc xo chuc b'eyb'alil.

A eb' man̈ wach'c sb'eyb'al 'a Cena

¹⁷ 'Ay jun tzo'n̈ xo tas 'oj wal't 'ayex. Palta matz tac' tzex wal wach'il, yujto 'ayx 'ayt e paltail. Yujto a yic tzeyamn e b'a ta', may jac swach'l tze cha'aj. Ton̈j tzex juw 'el yu'uj.

¹⁸ Yuj cha, a jun tic 'oj in b'ab'l alc 'at 'ayex. Tzwab'i, a 'ajtc tzeyam e b'a 'a culto, 'ayx ab' tze nib'j tze pojl e b'a ta'. Palta tzin na'a, tecn yel jun tzo'n̈ chi tzwab' cha.

¹⁹ Tecn yowlal 'oj e poj e b'a, sec 'oj checljoc 'eli, machx yel creyente ex.

²⁰ Yuj cha, a yic tzeyamn e b'a, man̈ yico'oc Cajlil jun Cena chi tzex wa yet' cha.

²¹ Yujto a yic wan sc'och yorail jun cena cha, ton̈j tze comn yamj 'och e wan eyic junjn ex muc'uc. Yuj cha, 'ayx matz e chaj eyico', tz'och e wejel. 'Ayx pax caw tzex 'och 'u'm 'an̈il yu'uj.

²² ¿Tom may eyatut junjn ex, 'aj tztac' tzex wacni, tzeyu'n can tas ta'? A yic tze b'on jun tzo'n̈ cha, ax eb' eyit creyenteal, tze patquilj can 'el eb', palta yiglesia Dios pax yaj eb' eyet'oc. A eb' 'ixta tzeyutj cha, may tas tzc'ux eb' eyet'oc. Yuj cha, ton̈j tzeyac' q'uixwc can 'el eb'. ¿Tasm tze na'a? ¿Tom 'oj stac' ex waln wach'l yuj jun e b'eyb'al cha? Caw matz tac'a.

A Cena yic Cajlil

²³ A jun tzo'n̈ cuynb'il yic cena waljnac 'ayex, a Cajlilec 'a'jnac 'ayin. Atn jun tzo'n̈ tic 'oj wal't 'ayx tic: 'Ay jun 'ac'wal, 'ix 'ajx 'och Cajlil Jesús 'a yol sc'ab' eb' xmilni. A yic mantzac yamchji, 'ix yi'n chan̈ 'ixm pan.

²⁴ Ax yic xlajw ya'n yuj diosal 'a Dios, 'ix sch'iyn 'ixm pan cha. 'Ix yaln 'a eb' scuywum 'ixtic: [Wan̈ec.] A jun tic, atn in niwnal 'oj yab' syal e jeloc. Nachji, tze b'o jun tic, yic tzin e nan coti, xchi.

²⁵ An̈jtona', 'ixta 'ix yutj yi'n pax chan̈ jun vaso, yic xlajw swa eb'. 'Ix yaln pax 'ixtc 'a eb': A tas 'ay 'a yol jun vaso tic, sch'oxnb'il jun yac' trato Dios. Yuj in chiq'uil, 'oj 'el'choc jun strato tic. A yic tzeyu'n jun tic 'a junjn 'ejem, 'ixtc 'oj e b'o', sec 'oj in e na coti, xchi Jesucristo.

²⁶ Yuj cha, a yic tzqui wanec jun pan tic, tzcu'lb'anec jun vaso tic 'a junjn 'ejem, tzqui ch'oxnec 'el schaml Cajlilec. 'Ixtc 'oj qui b'o'ec, masnto 'oj jawc pax Cajlilec cha.

A tas tzqui b'eylb'ejc 'a Cena

²⁷ Yuj cha, toto 'ay mach man̈ wach'c tzyutj swan jun pan tic, tzyu'lb'an pax jun vaso yic Cajlil tic, caw tz'och smul 'a sniwnal Cajlilec, yet' 'a schiq'uil.

²⁸ Yuj cha, junjn on̈ec, a yic mantzac qui wajec jun pan tic, tzcu'lb'anec jun vaso tic, yowlal tzqui b'eyc'ojlejec can qui b'a b'ab'el.

²⁹ Yujto a yic tzqui wanec, tzcu'nec jun tic, toto matz cham qui nanec sniwnal Cajlilec, caw tzquijec cot yailal 'a quib'an̈.

³⁰ Yuj wal jun tzo'n̈ tic, til wal eb' ya'ay, til wal eb' tz'on 'a e cal, 'ay pax eb' chamnc xo.

³¹ Palta toto tzqui b'eyc'ojlej qui b'a junjn on̈ec, toto 'ixta', ax Cajlilec, man̈x yowlalc 'oj on̈ sb'eyc'ojloquec.

³² A yic tzon̈ b'eyc'ojlax yuj Cajlilec cha, a tz'a'n yailal 'a quib'n̈ec, sec wach' man̈x 'oj qui 'atcn 'a junx niwn yailal yet' eb' yic yolyib'n̈q'uinl tic.

³³ Yuj cha, ex wu'tac, ex wanab', a yic tzeyamn e b'a yuj jun cena tic, tzlaj e tan̈wc e b'a, sec moln tze waj e masnil.

³⁴ Toto 'ayx caw 'ay e wejel, yowlal tzex wacn 'a eyatut. Toto 'ixta', wach' 'oj eyutc e b'eyb'al, yic tzeyamn e b'a ta'. Ax Dios, ma'oj ya' cot yailal 'a eyib'an̈. Ax jun tzo'n̈ xo tas tzat yac' palta 'ayex, 'ojt in b'oyaji, yic 'oj in c'och 'ayx ta'.