1 Co 10 - Chuj San Sebastian Bible

Matz tac' calnec qui b'a*r* 'a jun tzo'n̈ tzalx 'och diosal

¹ Ex wu'tac, ex wanab', tzin nib'j tzeyojquej 'eli, tas 'ajnc eb' qui mam quichm 'a pecti 'on̈, yic yoch tza'n eb' yuj Moisés. C'uxn b'eync eb' smasnil 'a yaln̈ jun 'asun, 'e'nc pax eb' smasnil 'a snan̈l a Chac Mar.

² 'Icha to 'ajxnac bautisar eb' 'a jun 'asn cha, yet' 'a a mar cha. 'Icha to 'ajxnac 'och eb' yico'oc Moisés 'a jun tiempoal cha.

³ Smasnil eb' wajnac jun 'icha wal 'ac'b'il yuj Dios 'a eb' 'a 'esal.

⁴ An̈jtona', smasnil eb' 'u'jnac jun a 'ac'b'il yuj Dios 'a eb' 'a 'esal. A 'a sat jun q'uen q'ue'en, ata 'elnc ta a a'. A jun q'uen cha, sch'oxnb'il Cristo yaji.

⁵ Wach'xam 'ixta 'ajnc eb', palta an̈ja til wal eb' maysch'olnil snab'en 'a sat Dios. Yuj cha, chamnc can eb' 'a jun cusltac lum 'aj 'e'nc cha.

⁶ A jun tzo'n̈ tas jawnc 'a yib'n̈ eb' cha, ch'oxnb'il yaj 'ayn̈ec, sec matz qui nib'jec 'och jun tzo'n̈ maysch'olnil, 'icha yutjnac sb'a eb' cha.

⁷ Yuj cha, matz tac' calnec qui b'a 'a jun tzo'n̈ tzalx 'och diosal, 'icha yutjnac sb'a jun tzo'n̈ eb' 'a scal eb' cha. A Ch'an̈ Un̈ tz'ib'b'il cani, a Ch'an̈ tzaln yuj eb' 'ixtic: 'Ix laj 'em wocn eb' swa'i, 'ix laj yu'nc eb' tas tzyuq'uej. Xlajw cha, 'ix q'ue b'uynjoc eb' sb'on maysch'olnil, xlaj ya'n eb' chan̈al, xchi 'a Ch'an̈.

⁸ Matz tac' qui b'onec pax 'ajmulal. Yujto 'ixta yutjnac sb'a jun tzo'n̈ eb' 'a scal eb' cha. Yuj wal jun cha, 'oxeschawinc mil eb' chamnc 'a jun c'u.

⁹ Matz tac' ca'nec prowal Cajlil yic tzquilni, toto tzyac' niwnc'ojlal 'ayn̈ec. Yujto 'ixta yutjnac sb'a jun tzo'n̈ eb' 'a scal eb' cha. Yujn̈ej cha, slajw 'el eb' yuj jun tzo'n̈ no chan.

¹⁰ Matz tac' qui comn alnec speclal Cajlilec. Yujto 'ay eb' aljnac speclal, yuj cha, xlajw 'el eb' yuj jun ángel 'ay yopiso smiln cham 'anma'.

¹¹ Smasnil jun tzo'n̈ tas jawnc 'a yib'n̈ eb' qui mam quichm chi 'on̈, ch'oxnb'il yaj 'ayn̈ec. Tz'ib'b'il can jun tzo'n̈ chi 'a Ch'an̈ U'un̈, sec cojquec, to 'ay smay yoch qui mulec. Yujto an̈ec tic, 'ayn̈ecx 'ec' 'a jun slajb' tiempoal.

¹² Yuj cha, a mach tznani to caw tec'an, yowlal tzyac' cuenta sb'a, yujto 'ay smay tzjuw 'eli.

¹³ Jantcn̈ej jun tzo'n̈ prowal tzjaw 'a quib'n̈ec, lajnn̈ej yet' jun tzo'n̈ tzjaw 'a yib'n̈ eb' 'anma smasnil. Palta a Dios tz'a'n 'el'choc tas tzyala. Matz on̈ schaj 'ajxoc prowal yuj junc tas matz techj cujec. A yic tzjaw junjn prowal cha, a tz'a'n qui na'ec, tas tzcutjec qui coln qui b'a 'a 'a, sec wach' tztechj cujec.

¹⁴ Yuj cha, ex chamc'ojlb'il wu'uj, caw man̈ eyal e b'a 'a jun tzo'n̈ tzalx 'och diosal.

¹⁵ Tzwal't jun tzo'n̈ tic 'ayex, yujto 'ayx e jelnal. Tztac' tze na si'mb'il, toto yel tzwala.

¹⁶ A jun vaso yic Dios, jun tzca'c yuj diosal yu'uj, a tzch'oxni to junxn̈ej tzon̈ 'ajc yet' Cristo, yujto x'elcn schic'l cujec. An̈jtona', yet' jun pan tzpojx 'ec' 'a qui calec, a tzch'oxn paxi, to junxn̈ej tzon̈ 'ajc yet'oc, yujto x'ajx cham sniwnal chi cujec.

¹⁷ Wach'xam niwn on̈ec, junn̈j jun pan chi tzqui wajec qui masnil. Yuj cha, 'icha junc pan junn̈ej, 'ixta 'on̈ec. Yujto 'icha to sniwnal Cristo cajc qui masnil.

¹⁸ Tze na cot tas tzyutj sb'a eb' wit israelal cha. A yic tzchin eb' jun tzo'n̈ no noc' tzyac' xajmb'alil, junxn̈ej yaj eb' yet' Dios, atn jun tzchan xajmb'al eb' cha.

¹⁹ Man̈toc tzwala, to 'ay yel'ch jun tzo'n̈ tzalx 'och diosal cha. An̈jtona', 'ixta pax jun tzo'n̈ xajmb'al cha, man̈toc tzwala, to 'ay yel'chi.

²⁰ Palta a jun tzwal tic. A yic tzya'n eb' man̈ israeloc xajmb'al, man̈oc 'a Dios tzyac' eb'. A 'a jun tzo'n̈ demonio tzyac' eb' xajmb'al cha. Palta tzin nib'ej, caw man̈ junc tzex 'aj yet' ewin demonio cha.

²¹ Matz tac' qui comn 'u'lb'anec jun vaso yic Cajlil, toto tzcu'lb'ejec pax jun yic ewin demonio. An̈jtona', matz tac' qui comn wanec jun pan tz'ajx 'ayn̈ec 'a smexa Cajlil, toto tzqui c'uxc jun tzo'n̈ tas tz'ajx 'a smexa ewin demonio cha.

²² ¿Tom tzqui nib'j tzquijec cot yowl sc'ojl Cajlilec 'a quib'an̈? ¿Tom tze na'a, to yel xo 'ec'b'al qui poder 'a yib'an̈?

Matz tac' ca'n juwc 'el*r* snab'en junc xo mach

²³ Tecn 'ayx tzeyal 'ixtic: Libre cajc qui b'on smasnil tas, xe chi. Yel toni libre caji, palta man̈ smojc qui b'onec smasnil. Yel toni, libre qui b'onec smasni tas, palta man̈ smasnilc jun tzo'n̈ chi tz'a'n ste'nal qui nab'enec.

²⁴ Junjn on̈, matz tac' qui b'on 'icha tzqui nib'j 'a yol quico'. Yowlal tzqui sayc' tas tzcutjec ca'n ste'nal jun tzo'n̈ xo eb'.

²⁵ Al ticnec, tzann̈j cab' chib'jal tzchon̈x 'a plas, tzta'n̈j e mann e chi'. Matz e c'anb'ej, 'aj tzcoti, sec wach' ax jun e nab'en tzex 'a'n cuenta, matz juw 'el yu'uj.

²⁶ Yujto a yolyib'n̈q'uinl tic, yet' smasnil tas 'ay 'a 'a, yic Cajlilec.

²⁷ Q'uinloc 'ay junc man̈ creyenteoc tzex 'awtn 'at wac 'a yatut. Toto tze nib'j tzex 'ati, tzta'n̈j tze c'ux tas tzyac' 'ayex. Man̈ e c'anb'c 'a 'a, aj tzcot jun tzo'n̈ chi tzyac' 'ayx cha, sec wach' matz juw 'el e nab'en yu'uj.

²⁸ Palta toto 'ay junc mach tzaln 'ayx 'ixtic: A jun chib'j tzyac' win tic, tox x'och xajmb'alil, toto xchi 'ayex, man̈ e chi'. Yujto a jun tzaln 'ayx cha, 'ay smay, toq'ue tzjuw 'el snab'en eyu'uj.

²⁹ Tzwal't jun tzo'n̈ tic 'ayex, sec matz juw 'el snab'en jun tzo'n̈ xo eb' mant 'a ste'nal eyu'uj. Man̈ yujoc e nab'en ax tic, tzwaln 'at jun tzo'n̈ tic. Palta tecn 'ayx 'oj eyal 'ixtic: An̈ec tic, tzta'n̈j qui c'uxnec smasnil tas. Yuj cha, ¿tas yuj tzon̈ sb'eyc'ojlej jun tzo'n̈ xo eb' tzxiw schin no chib'j cha?

³⁰ Toto tzca'c yuj diosal 'a Dios yuj no chib'j cha, tzqui chinec, may mach tztac' yaln maysch'olnil 'a qui patquec, 'oj e chioc. Tecn 'ayx wan e nan 'ixta ticnec.

³¹ Palta tzwal't 'ayex, wach'xam tzon̈ wa'ec, mto tzcu'jec junc tas, tzann̈j cab' junc xo tas tzqui b'o'ec, yowlal caw wach' tzcutjec qui nab'en, sec wach' 'oj checljoc 'el swach'l Dios.

³² Wach'xam israel, mto man̈ israeloc, caw matz tac' ca'nec juwc 'el snab'en eb'. An̈jtona', yet' eb' yiglesia Dios quet'ec, matz tac' ca'nec juwc 'el snab'en eb'.

³³ An xo tic, jantcn̈ej tas tzin b'o'o, tzwa'lj wa'n stzaljc'ojlal smasnil 'anma'. Man̈toc mun wic tzin sayq'ui, yic tzin chan swach'il. Palta tzin say yic jun tzo'n̈ xo 'anma', sec wach' toq'ue 'oj colchjoc 'el eb'.