A Ch'an̈ B'ab'el Libro Samuel 9 - Chuj San Sebastian Bible

Si'x 'och Saúl reyal

¹ A 'a scal eb' yin̈tl Benjamín, ata 'ay jun winc tzcuch Cis, caw wal b'inab'il, atn win yunnal win Abiel, yixchicn win Zeror, schab'l 'ixchicn win Becorat, win yunnal Afía.

² 'Ay jun yunnal win Cis chi, Saúl sb'i. Yel xo wal wach' yilx win quelm chi 'a yib'n̈ smasnil eb' yit israelal cha. May xon junc eb' quelm chi lajn yilx yet' winac. Caw niwquil ste'il, cojn 'a squelb' win tzq'ue'ch stel eb' 'anma cha.

³ 'Ay jun c'ual 'ix sat e no sb'uru win Cis cha, win smam Saúl. Yuj cha, 'ix yaln 'a jun yunnal chi 'ixtic: —'Ac' lista a b'a muc'uc, 'at sayc' e no qui b'uru cha. 'Ij 'at junc ewin qui moso tic et'oc, xchi.

⁴ 'Ix 'at Saúl cha, ata xc'och 'a lum jolmctac witz yic eb' yin̈tl Efraín. 'Ix c'axw 'ec' 'a yol yic Salisá, palta ma'ix 'ilchj e no yu'uj. 'Ix c'ochx eb' 'a yol yic lum Saalim, may pax e no ta'. Xlajw cha, 'ix 'atxi axta xc'ochx 'a yol yic eb' yin̈tl Benjamín, may pax e no 'ayc' ta'.

⁵ Ax yic xc'och eb' 'a yol yic lum Zuf, 'ix yaln Saúl 'ixtc 'a jun smoso ajun yet' cha: —'Oj qui meltzj 'a jun lugar tic, yujto wan am sat sc'ojl in mam 'a e no b'uru cha, wan scus win cu'uj, xchi.

⁶ 'Ix ta'w win moso chi 'a 'ixtic: —A 'a jun chon̈b' tic, 'ay jun win schecb' Dios caw wal 'ay yel'ch 'a sat eb' 'anma'. Smasnil tas tzyal-li, tz'el'chn̈ej. Con̈ 'at qui say quil winac. Lemb'il tzyal win 'ayon̈, tas tzon̈ 'aji, xchi winac.

⁷ —'Ix yaln Saúl 'ixtic: Toto tzon̈ 'ati, ¿tas pax jac tzcac' 'a winac? Man̈x 'a xon jac tas tzqui c'ux 'ay 'a yol qui pa, may jac tas wach' ca'n 'a win schecb' Dios cha, xchi.

⁸ —'Ay jun yune tumn plata wet'i. A cab' tzcac' 'a win schecb' Dios cha, sec tzyal win 'ayon̈ tas tzon̈ 'aji, xchi win moso cha.

⁹ (A 'a pecti', toto 'ay junc eb' quit chon̈b' tznib'j sc'anb'c junc tas 'a Dios, 'ixtc tzyutj eb' yalni: Cotn̈ec, 'at quilc win tztac' yiln junc tas, xchi eb'. Ax ticnec schecb' Dios sb'i eb'. A 'a pecti cha, win Tztac' yiln junc tas, 'ixta sb'i jun chi yuj eb'.)

¹⁰ 'Ix ta'w Saúl 'ixtc 'a win smoso cha: Wach' cab' 'icha tzal cha, con̈ 'at qui say quil winac, xchi. 'Ix 'at eb' schawn̈il 'a jun chon̈b' cha, 'a 'aj cajn win schecb' Dios.

¹¹ Ax yic wan sq'ue'ch eb' 'a yaln̈ 'emt jun chon̈b' cha, 'ix schan sb'a eb' yet' jun tzo'n̈ eb' 'ix cob's 'ix tz'ec' cuchj a', sc'anb'n eb' 'ixtc 'a eb' 'ix: —¿A 'am 'a tic cajn jun win tztac' yiln junc tas? xchi eb'.

¹² —N', atn 'a tic cajn winac, yaj win 'a eyojltac 'at cha. C'olc eyip toq'ue 'ayt 'ec' winac. At wal sjaw 'a yol chon̈b' tic, yujto 'ay xajmb'al eb' 'anma tic 'oj yac' 'a lum tzaln yic 'emmquilal.

¹³ 'Ixquec muc'uc, sec 'oj 'ilchjoc eyu'uj ya' sb'a mantzac 'at wac 'a lum tzaln yic 'emmquilal cha. At yic 'oj c'ochoc, ax yaln swach' paxti 'a yib'n̈ jun xajmb'al cha, 'ixta to b'i'an, ax swa eb' 'anma chi smasnil yet' eb' 'awtb'il 'a jun yamnil cha. 'At sayc eyila', colb'ilto 'oj 'ilchjoc eyu'uj, xchi eb' 'ix.

¹⁴ 'Ix 'atx eb', ax yic wan yoch eb' 'a yol chon̈b' cha, 'ix schan sb'a Samuel yet' eb', yic tz'at 'a lum tzaln yic 'emmquilal cha.

¹⁵ A yic q'ui'noc to sc'och Saúl cha, 'ix yaln can Jehová 'ixtc 'a Samuel:

¹⁶ Yab'n wal 'ixtc q'uic'an, ax in checn cot jun win winc 'ayach. Ata 'oj cot win 'a scal eb' yic Benjamín. Tzac' q'ue aceite 'a sjolom yic tza si'n can 'och syajlilc in chon̈b' Israel. A win 'oj colnc 'el in chon̈b' tic 'a yol sc'ab' eb' filisteo, yujto tzcus in c'ojl yaln sb'a eb' 'anma tic, xchi 'a Samuel cha.

¹⁷ A yic xyiln sb'a Samuel 'a Saúl, 'ix yaln Jehová 'a 'ixtic: Yaj win winc xwal 'ayach. Atn win tic 'oj yac' yajlil 'a yib'n̈ in chon̈ab', xchi.

¹⁸ A 'a yol sti spuertail chon̈b' cha, ata schaj sb'a Saúl yet' Samuel. 'Ix yaln Saúl chi 'ixtic: —Tzin c'an wal yuj diosal 'ayach, comnoc tzal 'ayin, 'aj 'ay yatut jun win tztac' yil junc tas, xchi.

¹⁹ Ax Samuel cha, 'ix ta'w 'ixtc 'a 'a: —An ton tic. Lem con̈ wet' 'a lum tzaln yic 'emmquilal, to 'oj a wa wet' ta'. Ax q'ui'n 'a sq'uin̈b'ial, ata 'oj wal 'ayach tas jun tza nib'j a c'anb'c 'ayn cha, 'oj lajwc cha, ax a 'atxi.

²⁰ A e no b'uru 'ayx yoxl c'u sat cha, man̈ a na e no', tox 'ix 'ilchj e no'. Ax jun tas caw nib'b'il yuj eb' quit chon̈ab', ach 'ay ec yet' eb' ecan, xchi.

²¹ 'Ix ta'w Saúl 'a 'ixtic: —Palta an tic, ata tzcot win̈tl 'a eb' yic Benjamín. Yel xo wal jaywn̈ej sb'ey eb' win̈tl chi 'a scal eb' yin̈tl Israel. An̈jtona', caw may pax wel'ch yet' eb' wican chi 'a scal pax eb' yin̈tl Benjamín cha. ¿Tas pax yuj a 'ayn tzal jun tic? xchi.

²² Xlajw xoj cha, 'ix yi'n 'och Samuel win Saúl chi yet' jun smoso chi 'a yol jun cuarto 'aj yamn yaj ewin niwc winc 'awtb'il cha, tecn 'ay am junc lajn̈schawinc ewinac. Ax wal jun lugar yel xo wach' x'ajx 'a Saúl cha.

²³ Xlajw cha, xyaln Samuel 'ixtc 'a win tzb'on tas tzc'uxx cha: —'Ij cot no chib'j xwac' e'cn 'eli, atn no chuc xwac' a molcni, xchi.

²⁴ Yajn̈j wal cha, 'ix yi'n cot win tz'a'w servil chi no chib'j cha, a jun no xub' xwul yac' 'a yojltac Saúl. 'Ix yaln Samuel 'a 'ixtic: —A yic xwawtn eb' 'anma tic wac wet'oc, 'ix wa'n 'ijxoc can 'el jun chib'j tic o'oj, ax ticnec wa'an̈, xchi. Atn 'a jun c'u chi 'ix wa Saúl yet' Samuel.

²⁵ Ax yic x'emx wul eb' 'a lum tzaln cha, 'ix 'och eb' 'a yol chon̈b' cha. 'Ix paxtin Samuel yet' Saúl 'a span̈nil yib'n̈ yatut.

²⁶ Ax 'a junx c'u cha, 'ix seb' q'ue wan Samuel, 'ix yawtn 'emt Saúl 'a 'aj waync 'a cha'an̈, 'ix yaln 'a 'ixtic: —Lem q'uen̈ wa'an to tzach 'atxi, xchi. 'Ix q'ue wan Saúl. Xlajw cha, 'ix 'el eb' 'a yol caye schawn̈il, atn Saúl yet' Samuel cha.

²⁷ Ya' sb'a wanto yel eb' 'a sti 'el chon̈b' cha, 'ix yaln Samuel 'ixtc 'a Saúl: —Al 'a win a moso tic, axn tzb'ab'l 'at o'oj, xchi. Yuj cha, 'ix b'ab'lj win moso cha. Xlajw cha, 'ix yaln pax 'ixtic: Ach xo tic, tzach 'och wan b'el, sec 'oj wal 'ayach, tas xyutj Dios yaln 'ayn o'oj, xchi Samuel cha.