A Ch'an̈ B'ab'el Libro Samuel 8 - Chuj San Sebastian Bible

Tznib'j eb' israel tz'och sreyal

¹ A yic x'och Samuel 'ichm 'anma'il, 'ix ya'n can 'och chawn̈ yunnal syajlilc eb' yit chon̈ab'.

² Joel sb'i win sb'ab'l 'unnal, ax win schab'il, Abías sb'i winac, yajl yaj eb' 'a chon̈b' Beerseba.

³ Palta a eb' 'unnab'il cha, man̈oc sb'eyb'al smam eb' chi xyi'aj. 'Ix snib'j eb' tz'och ricoal, yuj cha sc'ultac chan eb' tumin, maysch'olnil tzyutj eb' sb'onyaj junc tas.

⁴ Yuj cha, 'ix syamn sb'a smasnil eb' yichm wincal chon̈ab', 'ix 'at eb' sc'umc Samuel 'a chon̈b' Ramá.

⁵ 'Ix yaln eb' 'a 'ixtic: Ach tic, ach 'och 'ichm wincal, ax eb' onnal, man̈oc a b'eyb'al tzb'eylb'ej eb'. Yuj cha, tzcaln 'ayach, to tza saycn junc qui reyl tzon̈ jucb'tzani, 'icha yaj jun tzo'n̈ xo nacion̈, xchi eb'.

⁶ Palta caw wal ma'ix schaj sc'ojl Samuel jun tzo'n̈ paxti xyal eb' cha, yujto tzc'an eb' junc sreyl tz'a'n cuenta. Yuj cha, 'ix leslwi win yuj eb'.

⁷ 'Ix ta'w Jehová 'a win 'ixtic: Chaj ab' tas tzyal eb' 'anma tic, yujto man̈oc ach tzach spatquilj can 'el eb', palta to a 'in, sec man̈xtzac wac' yajlil 'a yib'n̈ eb'.

⁸ 'Icha wal yutjnacn eb' yic wi'n 'elt eb' 'a Egipto masnto ticnec, in yactj can eb', ax 'a jun tzo'n̈ comn dios 'aj xlaj yac' 'ejm sb'a eb', 'ixta wal tzach yutj eb' ticnec.

⁹ Yuj cha, a tas tzc'an eb' 'ayach, yiclj a b'on 'a eb'; palta yowlal tzal yab' eb' tas 'oj 'aj eb' yuj jun sreyl 'oj yac' yajlil 'a yib'n̈ cha, xchi.

¹⁰ Xlajw cha, xyaln Samuel spac spaxti eb' 'anma sc'an sreyl cha, 'icha 'ix yutj yaln Jehová.

¹¹ 'Ix yaln 'ixtic: —'Ixtc wal 'oj ex yutc jun rey 'oj yac' yajlil 'a eyib'n̈ cha: 'Oj yec syam sb'a eb' eyunnal. 'Ay eb' 'oj ya'ch 'a yojl jun tzo'n̈ caruaje yic owal, 'ay eb' 'oj q'ue 'a yib'n̈ chej ax s'at eb' 'a owal, 'ay pax eb' 'oj ya'ch win stan̈maloc.

¹² 'Ay eb' 'oj ya'ch win syajlilc junc mil soldado, 'ay eb' 'oj ya'ch win syajlilc junc 50. 'Ay eb' 'oj 'och sb'o smunljel winac, 'oj st'oc eb' slum winac, ax laj smoln chan̈ eb' tas tz'el 'a smunljel win cha. 'Ay eb' 'oj 'och sb'o syamc'ab' win yic owal, 'ay pax eb' 'oj b'onc scaruaje win tzc'ana yic tz'at 'a owl cha.

¹³ Ax yi'n 'at win eb' 'ix eyisl 'a'j servil 'a yatut: 'Ay eb' 'ix 'oj 'och b'oj perjuma, 'ay eb' 'ix 'oj b'onc tas tzc'ux winac, 'ay pax eb' 'ix 'oj b'onc span winac.

¹⁴ An̈jtona', 'oj sto'cc win swach'l e lu'um, ax yi'n 'ec' win eyawb'en uva yet' te eyawb'en olivo, ax ya'n win 'a eb' 'aych yajlil yet'oc.

¹⁵ 'Oj yi'l win sdiesmoal smasnil tas tzeyawej yet' yic sat e uva, ax ya'n win 'a eb' 'aych yajlil yet' cha, yet' 'a jun tzo'n̈ xo eb' schecab'.

¹⁶ An̈jtona', 'oj yi'cc win ewin e moso, yet' eb' 'ix eya'mal servil, yet' e no e quelm wacx caw wach', yet' e b'uru, ax yoch eb' munljoc 'a winac.

¹⁷ Ax yi'n 'el win sdiesmoal e calnelu, an̈jtona 'oj eyac' servil winac.

¹⁸ A 'a jun c'u cha, 'oj cob' eyal e b'a 'a Jehová yuj tas 'oj ex yutc win e reyl 'oj e si'l cha, palta man̈x 'oj ta'wc 'ayex, xchi.

¹⁹ Palta ma'ix schaj eb' chon̈b' chi yab' tas xyal win Samuel cha, 'ix ta'w eb' 'a 'ixtic: —A jun tzo'n̈ tzal tic, may yel'ch 'ayn̈ on̈. Cojnto tz'och qui reyl chi 'on̈,

²⁰ sec lajn tzon̈ 'aj yet' jun tzo'n̈ xo nacion̈. 'Oj yac' jun qui reyl chi yajlil 'a quib'n̈ on̈, ax on̈ sjucb'tzan 'a owal, xchi eb'.

²¹ Xlajw yab'n Samuel smasnil tas xyal eb' chon̈b' cha, 'ix yaln pax yab' Jehová.

²² 'Ix ta'w Jehová 'a Samuel 'ixtic: —Chaj ab' tas tzyal eb' cha, 'a'ch can junc sreyl eb', xchi. Xlajw cha, xyaln Samuel 'a eb' 'ichm winc cha, to tzpax junjn eb' jaye'oc c'u 'a schon̈b' 'aj xcoti.