A Ch'an̈ B'ab'el Libro Samuel 7 - Chuj San Sebastian Bible

¹ 'Ix jaw eb' 'aj Quiriat-jearim wul yic' te scaxail strato Jehová cha, axta xc'och yuj eb' 'a yol yatut win Abinadab, ata cajn win 'a jun lum tzalan. Ax jun yunnal win tzcuch Eleazar, a si'cn 'och eb' 'anma chi stan̈malc te scaxail strato Jehová cha.

'Ochnc Samuel syajlilc chon̈b' Israel

² Junc'l ab'il xcan te caxa chi 'a chon̈b' Quiriat-jearim, ax smasnil eb' israel, 'ix tew 'och eb' wal 'a Jehová.

³ Yuj cha, 'ix yaln Samuel 'ixtc 'a eb' yit israelal cha: Toto yet' smasnil e c'ojol tzex meltzj pax 'a Jehová, yowlal tzeyij 'el jun tzo'n̈ comn dios 'ayc' 'a e cal, yet' jun tzo'n̈ sch'oxnb'il comn dios Astarté. Tzeya'n wal 'och e b'a 'a yol sc'ab' Jehová, cojxn tzeyac' servil. Toto 'ixta', 'oj ex scol 'elt 'a yol sc'ab' eb' filisteo, xchi.

⁴ Yuj cha, xlaj yi'nc 'el eb' israel jun tzo'n̈ yechl Baal chi 'a scal yet' jun tzo'n̈ sch'oxnb'il Astarté cha. Cojxn 'a Jehová 'ix yac' 'ejm sb'a eb'.

⁵ Xlajw cha, xyaln Samuel 'a eb' 'ixtic: Yamnc e b'a e masnil 'a Mizpa, an xo 'oj in leslwi 'a Jehová eyuj ta', xchi 'a eb'.

⁶ Ax yic 'ix syamn sb'a eb' 'a Mizpa cha, 'ix yi'n q'uet eb' a a', xlaj secnc 'ejm eb' 'a yojltac Jehová. 'Ix ya'n 'och sb'a eb' 'a c'ajb'c'ojlal 'a jun c'u cha. Xyaln eb' 'ixtic: 'Ix 'och wal qui mul 'a Jehová, xchi eb'. Ax Samuel, 'ix jucb'tzan eb' yit chon̈b' 'a Mizpa.

⁷ Ax xyab'n sb'a eb' filisteo to yamn eb' israel smasnil 'a Mizpa, yuj cha, 'ix cot eb' syajlil eb', yet' eb' soldado wul yac' owl yet' eb'. Ax xyab'n sb'a eb' israel cha, to wan scot eb' 'ajc'ojl chi 'a eb', yuj cha, caw xiw eb'.

⁸ 'Ix yaln eb' 'ixtc 'a Samuel: Man̈ actc a tew 'a Jehová qui Diosalec, sec tzon̈ scol 'a yol sc'ab' eb' 'ajc'ojl yajch 'ayn̈ec, xchi eb' 'a 'a.

⁹ Ax Samuel, yajn̈ej 'ix yi'n cot jun no nene calnelu tzat chuwi, 'ix ya'n tz'a no xajmb'al-l 'a Jehová. Syamn 'och sc'ann scolwal Jehová 'a yib'n̈ yet' eb' yit israelal cha, ax Jehová caw yajn̈ej xta'w 'a 'a.

¹⁰ Ya' sb'a wanto stz'a no xajmb'al cha, ax eb' filisteo 'ix jaw eb' muc'uc yic tzya'n eb' owl yet' eb'. Ax Jehová 'ix 'a'n sma' sb'a c'u 'a yib'n̈ eb', 'ix xiw chan̈ eb' 'ajc'ojl cha, 'ix 'at eb' 'elc 'a yojltac eb' israel.

¹¹ Ax eb' israel 'a Mizpa cha, 'ix 'at eb' 'a spatc eb', til wal eb' filisteo chi xchami, masnto xc'ochcn eb' 'a yaln̈ 'ejm Bet-car.

¹² Xlajw cha, 'ix yi'n cot Samuel jun q'uen niwquil q'ue'en, 'ix ya'n can 'ejm 'a snan̈l Mizpa yet' Sen. 'Ix ya'n can scuch Eben-ezer, xyaln 'ixtic: 'Ix colwjn̈ej Jehová quet'ec masnto 'a jun c'u tic, xchi.

¹³ 'Ixta x'aj eb' filisteo chi yajx ganar yuj eb' israel. Yic 'ayt 'ec' Samuel, ax Jehová 'aychn̈ej xib'tn eb' filisteo cha, yuj cha, man̈x 'a 'aj 'ix jaw eb' yac' owl 'a slum eb' israel cha.

¹⁴ Jantcn̈ej lum schon̈b' eb' macb'il 'ec' yuj eb' filisteo, tz'atn̈j lum 'a Ecrón masnto tzc'och lum 'a chon̈b' Gat, c'uxn 'ix yijcan pax 'ec' eb' israel chi lu'um. 'Ix 'och pax junc'ojlal 'a scal eb' israel yet' eb' amorreo.

¹⁵ A Samuel 'ix yac' yajlil 'a yib'n̈ eb' yit chon̈ab', masnto xchami.

¹⁶ 'A junjn ab'il, tzxitc' sb'oyaj eb' 'anma chi 'a Betel, 'a Gilgal yet' 'a Mizpa. 'Ixta tzyutj sb'onyaj eb' 'anma chi 'a jun tzo'n̈ lugar cha.

¹⁷ Tzlajw cha, tzmeltzj 'a chon̈b' Ramá, yujto ata 'ay yatut. A pax ta 'ay sdespacho yic tzb'onyaj eb' yit chon̈ab'. Ata sb'o pax jun yet'l xajmb'al yic Jehová.