A Ch'an̈ B'ab'el Libro Samuel 6 - Chuj San Sebastian Bible

Ya'jnac meltzjoc eb' filisteo*r* te scaxail trato

¹ A te scaxail strato Jehová, uque 'uj 'ix 'ec' te 'a scal eb' filisteo cha.

² Xlajw cha, 'ix sc'anb'n eb' filisteo chi 'a eb' ya'mal 'och sti eb' 'a sdiosal, yet' 'a eb' jeln snan 'el junc tas, xyaln eb' 'ixtc 'a eb': —¿Tas wal tzcutjec te scaxail strato Jehová? Alc 'ayn̈ on̈ tas tz'at cutj ca'n can pax te 'a yet'l on̈, xchi eb'.

³ —Toto tzeya'x meltzjoc te scaxail strato sDiosal Israel cha, man̈ eya'x meltzjoc te sch'ocoj, palta yowlal cab' 'ay tas tzeyac' stojnb'ilc e mul chi 'a 'a. Toto 'ixta', 'oj b'oxc e c'ojol, ax eyojcan 'eli, tas wal yuj xya'ch yailal 'a quib'n̈ec, xchi eb' ya'mal 'och sti eb' cha.

⁴ —¿Tas wal wach' ca'n stojloc qui mul cha? xchi eb' 'anma cha. 'Ix yaln eb' ya'mal 'och sti eb' chi 'ixtic: —A tzyal sb'isl eb' syajlil eb' filisteo tic, 'ixta jun tzo'n̈ siylab' chi tzeyac'a, junjn 'a junjn eb', o'e q'uen oro tzeyac'a, 'icha wal yilx junc malel yab'il. Tzeya'n o'e'oc pax q'uen oro 'icha yilx no ch'o'ow, yujto an̈ec tic yet' eb' qui yajlil 'a qui cal, to tzon̈ 'ixtx yuj jun tzo'n̈ yailal cha.

⁵ Yuj cha, b'oc yechl jun tzo'n̈ malel yab'il cha, tze b'on pax yechl no ch'ow tz'ixtn 'el sat qui lu'um, tzeyi'n chan̈ sb'i sDiosal Israel. Lemb'il tz'och wan qui yailal yu'uj, yet' 'a eb' qui diosal. Comnoc tz'och pax wan yixtx sat qui lumec.

⁶ Man̈ tzatzc tzeyutj e nab'en, 'icha yutjnac sb'a eb' 'aj Egipto yet' win faraón. 'Ix stzatzb' 'el snab'en eb' masnto 'ix yac' Dios syailal eb', 'ixta to b'i'an 'ix ya'n 'elt win eb' israel cha.

⁷ A ticnec, 'a'c b'o junc te 'ac' caruaje, tzeyi'n cot chawn̈oc no nun wacx 'ay yune', no may 'aj tzq'ue te yugo 'a sjolom. Tzeya'n stoc' e no te'. Man̈ e cha 'och tza'n e no cotc chi yuj snun cha. Tzeyij can meltzjoc e no', tze macn e no 'a yol scolal.

⁸ Tzlajw cha, tzeya'n q'ue te scaxail strato Jehová chi 'a yojl te caruaje cha. Tzeya'n 'ejm eb' q'uen oro chi 'a yojl junc cajon, atn q'uen tzeyac' stojloc e mul. Tzeya'n 'ejm jun cajon chi 'a smoch te caxa cha. Tzlajw cha, tze pechn can 'at e no wacx chi sch'ocj yet' te caruaje cha.

⁹ Si'mb'il wal tzeyila: Toto tojln̈ej s'at e no yet' te caruaje chi 'a sb'el Bet-semes yic tzpax te 'a slu'um, toto 'ixta', a Jehová a 'ixtc tzon̈ 'utnec yet' jun tzo'n̈ yailal tic. Toto ma'ay, tecn man̈oc tz'a'n 'och yailal tic 'a quib'n̈ec, comn yab'il tzon̈ 'ixtnec ama, xchi eb'.

¹⁰ 'Ix syiclni eb' filisteo chi sb'on 'icha x'aj yalx 'a cha. 'Ix yi'n cot eb' chawn̈ no nun wacx 'ay yune'. 'Ix ya'n eb' stoc' e no te caruaje cha. Ax e no cotc cha, 'ix smacn eb' e no 'a yol scolal.

¹¹ Xya'n q'ue ewin te scaxail strato Jehová 'a yol caruaje cha, xya'n pax q'ue eb' te cajon 'aj xyac' 'ejm eb' q'uen oro b'ob'il 'icha yilx no ch'ow cha, yet' jun tzo'n̈ yechl malel cha.

¹² Xlajw cha, sjiyn 'el ewin e no wacx cha, 'ix cot e no 'a sb'el Bet-semes. Xoj yoc' e no' yic tzb'ey e no 'a b'e cha, tojln̈ej scot e no', may 'aj tz'el e no 'a stitc b'e. Ax eb' syajlil eb' filisteo cha, najt tza'n xoj scot eb' yuj e no', masnto xjaw e no 'a smon̈jonal lum Bet-semes cha.

¹³ Ax eb' 'aj lugar cha, 'ay eb' 'ayc' polj trigo 'a jun lum pan̈an, ax xyiln sb'a eb' to wan sjapx te scaxail trato, yuj cha, caw wal stzalj eb'.

^14-15 Ax e no wacx cha, ata xjaw e no yet' te caruaje chi 'a slum jun win tzcuch Josué 'aj Bet-semes. Ata x'och wan e no yet' te caruaje chi 'a stz'ey jun q'uen niwquil q'ue'en. Ax eb' yin̈tl Leví, a eb' x'i'n 'emt scaxail strato Jehová 'a yol caruaje cha. Xyi'n 'emt eb' te cajon 'a 'aj 'ay 'ejm q'uen oro. Xya'n q'ue eb' 'a yib'n̈ q'uen niwquil q'uen cha. Ax eb' 'aj Bet-semes cha, 'ix stzu'n poj eb' te caruaje cha, xya'n tz'a eb' e no wacx chi xajmb'al-l 'a Jehová. Ax 'a jun c'u cha, 'ix laj yac' tz'a eb' jun tzo'n̈ xo xajmb'al.

¹⁶ 'Ix yil own̈ eb' syajlil eb' filisteo chi tas 'ix uji, xlajw cha, 'ix meltzj eb' 'a chon̈b' Ecrón 'a jun c'u cha.

¹⁷ A o'e eb' q'uen oro b'ob'il 'icha yilx malel, yuj ya'n eb' filisteo stojloc smul 'a Jehová, 'ix yac' eb' yuj chon̈b' Asdod, yuj chon̈b' Gaza, yuj chon̈b' Ascalón, yuj chon̈b' Gat yet' yuj chon̈b' Ecrón.

¹⁸ Ax sb'isl q'uen oro b'ob'il 'icha yilx e no ch'ow cha, tzyal yuj sb'isl o'e schon̈b' eb' syajlil eb' filisteo wach' yajch oyn smuroal, yet' pax yaldeail. Ax q'uen niwquil q'uen 'a sat lum slum win Josué 'aj Bet-semes 'aj 'ix q'ue b'achn te scaxail strato Jehová, 'ix 'ochcn q'uen snanb'ilc cot tas 'ix uji.

¹⁹ Palta ax Dios, 'ix smil cham jun tzo'n̈ eb' 'aj Bet-semes cha, yujto say eb' yil tas 'ay 'a yojl te caxa cha. 'Ix cham 70 eb' winc chi yu'uj, a eb' 'anma 'a jun chon̈b' cha, caw wal tz'oc' eb' si'mb'il, yujto niwquil jun chaml chi x'och 'a scal eb' yuj Jehová.

²⁰ Yuj cha, xyaln eb' 'aj Bet-semes chi 'ixtic: ¿Mach wal junc tztac' sc'och 'a yojltac Jehová, atn jun Dios caw 'ay smay? Mach wal 'aj tz'at ca'c can te', yic tz'el te 'a qui tz'eyc tic? xchi eb'.

²¹ 'Ix ya'n 'at eb' 'anma chi schecb' 'a eb' 'aj Quiriat-jearim, 'ix yaln 'at eb' 'ixtic: A eb' filisteo, 'ix wul ya'x can eb' te scaxail strato Jehová, yuj cha, to tzwul eyi'x te', xchi eb'.