A Ch'an̈ B'ab'el Libro Samuel 5 - Chuj San Sebastian Bible

C'ochnc te scaxail strato Dios*r* 'a eb' filisteo

¹ A 'a Eben-ezer ata 'ix yij 'ec' eb' filisteo te scaxail strato Dios, axta xc'och yuj eb' 'a chon̈b' Asdod.

² Xlajw cha, xyi'n 'och eb' 'a yol yatutal jun comn dios tzcuch Dagón, ax wal 'a stz'ey jun comn dios cha, ata 'ix 'at ya'cn 'och eb' te'.

³ Ax 'a junx c'u, 'ix seb' c'och eb' 'aj chon̈b' Asdod 'a 'aj 'ay sdiosal eb' cha, ax xyiln eb', n̈ojn 'ec' Dagón chi stelw 'a yojltac te scaxail strato Jehová cha. 'Ix si'n chan̈ eb', 'ix ya'n pax 'och eb' 'a yet'l 'aj 'ay.

⁴ 'Ixta pax 'a junx c'u 'ix seb' c'ochx eb' yila'. Ax xyiln eb', n̈ojn 'ec' pax Dagón chi stelw 'a yojltac te caxa cha. Ax sjolm Dagón yet' sc'ab', choc' yaj spoj 'a yib'n̈ te smarcoal spuertail yatutal cha, cojxn sniwnal chi pun̈n 'ec' sch'ocoj.

⁵ Yictax cha, yelcn yich to a yic tz'och eb' 'anma 'a yol yet'l Dagón, matz tec' 'ejm eb' yoc 'a yib'n̈ te smarcoal spuertail yatutal sdiosal, jun 'ay 'a chon̈b' Asdod.

⁶ Xlajw cha, 'ix ya'n cot Jehová jun yab'il 'a yib'n̈ eb' 'aj Asdod, yet' pax 'a yib'n̈ smasnil 'anma 'a yol slugar eb' cha. 'Ix laj mal chan̈ sniwnal eb' yuj jun yab'il cha.

⁷ Ax yic xyiln eb' 'anma 'a chon̈b' Asdod cha, to wan laj scham eb', yuj cha, xyaln eb' 'ixtic: A te scaxail strato sDiosal Israel, ma'oj stac' scan te quet'ec, yujto caw wal niwquil qui yailal tzya'chi, tz'ixtx pax 'el qui diosalec yu'uj, xchi eb' 'anma cha.

⁸ Yuj cha, 'ix 'at ya'nc eb' alxoc 'a eb' syajlil eb' filisteo cha, to tzyam sb'a eb' yic tzmol paxtin eb'. 'Ix yaln eb' 'a eb' 'ixtic: —¿Tas wal tzcutjec te scaxail strato sDiosal Israel? xchi eb'. —'Ijec te', tz'at eya'nc can te 'a chon̈b' Gat, xchi eb' yajl chi 'a eb'. Yuj cha, 'ix 'at ya'nc can eb' te 'a jun chon̈b' cha.

⁹ A yic xlajw 'at ya'nc can eb', ax Jehová 'ix 'a'n 'och eb' 'anma chi 'a somc'ojlal. 'Ix laj mal 'elt jun tzo'n̈ yab'il chi 'a eb'. 'Ix 'elt 'a eb' nene 'unin yet' 'a eb' 'ichmtac 'anma'.

¹⁰ Yuj cha, 'ix yi'n eb' filisteo chi te scaxail strato Dios cha, axta x'at ya'x can eb' te 'a chon̈b' Ecrón. Palta ax xyiln eb' 'aj chon̈b' cha, to xc'och te caxa chi ta', 'ix 'el yaw eb' yuj xiwlal, 'ix yaln eb' 'ixtic: 'Ix wul can wal te scaxail strato sDiosal Israel 'a qui calc tic, sec tzon̈ chamc am qui masnil yu'uj, xchi eb'.

¹¹ 'Ix ya'n 'at eb' schecb' 'a eb' syajlil eb' filisteo cha, 'ix yaln eb' 'a eb' 'ixtic: 'Ijec 'el te scaxail strato sDiosal Israel tic 'a qui calec, tz'at eya'nc can pax 'a yet'l 'aj 'ay, sec ma'oj qui chamc qui masnil yu'uj, xchi eb'. Yujto xniwtj jun yab'il chi 'a scal eb' yuj Dios, yuj cha, 'ix xiw chan̈ eb'.

¹² Ax eb' ma'ix cham cha, caw wal ya yaj eb' yuj jun tzo'n̈ yab'il chi tzlaj mal 'elt 'a eb' cha, caw wal tz'el yaw eb' yab'n syail.