A Ch'an̈ B'ab'el Libro Samuel 4 - Chuj San Sebastian Bible

'E'nc te scaxail trato yuj eb' filisteo

¹ A 'a jun tiempoal cha, ata 'ix 'elt eb' israel scol sb'a 'a eb' filisteo, axta xc'och eb' sb'o chan̈ scamplamento 'a sla'nil jun lugar tzcuch Eben-ezer. Ax eb' filisteo cha, ata 'ay scamplamento eb' 'a jun lugar tzcuch Afec.

² 'Ix cot eb' filisteo, 'ix syamn 'och eb' ya'n owl yet' eb' israel. 'Ix 'och wal owl yuj eb' si'mb'il. Ax x'aji, 'ix lajw 'el eb' israel yuj eb', 'aym chan̈e'oc mil eb' xchami.

³ Ax yic xc'och eb' israel chi 'a scamplamento cha, 'ix yaln eb' yichm wincal chon̈b' 'ixtic: ¿Tas wal yuj on̈ ya'c Jehová 'a yol sc'ab' eb' filisteo cha? Coyc 'at qui'c te scaxail strato Jehová 'ayc' 'a Silo, sec 'oj 'at quet'ec 'a owal, ax on̈ scolnec 'a yol sc'ab' eb' 'ajc'ojl cha, xchi eb'.

⁴ Yuj cha, 'ix ya'n 'at eb' chon̈b' chi nan̈l eb' israel 'a Silo. 'Ix 'at yi'nc cot eb' te scaxail strato Jehová tztac' yuj smasnil, yujto ata sch'ox sb'a stzictznil 'a snan̈l yechl chawn̈ querubín 'ay 'a yib'n̈ te caxa cha. Ax chawn̈ eb' yunnal Elí, tza'n 'och eb' yuj te caxa cha, atn win Ofni yet' win Finees.

⁵ A yic xc'och eb' yet' te caxa chi 'a camplamento cha, 'ix q'ue b'uynjoc smasnil eb' soldado israel chi ya'n 'el yaw yuj tzaljc'ojlal, caw 'ix ta'w lum lum yuj yaw eb' cha.

⁶ A yic xyab'n eb' filisteo chi jun tzo'n̈ 'aw yic tzaljc'ojlal cha, 'ix laj yalnc eb' 'a junjn 'ixtic: ¿Tas laj wal yuj 'ay jun tzo'n̈ 'aw chi 'a scamplamento ewin hebreo cha? xchi eb'. Ax xyab'n eb' to a te scaxail strato Jehová xc'och 'a camplamento cha,

⁷ caw 'ix xiw chan̈ eb'. 'Ix laj yalnc eb' 'a 'a: A Dios xjaw 'a scamplamento eb' cha, 'oltac wal 'oj cajec, yujto mant 'a 'aj 'ixta tzon̈ 'ajc jun 'ejmoc.

⁸ 'Oltacn̈ec wali. ¿Mach wal 'oj qui colnec 'a yol sc'ab' jun tzo'n̈ dios 'ay yip? Atn jun tzo'n̈ dios satjnac 'el eb' 'aj Egipto 'a lum cusltac lu'um yet' jun tzo'n̈ yailal.

⁹ Caw te'n tzcutjec qui b'a an̈ soldado filisteo on̈ tic yic tzon̈ 'ochc 'a owl yet' eb' hebreo cha, sec matz on̈ 'ochc can schecb'oc eb', 'icha x'aj eb' cujec, xchi eb'.

¹⁰ Xlajw cha, 'ix 'och eb' filisteo chi 'a owl yet' eb' israel cha. Ax x'aji, 'ix lajw 'el eb' israel, 'ix 'at eb' 'elc 'a yatut. Caw wal niwn jun chaml chi 'ix 'ochi, 'ay lajn̈schawinc mil soldado israel 'ix chami.

A Schamlil win Elí

¹¹ 'Ix yi'n can 'ec' eb' filisteo chi te scaxail strato Dios, ax chawn̈ eb' yunnal Elí, 'ix chamcn eb' yuj owl cha, atn win Ofni yet' win Finees.

¹² 'Ay jun win soldado yic eb' yin̈tl Benjamín 'ix yac' ganar scot 'elc 'a scal owl cha. Caw wal carela xcoti, 'ix jaw 'a jun c'u chi 'a Silo. Caw jatquixtac x'aj spichul, 'ix ya'n q'ue pococ 'a sjolom, yic tzch'oxn 'el scusc'ojlal.

¹³ Ax yic xjaw winac, wocn 'ejm Elí 'a jun sc'an̈tz 'a sti b'e tz'och 'a yol chon̈b' cha, yujto caw wal tacnc sc'ojl yuj te scaxail strato Dios. Ax win soldado cha, 'ix 'och win 'a yol chon̈b' cha, 'ix yaln jun 'ab'x chi 'a eb' 'anma 'ayc' ta'. Cojn xyab'n eb' jun 'ab'x cha, 'ix q'ue somnjoc eb' yel yaw.

¹⁴ A yic xyab'n Elí jun tzo'n̈ 'aw cha, 'ix yaln 'ixtic: —¿Tas yaj jun tzo'n̈ 'anma tzq'ue b'uynjoc yel yaw cha? xchi. Yajn̈ej xwul yalnc win soldado chi yab' jun 'ab'x cha.

¹⁵ Ax win Elí cha, 'ayx 98 ab'il sq'uinal, 'ochnc xo pax 'a sat, man̈xtzac uj xon yilni.

¹⁶ 'Ix yaln jun winc chi 'a 'ixtic: —At wal in jaw 'a owl tic, 'ix wac' ganar in cot 'elc 'a scal owl cha, xchi. —¿Tas wal 'ix uj jun mam? xchi.

¹⁷ 'Ix ta'w win alm 'ab'x chi 'ixtc 'a 'a: 'Ix cot eb' quit israelal 'elc 'a eb' filisteo. Til wal 'anma xchami. 'Ix cham pax eb' onnal schawn̈il, atn win Ofni yet' win Finees. An̈jtona 'ix 'e'cn te scaxail strato Dios yuj eb' 'ajc'ojl cha, xchi.

¹⁸ A yic xyab'n win Elí yuj te scaxail strato Dios cha, 'ix 'at pa'njoc win 'a spatquil 'a sti spuertail chon̈b' cha. 'Ix stecn c'uychjoc sjaj yujto caw 'al sniwnal. Yuj cha, 'ix chami, yujto caw 'ichm winc xo. Chawinc ab'il 'ix yac' yajlil 'a yib'n̈ chon̈b' Israel.

A schamlil 'ix yistzil Finees

¹⁹ Ax 'ix yalb' win Elí cha, atn 'ix yistzil win Finees, jab'xoj yalj yune 'ix. A yic xyab'n 'ix to x'ec' te scaxail strato Dios yuj eb' filisteo, xcham win yichmil 'ix, xcham pax win yalb' 'ix cha, yujn̈ej cha, xcot syal sc'ojl 'ix. 'Ix 'alj yune 'ix cha.

²⁰ A yic xyiln eb' 'ix 'ix tz'iln sb'ox sc'ojl 'ix to wan scham 'ix, xyaln eb' 'ix 'a 'ix 'ixtic: Man̈ ach xiwoc, yujto winc 'unn jun one tic, xchi eb' 'ix. Palta ma'ix ta'w xon 'ix, 'icha to man̈xtzac yab' 'ix.

²¹ Ax jun 'unn cha, 'ix ya'n 'ix sb'ic Icabod. Xyaln 'ix 'ixtic: A ticnec 'ix 'ijx 'ec' sb'inab'ilal chon̈b' Israel, yujto 'ix 'ec' te scaxail strato Dios, xchi 'ix, yujto xcham win yalb' 'ix yet' win yichmil 'ix cha.

²² Yuj cha, 'ix yalni chajtlto x'ijx 'ec' sb'inab'ilal chon̈b' Israel, yujto x'ijx 'ec' te scaxail trato cha.