A Ch'an̈ B'ab'el Libro Samuel 3 - Chuj San Sebastian Bible

'Awtb'il Samuel yuj Jehová

¹ A quelm Samuel an̈ja ya'n servil Jehová 'a yaln̈ schecnb'il win Elí. A 'a yic jun tiempoal cha, man̈x 'a mach 'aj tzcomn paxtin Jehová; man̈x 'a 'aj tzcomn ch'oxj sb'a 'a 'icha waychil.

² Palta ax x'aji, 'ix syam 'och sjuw yol sat Elí cha. Man̈xtzac stac' yilni. 'Ay jun 'ac'wal waync 'a yol scuarto.

³ Ax Samuel c'otn 'ec' sway 'a yol scajnub' Jehová 'a stz'ey 'aj 'ay te scaxail strato Dios. A yic mantzac sacb'i, 'ayt 'och sc'a'l jun tzo'n̈ cantil,

⁴ 'ix 'awtx Samuel yuj Jehová 'ixtic: —¡Samuel! xchi. —¡Waj 'a tic! xchi winac.

⁵ Wal 'a yajn̈ej, x'at win mu'c 'a 'aj 'ayc' Elí cha, 'ix yaln 'a 'ixtic: —Tic tzin jawi, ¿tas tzal 'ayin? xchi winac. —May in tzin 'awj 'ayach, 'ixc wayoc, xchi Elí. Yuj cha, 'ix 'atx Samuel wayoc.

⁶ 'Ix 'awj pax Jehová jun 'ejm xo 'ixtic: —¡Samuel! xchi. 'Ix q'uex wan win 'unn cha, 'ix 'atx 'a 'aj 'ayc' Elí, xyaln 'ixtic: —Tic tzin jawi, ¿tas tzal 'ayin? xchi. —Ach 'un, may ach tzach wawtej, 'ixc wayoc, xchi.

⁷ Mant 'ojcab'ilc Jehová yuj Samuel, yujto mant 'a 'aj tzpaxtin jun 'ejmoc yet'oc.

⁸ Palta 'ix 'awj pax Jehová 'a yox'ejmal 'a 'a, 'ix q'ue wa'an, 'ix 'atx 'a 'aj 'ayc' Elí cha, 'ix yaln 'ixtic: —Tic tzin jawi, ¿tas tzal 'ayin? xchi. 'Ixta to b'i'an, 'ix nachj 'el yuj Elí, to a Jehová tz'awtn win quelm 'unn cha.

⁹ Yuj cha 'ix yaln 'ixtc 'a Samuel: —'Ixc 'a a waynub'. Toto tz'awj pax Jehová 'ayach, tzach ta'w 'a 'ixtic: Paxtinan̈ Mamin Jehová, tic tzin maclj an a checb' in tic, al tas tzal 'ayin, xa chi 'a 'a, xchi Elí. Xlajw cha, 'ix 'atx Samuel 'a yet'l cha.

¹⁰ Ax Jehová 'ix c'ochx 'a Samuel, 'ix 'och wan ta', 'ix yaln 'icha 'ix yutj yaln 'a yic b'ab'el: ¡Samuel! ¡Samuel! xchi. —Paxtinan̈ Mamin, tic tzin maclj an a checb' in tic, al tas tzal 'ayin, xchi Samuel cha.

¹¹ 'Ix yaln Jehová 'ixtc 'a 'a: —'Ay wal jun tas 'oj in b'o 'a scal eb' 'anma 'a chon̈b' Israel tic, a eb' 'oj 'ab'noc, 'oj chiwjoc chan̈ schicn eb' yab'ni.

¹² A 'a jun c'u cha, c'uxn 'oj wac' 'el'choc smasnil tas 'ix wal 'a yib'n̈ eb' yunnal Elí.

¹³ Tox 'ix wal yab'i', to 'oj wac' syailal eb' yin̈tl cha, yujto yojc xo tas smul eb' yunnal chi 'ix 'ochi; in spatquiljcan 'el eb' an Dios in tic, palta matz tenx 'och wan eb' yu'uj.

¹⁴ Yuj wal cha, 'ix wa'n in ti', to a eb' yin̈tl Elí, may xon wal b'a'n̈ tztup smul eb' chi yuj junc no xajmb'al mto yuj nan̈loc ofrenda tzyac' eb', xchi Dios.

¹⁵ Xlajw cha, 'ix cann̈j Samuel 'a yet'l cha, masnto 'ix sacb'eli. Ax 'a yic sacb'el cha, sjacn win spuertail yatut Jehová. Caw xiw win yaln jun tas 'ix yab' cha.

¹⁶ Palta 'ix yawtj 'at Elí 'a stz'ey, 'ix yaln 'a 'ixtic: —Samuel, xchi. —Waj 'a tic, xchi winac.

¹⁷ 'Ix sc'anb'n Elí chi 'ixtc 'a 'a: —¿Tas 'ix yal Jehová 'aych q'uiq'ui? Tzin tew 'ayach, may cab' tas tza c'ub'j 'el 'ayin. Ya' cab' Dios a yailal si'mb'il, toto matz al smasnil tas xyal 'aych cha, xchi.

¹⁸ 'Ix yaln Samuel smasnil tas 'ix alx chi 'a 'a, may tas 'ix sc'ub'j can 'eli. Yuj cha, xyaln Elí 'ixtc 'a 'a: —Atn ton wal Jehová 'ix alni, sb'o cab' 'icha tas tznib'ej, xchi.

¹⁹ 'Ix q'uib' Samuel, ax Jehová caw xcolwjn̈ej yet'oc, yuj cha, may wal junc spaxti chi ma'ix yac' 'el'choc.

²⁰ Smasnil eb' 'ay 'a yol smacb'en israel, eb' 'ay 'a Dan masnto tzc'och 'a Beerseba, schaj eb' yab'i', to a Samuel caw yel schecb' Jehová.

²¹ 'Ix sch'oxn̈j sb'a Jehová 'a win quelm chi 'a Silo, yujto ata xpaxtin yet'oc; ax win Samuel chi 'ix aln jun tzo'n̈ paxti chi 'a eb' yit chon̈b' chi smasnil.