A Ch'an̈ B'ab'el Libro Samuel 28 - Chuj San Sebastian Bible

¹ A 'a yic jun tiempoal cha, 'ix yac' eb' filisteo syam sb'a eb' soldado, yic tzya'n eb' owl yet' eb' israel. 'Ix yaln win Aquis 'a David 'ixtic: —Ach tic, yowlal tzach 'at wet' 'a owal, yet' eb' soldado ajun et'oc, xchi.

² —Inye. A ticnec mamin rey, 'oj wac' ojcoc 'eli, tastc tztac' wuj an a checb' in tic, xchi David cha. —Toto 'ixta jun, ach tzach wa'ch in tan̈malc 'a jun 'ejmn̈ej, xchi win Aquis cha.

A Saúl yet' 'ix tznan 'el paxti'

³ A yic scham Samuel, smasnil eb' israel 'o'n̈c eb' yu'uj, smucn eb' 'a schon̈ab' atn 'a Ramá. Ax Saúl yajn̈ej spechn 'el eb' cob' jeln snan 'el junc paxti', yet' eb' tzcob' yal to tzc'umj spixn eb' chamnc 'anma 'a scal chon̈b' Israel.

⁴ Ax x'aji 'ix syam sb'a eb' filisteo, 'ix 'at eb' sb'o chan̈ scamplamento 'a Sunem. An̈jtona pax Saúl, 'ix ya'n syam sb'a smasnil eb' soldado, 'ix sb'o pax scamplamento 'a Gilboa.

⁵ A yic 'ix yiln 'at Saúl to caw 'ay yip eb' filisteo, caw 'ix xiwi, 'ix somchj 'el snab'en.

⁶ Yuj cha, 'ix scanb'n 'a Jehová, palta ma'ix ta'w xon 'a waychil 'a 'a; ma'ix ta'w xon 'a eb' yalmal 'el spaxti', yet' 'a eb' ya'mal och sti eb' 'anma 'a Dios.

⁷ Yuj cha, 'ix yaln Saúl 'a eb' schecb' 'ixtic: —Sayc junc 'ix 'ix to tzc'umn spixn eb' chamnac, sec wach' a 'a tzin 'at in c'anb'c in nab'en, xchi winac. 'Ix ta'w eb' schecb' 'a 'a, xyaln eb' 'ixtic: —'Ay jun 'ix tztac' yuj 'a Endor, xchi eb'.

⁸ 'Ix sjeln 'el Saúl spichl yic sreyal, sec matz nachj 'el yuj eb' 'anma', mach winac. 'Ix 'at chawn̈ xo winc yet'oc, yic tz'at yilnc jun 'ix chi 'a 'ac'wal. Xc'och eb' 'a 'ix, 'ix yaln win 'ixtic: —Tzin tew 'ayach, tzin nib'j tzawtj spixn jun mach 'oj wal tic, xchi.

⁹ —Ach tic ojtac tas 'ix 'aj eb' jeln snan 'el junc paxti', yet' eb' tzc'umn spixn eb' chamnac, to 'ix pechx 'el eb' 'a yol qui chon̈b'ec yuj Saúl. ¿Tas yuj tza say tas tzin 'aj wajx ganar yic tzin milx chamoc? xchi jun 'ix cha.

¹⁰ —Tzwac' in ti 'a yojltac Jehová, to may 'oj aj yuj jun tic, xchi Saúl 'a 'ix.

¹¹ —¿Mach pax jun tza nib'j tzwawtj chi ala'? xchi jun 'ix cha. —Atn Samuel tzawtej, xchi Saúl.

¹² A yic jun rato cha, 'ix yiln 'ix win Samuel. Caw wal 'ip x'el yaw yuj xiwlal, 'ix yaln 'ix 'ixtc 'a Saúl:

¹³ —¿Tas yuj tzin extj paxti'? Ach tic 'in ach Saúl ach, xchi jun 'ix chi 'a winac. —Man̈ ach xiwoc. ¿Tas jun 'ix 'el cha? xchi Saúl 'a 'ix. —Atn jun spixn chamnc 'anma xwil sq'uel 'a yol lu'um, xchi 'ix.

¹⁴ —¿Tas yilx jun? xchi winac. —'Ay jun winc caw wal 'ichm xo, 'aych jun sjucn pichl yu'uj, xchi 'ix. Atta 'ix nachj 'el yuj Saúl, chajtlto a Samuel 'ix ch'ox sb'a. Yuj cha, 'ix 'em n̈ojnjoc, squiln 'ejm snan̈l sat 'a sat lu'um.

¹⁵ 'Ix yaln Samuel 'a Saúl chi 'ixtic: —¿Tas yuj tzin extej, tzin awtn coti? xchi. —Xiwc'ojlal waji, yujto tzyac' eb' filisteo owl wet'oc, 'ix yij 'el sb'a Dios 'a in tz'ey. Man̈xtoc xta'w 'a tas tzwala, man̈xtzac ta'w 'a eb' schecab', yic tzin c'anb'n 'a eb', yet' pax 'a waychil. Yuj cha, tzach wawtni, yic tzaln 'ayin, tas yowlal 'oj in b'o', xchi Saúl 'a Samuel.

¹⁶ Xlajw cha, xyaln Samuel chi 'a 'ixtic: —¿Tas yuj tzat a c'anb'j 'ayin, toto a Jehová tox 'ix yij 'el sb'a 'a a tz'ey? A ticnec 'ajc'ojl xo yajch 'ayach.

¹⁷ Wan yel'ch tas 'ix yac' wal 'ayach. Yujto tox 'ix yij 'ec' opiso 'a yol a c'ab', ax 'a yol sc'ab' David, win junn̈j 'e'nc ach yet'oc, ata 'oj canoc.

¹⁸ Yujto ma'ix a yiclj schecnb'il Jehová, ma'ix yal a c'ojl a satn 'el eb' amalecita, yic 'ix yaln 'ayach. Yuj cha, tox ach can yuj ticnec.

¹⁹ A Jehová 'oj ach ya'ch 'a yol sc'ab' eb' filisteo yet' eb' quit chon̈ab', ax q'uic'an tzach jaw yet' eb' onnal wet' 'a scal eb' chamnc tic. Ax ya'n pax 'och Jehová eb' soldado israel 'a yol sc'ab' eb' filisteo cha, xchi Samuel cha.

²⁰ A yic 'ix yab'n Saúl jun cha, yajn̈j cha 'ix telwi, 'ix can t'ocn 'a sat lu'um. Caw 'ix xiw yuj tas 'ix yal Samuel 'a 'a. 'Ix 'el yip, yujto may jac tas sc'ux 'a jun c'u cha, yet' 'a jun 'ac'wl yic xb'eyi.

²¹ A yic xyiln jun 'ix chi win Saúl cha, to somchjnacx 'el snab'en, 'ix yaln 'ix 'a win 'ixtic: An a checb' in tic, xin yiclj smasnil tas xala, wach'xam 'ay smay in cham yuj tas xin b'o tic.

²² Tzin tew 'ayach, 'ab' tas 'oj wala': 'Oj ach wac' wa'oc, sec 'oj 'ochx ep, 'ixta to b'i'an ax a 'atxi, xchi 'ix 'a 'a.

²³ A Saúl ma'ix yal sc'ojl xwa'i, ax eb' schecab', yet' jun 'ix cha, 'ix yac' pural eb' swa'i. 'Ix schan sc'ojl Saúl cha. 'Ix q'ue wa'an, xlajw cha, 'ix 'em chotn 'a sti jun ch'at.

²⁴ A jun 'ix cha, yajn̈ej smiln cham jun no quelm wacx 'ayc' 'a yatut to caw wal b'aq'uech, sb'on pax 'ix 'ixm pan to may yich.

²⁵ 'Ix yi'n cot 'a Saúl, yet' 'a eb' schecb' ajun yet'oc. A yic xlajw swa eb', 'ix yaln can sb'a eb' 'a jun 'ix cha, 'ix pax eb' 'a 'ac'wl cha.