A Ch'an̈ B'ab'el Libro Samuel 27 - Chuj San Sebastian Bible

Xit'nc David 'a scal eb' filisteo

¹ Palta a David 'ix sna 'ixtic: 'Ay am wal b'a'n̈ 'oj in smil cham Saúl, yuj cha, a tas 'oj wutc ticnec, to 'oj in 'atcn 'a scal eb' filisteo, sec wach' man̈xtzac in sayx 'ec' yu'uj, 'ixta 'oj waj in colchj 'a yol sc'ab', xchi.

² Yuj cha, 'ix 'at yet' waque ciente eb' soldado ajun yet'oc, yic tz'at ya'nc 'och sb'a eb' schecb'oc sreyl Gat, atn win Aquis yunnal Maoc.

³ 'Ix can cajn eb' yet' win Aquis 'a Gat cha, junjn eb' yet' yistzil yet' yunnal. A David cha, 'ix yij 'at eb' yistzil schawn̈il yet'oc, atn 'ix Ahinoam 'aj Jezreel, yet' 'ix Abigail yistzil can win Nabal, win 'aj Carmel.

⁴ A yic xyab'n Saúl speclal to a David tox 'ix 'at 'elc 'a Gat, yuj cha, 'ix yactn win spechn b'eyc'oc.

⁵ 'Ix yaln David 'a win Aquis 'ixtic: —Tzin c'an 'aych mamin rey, comnoc tz'el 'a a c'ojol, to tzin a chaj 'at cajn 'a junc chon̈b' 'a yol a nacion̈, yujto an tic man̈ smojc tzin can cajn et' 'a yol a chon̈b' tic, xchi David.

⁶ A 'a jun c'u cha, 'ix yac' win Aquis jun chon̈b' Siclag sb'i 'a David. Yuj cha, a jun chon̈b' cha, yicn̈ej eb' sreyl Judá yaji.

⁷ Jun ab'il yet' chan̈e xo 'uj 'ix 'ec' cajn David 'a scal eb' filisteo cha.

⁸ A eb' 'aj Gezur, eb' 'aj Guezer, yet' eb' amalecita caw niwn xo tiempo sc'och cajn eb' 'a jun lugar 'a stojlal Shur masnto 'a Egipto. Ax David yet' eb' soldado ajun yet'oc, jab'jw scal 'ix 'at ya'nc win owl 'a jun tzo'n̈ chon̈b' cha.

⁹ A yic xya'n eb' owl cha, 'ix smiln cham eb' smasnil eb' winac yet' eb' 'ix 'ix, man̈x 'a junc eb' xcani. 'Ix yi'n pax 'at eb' no calnelu, no wacax, no b'uru, yet' no cameyo, yet' pax pichul. Xlajw cha, 'ix meltzj pax cot eb' 'a win Aquis.

¹⁰ A yic tzc'anb'n Aquis junjn 'ejm 'ixtc 'a David: ¿Tas chon̈b'al xit' 'ac' lajwc ticnec? xchi. Atn 'a stojlal sur yic Judá, mto 'a stojlal sur yic Jerameel, mto 'a stojlal sur yic slum eb' ceneo, xchi David cha.

¹¹ Man̈x 'a junc winac, man̈x 'a pax junc 'ix xcan 'a spitznal yuj David, sec man̈x 'a mach tz'at alnoc 'a chon̈b' Gat, tas 'ix 'el sb'oni. A 'a yol jun tiempoal yic cajn 'ec' 'a slum eb' filisteo cha, an̈j chi sb'o'o.

¹² 'Ix ya'ch win Aquis David yipc sc'ojol, 'ix snan win 'ixtic: A eb' yit israelal, tox x'och eb' 'ajc'ojlal 'a 'a, yuj cha, caw 'oj cann̈j in yac' servil, xchi winac.