A Ch'an̈ B'ab'el Libro Samuel 25 - Chuj San Sebastian Bible

Schamlil Samuel

¹ 'Ix cham win Samuel, yuj cha, syamn sb'a smasnil eb' yit israelal, caw 'ix 'oc' eb' yu'uj. Ata smuc eb' 'a 'aj 'ay yatut 'a Ramá. Atn 'a jun tiempoal cha, 'ix 'atcn David 'a lum cusltac lum 'a yol yic Parán.

A David yet' 'ix Abigail

^2-3 A 'a yol yic Maón, ata 'ay jun winc tzcuch Nabal, yin̈tl can Caleb; caw wal rico si'mb'il, 'oxe mil scalnelu, jun mil schiwo. 'Ay slum 'a sla'nil chon̈b' yic Carmel, ata tzjoxl scalnelu. Caw yel xo tu snab'en. Abigail sb'i yistzil, caw wach' yilx 'ix, caw 'ay snab'en 'ix.

⁴ A yic 'ayc' David 'a lum cusltac lu'um, 'ix yab'n speclal to a Nabal cha, 'ayc' joxj calnelu 'a Carmel.

⁵ Yuj cha, 'ix schecn 'at lajn̈wan̈ eb' winc 'ayc' yet'oc yic tz'at 'ajxc stzatzl sc'ojl Nabal chi yu'uj, 'ix yaln 'ixtc 'a eb':

⁶ Tzeyal 'a win 'ixtic: Junc'ojlal cab' aji, yet' smasnil onnal yet' pax smasnil tastc 'ay 'ayach.

⁷ 'Ix cab' speclal to 'aych 'ec' joxj calnelu 'a tic, 'in ojc paxi, to a eb' a 'ilm calnelu, 'ayn̈j 'ec' eb' quet' 'a Carmel tic on̈, caw may tzcutj eb' on̈, may pax tas tzquij 'ec' 'a eb' on̈.

⁸ Tztac' tza c'anb'j jun tzo'n̈ tic 'a eb' a checb' cha, 'oj yal eb' 'ayach chajtlto yel. Sc'ul wal a nan a q'uin̈ on̈ jaw on̈, yuj cha, tztew David 'ayach, to tzon̈ 'a chaj 'a tzaljc'ojlal. Tza'n tastc 'ay 'a yol a c'ab' 'ayn̈ on̈, yet' 'a jun a wach'c'ojl cha, xe chi 'a 'a, xchi David.

⁹ A yic 'ix c'och eb' 'a Nabal cha, 'ix yaln eb' smasnil tas 'ix yalb't David; xlajw cha, 'ix stan̈wni eb' ya'n win spac.

¹⁰ 'Ix ya'n win spac schecnb'il eb', 'ix yaln 'ixtic: —¿Mach cob' jun David cha? ¿mach jun yunnal Isaí cha? A ticnec til wal 'anma tz'elc' 'a syajlil.

¹¹ ¿Tom tztac' tzin comn 'a'j tas tzc'ux eb' in joxm calnelu tic, yet' tas tzyu'j eb', yet' schib'j eb' 'a eb' 'anma man̈ wojcoc 'aj tzcoti? xchi winac.

¹² Ax eb' winc cha, 'ix meltzj eb' 'a sb'e jun 'ejm xo. A yic xc'och eb' 'a David cha, c'uxn xyal eb' smasnil tas 'ix alx 'a eb'.

¹³ Yuj cha, 'ix yaln David 'ixtc 'a eb' winc ajun yet'oc: 'Ijc eyespada e masnil, xchi. Yuj cha, xya'n 'och ewin yespada 'a snan̈l smasnil, 'ix ya'n 'och pax David yico'. Chan̈e ciente eb' x'och tza'n yu'uj. Ax chab' ciente eb' xcancn stan̈wc syamc'ab' eb'.

¹⁴ Palta 'ay jun schecb' win Nabal x'at alnc 'a 'ix Abigail yistzil Nabal cha, 'ix yaln 'a 'ix 'ixtic: —Ach Abigail, at c'och 'a lum cusltac lu'um, ata 'ix schec cot David jun tzo'n̈ eb' schecab', yic tzwul 'ajxc stzatzl sc'ojl win qui patron̈ yuj eb' on̈, palta caw tu 'ix yutj win yaln 'a eb'.

¹⁵ A jun tzo'n̈ winc cha, caw wach' xyutj eb' snab'en 'ayn̈ on̈, yic on̈ 'ec' 'ilj calnelu 'a 'aj 'ayc' eb' cha. Caw may 'aj on̈ yixtj eb' on̈, may xon jac tas xyij 'ec' eb' 'ayn̈ on̈.

¹⁶ A yic eb' sc'ual yac'wlil on̈ stan̈wni eb' ta 'on̈, ya' sb'a tzon̈ 'ilw calnelu 'a junjn c'u on̈.

¹⁷ Palta a win echmil, caw tu snab'en winac, caw matz tac' qui paxtin yet'oc. Yuj cha, na ach tic, tzel tas tzotej, wal yel 'ay tas 'oj jawc 'a quib'n̈ eyet'oc, xchi.

¹⁸ Yajn̈j wal cha, xya'n 'ix Abigail chi 'ijxoc cot chab' ciente 'ixm pan, yet' chab' tz'um 'aj 'ay 'ejm yal uva, own̈ no b'olb'il calnelu, o'e 'echtab' 'ixm sat trigo c'an yaj sb'olxi, jun ciente c'ojlab' tacn̈ uva, yet' pax chab' ciente pachn̈ te tacn̈ higo. Yajn̈ej xya'n 'ajxoc 'och 'a yib'n̈ jun tzo'n̈ no b'uru,

¹⁹ 'ix yaln 'ix 'ixtc 'a eb' schecb' pechjnac no b'uru cha: —B'ab'ljan̈c ax tic, tza'nto 'oj in 'at eyu'uj, xchi 'ix. Ma'ix yal xon 'ix jun tzo'n̈ tic 'a yichmil atn win Nabal.

²⁰ 'Ix q'ue 'ix Abigail 'a yib'n̈ jun no b'uru, c'ultac xb'ey 'ejm 'ix 'a jun lum witz. Ax xyiln 'ix to wan sjaw David 'a yojltac yet' eb' winc ajun yet'oc, yuj cha, x'at 'ix 'at scha eb'.

²¹ Ax David yaljnac 'ixtic: Wal yel nab'an̈ej xqui tan̈wj tastc 'ay 'a jun win Nabal chi 'a lum cusltac lu'um yic may mach tzi'n 'ec' tas 'a 'a; palta 'ix quilc ticnec to maysch'olnil xyutj spactzan qui wach'c'ojlal.

²² A cab' Dios tz'a'n 'och in yailal, toto pitznto Nabal mto junc xo winc 'a scal eb' yican wuj yab'n 'ixtc q'uic'an, xchi.

²³ Palta ax yic schan sb'a 'ix Abigail yet' David cha, 'ix 'emt 'ix 'a yib'n̈ no b'uru, 'ix 'em n̈ojn 'ix, masnto squil 'ejm 'ix snan̈l sat 'a sat lu'um, yuj sch'oxn 'eli, to niwn yel'ch David chi 'a 'ix.

²⁴ 'Ix c'och 'ix 'a yojltac, 'ix yaln 'ixtic: —Ach wajlil, a smul win wichmil cha, can cab' 'a wib'an̈. Tzin tew 'ayach, to tzac' 'in permiso in paxtin jac et'oc, tzab'n tas 'oj wal an a checb' in tic.

²⁵ Man̈ a'ch win Nabal 'a a c'ojol; a jun winc cha, quistal. May snab'en, yuj cha, 'ixta sb'i. Cojnn̈ej maysch'olnil tzyala. An xo a checb' in tic, ma'ix wil xon eb' a checb' xa checa.

²⁶ A ticnec ach wajlil, a Jehová ach tenn 'och wa'an, yic to tzwul a mil cham eb' 'anma', yuj a'n spac stu nab'enal eb' 'ayach. 'El cab' 'a sc'ojl Jehová, to a eb' 'ajc'ojl yajch 'ayach, yet' eb' tznib'n tzach 'ixtni, 'ixta cab' pax tz'aj scotcn 'a yib'n̈ eb', 'icha tz'aj scot 'a yib'n̈ Nabal tic.

²⁷ Ax ticnec jun, tzin tew 'ayach to tza chaj jab' in siylab' wet' 'aych tic, tza pojn 'ec' 'a scal eb' a checb' ajun 'et' tic.

²⁸ Tza'n niwnc'ojlal 'a wib'n̈ yuj in paltail. Wal yel a Jehová 'oj 'ochn̈j et' 'a opiso, yet' eb' en̈til, 'ilt nab'an, to yuj Jehová tza'n owl tic 'a smasnil tiempo, may cab' b'a'n̈ tu tas tza b'o'o.

²⁹ Wach'xam 'ay mach tzach pechni mto tznib'n tzach miln chamoc, may 'oj e'ni, a 'a yol sc'ab' Jehová qui Diosalec 'aych 'eq'ui. Ax eb' 'ajc'ojl yajch 'ayach, 'oj a julnc 'el eb' 'icha junc mach tzjul-l junc q'uen yet' mejech'.

³⁰ Yuj cha, a yic 'oj sb'onc Jehová smasnil wach'l 'ix yal o'oj, to ach 'oj och reyl 'a qui chon̈ab',

³¹ ma'oj cus a c'ojol, yujto 'ijn tza mil cham eb' may smul mto yujto ach wal caw tza pac 'a b'a 'a eb' 'ajc'ojl yajch 'ayach. Yuj cha, a yic 'oj ach yi'nc chan̈ Jehová yet' opiso, tzin a na cot an a checb' in tic, xchi 'ix.

³² 'Ix ta'w David 'ixtc 'a 'ix: —Alx cab' wach' paxti 'a Jehová qui Diosalec, yujto a ach checn coti yic tzwul in a chanoc tic.

³³ Alx cab' wach' paxti 'a eb'an̈, yuj swach'l a nab'en, yujto ach wal tzin a tench wa'an, yic matz in mil cham eb' 'anma', yic tzwa'n in pac 'a eb'.

³⁴ A ticnec tzwac' in ti 'aych 'a yojltac Jehová qui Diosalec, to a 'in tenn 'och wa'an, yic tzwa'n in tu nab'enal 'ayach, toc wal ma'ix a col ep a cot wul in a cha', a q'uic'an man̈x pitznoc win Nabal, yet' pax smasnil eb' winc yicanto sb'a yet'oc yet' eb' schecab', xchi David 'a 'ix.

³⁵ Xlajw cha, 'ix chan 'ec' David smasnil tas yet' 'ix cha, xyaln 'ixtic: —Tztac' tzach pax 'a atut 'a tzaljc'ojlal. Tic wal xcham elni, 'ix wab' tas tzala, xin yiclj in b'on tas tza c'an 'ayin, xchi David.

³⁶ A yic 'ix meltzj 'ix Abigail 'a 'aj 'ayc' win Nabal, xyiln 'ix to 'aych jun niwquil q'uin̈ yet' jun niwn wal 'a yatut, 'icha yic eb' rey. Caw wal tzalj Nabal, 'u'm 'an̈ pax winac. Yuj cha, may xon tas xyal 'ix 'a 'a, at 'a junx c'u xyal 'ix.

³⁷ Ax 'a sq'uin̈b'il 'a junx c'u cha, yic tox xb'ox sc'ojl Nabal yuj te 'an̈ cha, 'ixta to b'i'an 'ix yaln 'ix Abigail tas 'ix uji. Yuj cha, 'ix 'och jun yab'il tzcuch derrame 'a win Nabal, 'ix sic'b' can 'el sniwnal.

³⁸ Slajn̈il xo c'u yoch jun yab'il chi 'a 'a, 'ix milx cham yuj Jehová.

³⁹ A yic xyab'n win David speclal chajtlto tox 'ix chami, 'ix yaln 'ixtic: —Alx cab' wach' paxti 'a Jehová, tox 'ix spactzej 'a win Nabal xcham cha, yuj tas in yutej. A pax Jehová in tenn 'och wan 'a tas maysch'olnil 'ijn xin b'o'o; mun wal x'el-l tu 'a yib'n̈ win sch'ocoj, xchi David. Xlajw cha, 'ix checn 'at win David jaywn̈ schecb' 'a 'ix Abigail yic tz'at yal eb' 'a 'ix, to tznib'j win tzyij 'ix yistziloc.

⁴⁰ A yic xc'och eb' schecb' chi 'a 'ix 'a Carmel, xpaxtin eb' yet' 'ix, 'ix yaln eb' 'ixtic: —A win David on̈ checn̈ cot 'aych on̈, to tznib'j win tzach 'och yistloc, xchi eb' 'a 'ix.

⁴¹ 'Ix 'em n̈ojn 'ix yuj sch'oxn 'eli to niwn yel'ch David 'a 'a, 'ix yaln 'ixtic: —An tic, schecb' xon David chi waji, caw wal tzchaj in c'ojl in b'icn 'el yoc eb' schecab', xchi 'ix.

⁴² A yic xlajw yaln 'ix jun tzo'n̈ cha, 'ix sb'on sb'a 'ix muc'uc, 'ix cot own̈ eb' 'ix schecb' 'ix yet'oc. Xq'ue 'ix 'a yib'n̈ jun no b'uru, 'ix 'och tza'n 'ix yuj eb' win checb' cha. 'Ix 'och 'ix yistzilc win David cha.

⁴³ An̈jtona', xyi'n pax David chi 'ix Ahinoam 'aj Jezreel, 'ix 'och eb' 'ix yistloc win schawn̈il.

⁴⁴ Ax win Saúl tox 'ix yac' win 'ix yisl tzcuch Mical 'a win Palti, win yunnal Lais 'aj Galim. A 'ix Mical cha, atn 'ix yistzil cob' win David cha.