A Ch'an̈ B'ab'el Libro Samuel 22 - Chuj San Sebastian Bible

¹ Xlajw cha, 'ix 'atx David chi ta', 'ix 'at sc'ub'nc 'el sb'a 'a yol jun n̈aq'uen 'ay 'a yol yic Adulam. Ax yic xyab'n eb' yu'tac yet' eb' yicanto sb'a yet'oc, chajtlto ata 'ayc' ta', 'ix c'och eb' yet'oc.

² Smasnil eb' caw tz'ixtxi, eb' 'ay sb'oc, yet' eb' 'ay schab'c'ojlal, c'uxn xc'och eb' yet'oc, ax 'ix 'och syajlilc eb'. A sb'isl eb', 'aym chan̈e'oc ciente eb'.

³ 'Ix 'atx David ta', axta xc'och 'a Mizpa 'a yol yic Moab. 'Ix yaln 'ixtc 'a win sreyl Moab cha: —Tzin tew 'ayach, to tzcan in mam yet' in nun et'oc, masnto 'oj wila', tas 'oj sb'o Dios wet'oc, xchi.

⁴ 'Ixta xyutj yi'n can 'at smam yet' snun 'a yol slugar win sreyl Moab. 'Ix can eb' ta', ya' sb'a ax David 'ix c'och scol sb'a 'a jun n̈a q'ue'en.

⁵ Palta ax Gad win schecb' Dios, 'ix yaln win 'ixtc 'a 'a: —Man̈ ach can 'a tic a col a b'a. Palta 'ixic, ata tzach c'och 'a yol yic Judá, xchi. Xlajw cha, 'ix meltzj pax David ta, axta xc'och 'a calte 'a yol yic Haret.

Milb'il cham eb'*r* ya'mal 'och sti eb' 'anma 'a Dios

⁶ 'Ay jun c'u a Saúl wocn 'ejm 'a yich jun te tamarisco 'ay 'a jolm witz 'a Gabaa, yamb'il slanza yu'uj, oyn 'och eb' syajlil eb' soldado 'a stz'ey. 'Ix yab'ni chajtlto 'ix 'ilx David yet' eb' winc ajun yet'oc.

⁷ Yuj cha, xyaln Saúl 'a eb' 'ayc' yet' cha: —A ticnec ex yin̈tl Benjamín wet'oc, 'ab'c tas 'oj wala': ¿Tom cob' tzeya'ch 'a e c'ojol, chajtlto a win yunnal Isaí 'oj yac' win e lu'um yet' pax e yuva, ax ex ya'n 'och win capitan̈il e masnil?

⁸ ¿Tom yuj cha, tzex 'och 'ajc'ojlal 'ayn e masnil? May junc mach tzaln 'ayin, toto a win wunnal, tox 'ix yac' win strato yet' win yunnal Isaí cha. May junc ex tzex 'och 'il jac wu'uj. May tas tzeyala toto a win wunnal, wan ya'n win sc'ojloc win in checab', sec tz'och 'ajc'ojlal 'ayin, yic tzmacn in sat 'aj tzin 'eq'ui, 'icha wan yutn tic, xchi.

⁹ Ax win Doeg win edomita, lin̈n 'ec' 'a stz'ey eb' sat yajl yaj 'a eb' soldado Saúl, 'ix ta'w win 'ixtic: —An tic, xwil win yunnal Isaí cha, a yic x'ec' win 'a Nob. Ata xc'och win 'a Ahimelec yunnal Ahitob.

¹⁰ Ax Ahimelec cha, 'ix sc'anb'j 'a Jehová yuj David, 'ix ya'n tas tzc'uxu, 'ix ya'n pax q'uen yespada can win Goliat 'a David cha, xchi.

¹¹ Yuj cha, x'at ya'nc win rey chi 'awtxoc cot Ahimelec yet' eb' yican to sb'a yet'oc, atn jun tzo'n̈ xo eb' ya'mal 'och sti eb' 'anma 'a Dios 'a chon̈b' Nob. Ax yic xjaw eb' smasnil 'a yojltac win rey,

¹² 'ix yaln win 'ixtc 'a Ahimelec: —Ach yunnal Ahitob, maclj ab' tas 'oj wal ticnec, xchi. —'Ayn 'ec' 'a yol a c'ab' mamin rey, xchi Ahimelec.

¹³ —¿Tas yuj ach 'och yet' win yunnal Isaí yic tzach 'och 'ajc'ojlal 'ayin? Ach 'ix ac' 'ixm pan swa winac, xa'n pax jun q'uen espada 'a 'a, 'ix a c'anb'n 'a Dios yu'uj, sec tz'och 'ajc'ojlal 'ayin, yic tzin smacn 'aj tzin 'eq'ui, 'icha wan yutn tic, xchi.

¹⁴ Yuj cha, xta'w Ahimelec 'a win rey chi 'ixtic: —¿Mach wal junc 'a scal eb' a checb' tic mamin rey to caw yiclum 'icha David? Yet' pax caw a n̈i winac, yajl pax yaj win 'a eb' soldado tzach tan̈wni, caw tz'ijx chan̈ sb'i win 'a yol a despacho.

¹⁵ ¿Tom at 'ijnoc in b'ab'l c'anb'n tic 'a Dios yuj win tza na'a? Ma'ay, man̈ 'ixta'oc. Yuj cha, may cab' tas tu tza nib'j a b'o 'ayn mamin rey, yet' pax 'a eb' wican in b'a yet'oc, yujto man̈ wojcoc an a checb' in tic tas yaj jun paxti tic, xchi.

¹⁶ Palta yelc'ojlal xyal win rey 'a win 'ixtic: —Cojn to tza'ch 'a a c'ojl ach Ahimelec, chajtlto 'oj a cham yet' eb' ecan smasnil, xchi.

¹⁷ Xlajwn̈ej cha, xyaln win rey 'a eb' soldado oyn 'och 'a stz'ey stan̈woc: —Milc cham smasnil eb' ya'mal 'och sti eb' 'anma tic 'a Dios. Yujto caw 'aych eb' yet' jun David cha, yojc wal eb', chajtlto tz'elc' jun David chi wu'uj, palta ma'ix yal eb' wab'i', xchi. Palta a eb' soldado win rey cha, ma'ix ya'ch eb' sc'ab' smiln Ahimelec yet' eb' yican cha.

¹⁸ Yuj cha, xyaln win rey chi 'ixtc 'a Doeg win edomita: —Mil cham ewin ach tic, xchi winac. Yuj cha, syamn 'och win Doeg smiln cham eb'. A wal 'a yic jun c'u cha, 'ay 85 sb'isl eb' winc smil cham winac, atn eb' tz'a'n 'och te pichl chaleco to nab'a lino.

¹⁹ Xlajw cha, x'och pax 'a yol chon̈b' Nob, atn schon̈b' eb' ya'mal 'och sti eb' 'anma 'a Dios. 'Ix smiln cham win eb' winac yet' eb' 'ix 'ix, eb' 'unin yet' eb' tz'ulc 'unn tot 'aljnac, smiln cham pax win no wacax, no b'uru yet' pax no calnelu.

²⁰ Palta 'ay jun yunnal Ahimelec tzcuch Abiatar, 'ix yac' ganar s'at 'elc 'aj tz'och chaml cha, axta xc'och 'elc 'a 'aj 'ayc' David.

²¹ Axta 'ix yal 'a David chajtlto 'ix milx cham smasnil eb' ya'mal 'och sti eb' 'anma 'a Jehová yuj Saúl.

²² 'Ix yaln David 'ixtc 'a Abiatar: —A jun cha toxn to wojtac, yujto a yic cha, 'ix wila chajtlto 'ayc' win Doeg ta', yuj cha, wojtac to a win xaln 'a Saúl. A ticnec wojtac chajtlto an 'ay in mul, yuj cha, 'ix cham smasnil eb' ecan cha.

²³ Palta cann̈ wet' 'a tic, man̈ ach xiwoc, yujto a jun tzach nib'n milnc chamoc, an̈jtona', tznib'j tzin smil paxi. Toto tzach can wet'oc, 'oj a colchji, xchi David.