A Ch'an̈ B'ab'el Libro Samuel 21 - Chuj San Sebastian Bible

'Atnc David 'elc 'a Saúl

¹ Xlajw cha, xc'och David 'a chon̈b' Nob, xc'och 'a 'aj cajn Ahimelec win ya'mal 'och sti eb' 'anma 'a Dios. A win Ahimelec caw tz'ib'x yuj xiwlal 'a yic xchan 'el'ch sb'a yet' David, 'ix yaln 'a 'ixtic: —¿Tas yuj a ch'ocj tzach jawi, 'in may junc mach ajun et'oc? xchi.

² —To 'ay jun tas tzwul yac' win rey in b'o', palta xyal win 'ayin, chajtlto may junc mach tztac' yojcan 'eli. Ax pax jun tzo'n̈ in checb' ajun wet'oc, tox xwal 'a eb' 'ajtil 'oj in cha in b'a yet' eb'.

³ A ticnec, ¿'aym jac tas wach' tzqui c'ux 'ayach? 'Ac' o'e'oc in pan, mto 'ay junc xo tas 'ayc' 'ayach, 'ac' jac wico', xchi David cha.

⁴ —A 'ixm pan 'ayc' 'ayin, man̈ comn panoc 'ixim, palta to yic Jehová yaj 'ixim. 'Oj wac' 'ixm 'ayach, cojn toto may junc tas tot 'ix sb'o ewin a checb' chi yet' eb' 'ix 'ix, xchi Ahimelec cha.

⁵ —A eb' 'ix 'ix cha, 'ayx xcan eb' 'ix cuj on̈, chab'ji xo on̈ cotcn ticnec. Wach'xam a jun qui checnb'il may wal yel'chi, palta a ewin in checb' cha, wach'x yaj ewin sacb'tzan sb'a yic on̈ cot on̈, ax ticnec yel xo wal sacx yaj ewinac, xchi David cha.

⁶ Xlajw cha, xya'n win 'ixm pan yic Jehová 'a David, yujto man̈x 'a 'ixm pan 'ayc' ta', cojn 'ixm x'ijx 'elt 'a yol scajnub' Dios, ax 'ixm c'a't pan x'ochx can sjelc 'ixim.

⁷ A 'a yic jun c'u cha, 'ayc' jun win schecb' Saúl 'a stz'ey jun scajnub' Jehová cha, edomita winac, tzcuch Doeg, syajlil eb' yilmal scalnelu Saúl yaj winac.

⁸ 'Ix yaln David 'ixtc 'a Ahimelec cha: —¿'Ay am junc lanza mto junc espada 'ayc' 'ayach? Yujto caw ji'lti in checx cot yuj win rey, yuj cha, man̈x 'ic wij cot wespada yet' jun tzo'n̈ xo in yamc'ab' yic owal, xchi David.

⁹ —'Ayc' q'uen yespada win Goliat 'ayin, win filisteo a'jnac ganar a miln cham 'a lum span̈nil Ela. Yaj q'uen 'a spatc 'och te chaleco cha, pichn 'och q'uen 'a yojl jun te nip. A jun cha, tztac' e'ni, toto tza nib'j ec', al jun tzo'n̈ocx yamc'ab' yic owal, may tas 'ayc' 'ayin, xchi Ahimelec. —¡A jun cha yelxo wach'! 'Ac' jun chi 'ayin, xchi David.

¹⁰ Xlajw cha, x'atx David chi 'elc 'a Saúl 'a jun c'u cha, axta xc'och 'a win Aquis sreyl Gat.

¹¹ 'Ix yaln eb' soldado win Aquis chi 'ixtic: —¿Tom man̈oc jun David sb'i tic, win 'icha rey yaj 'a chon̈b' Israel? ¿Tom man̈oc jun tic tzb'itnax yuj eb' 'ix 'ix yic tzya'n eb' chan̈al 'a yic tzyaln eb' 'ixtic: 'Ec'b'al jun mil eb' smil cham Saúl, ax David 'ec'b'al lajn̈e mil eb' smil chamoc, xchi eb' 'ix? xchi eb' checb' cha.

¹² Caw wal smaclj David yab' jun tzo'n̈ paxti cha, yuj cha, caw 'ix xiw 'a win Aquis sreyl Gat.

¹³ Yuj cha, sjelmtan sb'a, chuc yilx 'och 'a yojltac eb'. Xya'n 'och sb'a owya'il, comn xoj tz'ib'j 'och jun tzo'n̈ coxquixtac letra 'a jun tzo'n̈ smac n̈a. 'Ix ya'n b'ey 'emt yal sti 'a scal xil sti'.

¹⁴ Yuj cha, xyaln win Aquis chi 'ixtc 'a eb' schecab': —Toto xeyila, to a jun winc tic, to tzcot 'a sjolom, ¿tas yuj xeyij cot 'ayin?

¹⁵ ¿Tom 'ay tz'och junc win tic tzcot 'a sjolm wuj 'a watut e nani? xchi winac.