A Ch'an̈ B'ab'el Libro Samuel 2 - Chuj San Sebastian Bible

Sb'it 'ix Ana

¹ 'Ix leslwi 'ix Ana 'ixtic: ¡Mamin Jehová, caw wal tzalj in c'ojol! Ach 'ix ac' wip, yuj cha, tzin tzalj 'ayach. Tzax stac' waln 'a eb' 'ajc'ojl yajch 'ayin, to ach colwj wet'oc.

² Mamin Jehová, may junc xo mach wach'. May junc xo mach wach' scolwj 'icha ach tic. Ach qui Diosal on̈, cojn ach colwjum ach.

³ Yuj cha tztac' tzwal 'ixtc 'a eb' tzyij chan̈ sb'a: Man̈ e b'an̈ e b'a, yujto a Jehová yojc smasnil, a Dios tzon̈ b'eyc'ojlanec yuj tas tzqui b'o'ec, 'oj in chic 'a eb'.

⁴ Ach Jehová ach 'ix a ma' wecchjoc sjul-lab' eb' soldado 'ay smay, ax eb' xlaj 'el yip, ach 'ix a'x yip eb'.

⁵ A eb' caw wal b'ut'n 'a yic yalan̈, ax ticnec tzchon̈ sb'a eb' majnil yic tz'ilchj jac tas tzc'uxu. A eb' 'ay swejel, ax ticnec, caw wal b'ut'n eb'. A 'ix 'ix man̈ 'unewumoc, ax ticnec 'ay ucwn̈ yune 'ix xyune'ej. A 'ix niwn xo yune', ax ticnec 'ix 'och wan 'ix yunewi.

⁶ Mamin Jehová 'aj q'uinl ach, ach tzej 'ec' qui q'uinl on̈, tza'n paxi. Tztac' tzon̈ 'a'cn 'ejm 'a yol sjul-l eb' chamnc 'anma', tzon̈ a coln pax q'ueta.

⁷ Mamin Jehová tzac' meb'a'il, tza'n pax ricoal. 'Ay mach tzej 'ejmi, 'ay pax mach tzej cha'an̈.

⁸ Ach tzej chan̈ eb' meb'a', tze'n pax chan̈ eb' c'anm limosna, sec tz'och yopiso eb' yet' eb' niwc winac. Yujto Jehová ach, ach 'ay ec jun tzo'n̈ sb'achnub'al yich lum lum tic, ach 'ix a b'achcn q'ue jun yolyib'n̈q'uinl tic 'a yib'an̈.

⁹ Ach tza tan̈wj eb' eco', palta ax eb' maysch'olnil, ata tzcham eb' 'a scal q'uic'q'uinal. Matz tac' qui q'ue'ch yet' qui jelnal 'a mun yol quic on̈.

¹⁰ Mamin Jehová a eb' 'ajc'ojl yajch 'ayach, choc' tz'ajcn eb' o'oj. A 'a satcha'an̈, ata 'oj smac' sb'a c'u scot 'a yib'n̈ eb'. 'Oj a b'eyc'ojloc smasnil tas 'ay 'a sat lum lum tic; ax a'n sjelnal jun rey sic'b'il 'el o'oj, xchi 'ix.

¹¹ Xlajw cha, 'ix pax win Elcana chi 'a yatut 'a Ramá yet' eb' ajun yet'oc. Ax win 'unn cha, 'ix can win yac' servil Jehová yet' win Elí, win ya'mal 'och sti eb' 'anma 'a Dios.

A smul eb' yunnal Elí

¹² A eb' yunnal Elí caw maysch'olnil sb'eyb'al eb', may xon yel'ch Jehová 'a sat eb'.

¹³ May pax yel'ch sleyl xajmb'al 'a eb'. A yic tzya'n junc mach xajmb'al, tzjaw junc win ya'mal servil ewin yunnal Elí cha, 'a 'aj wan staj no chib'ej, yet' win jun niwquil cuchara 'oxe ye.

¹⁴ Tzyecn 'ejm win q'uen cuchara chi 'a yol yet'l 'aj wan staj no cha. A tzyal jantc no chib'j chi tzyamchj yi'n q'uet q'ue'en, a chi tzyij 'at eb' 'a ewin yunnal Elí cha. 'Ixtan̈ej tzyutj eb' no xajmb'al tz'at yac' eb' yit chon̈b' eb' chi 'a Silo.

¹⁵ An̈jtona', a yic mantzac tz'a xepual no xajmb'al, tzc'och junc win ya'mal servil eb' yunnal Elí cha, tzyaln win 'ixtc 'a win tzyac' xajmb'al cha: 'Ac' jac no chib'j tic 'ayin yic tzin b'oln schi win ya'mal 'och sti eb' 'anma tic, yujto ma'oj scha win schi no tajnac chib'j chi 'ayach, palta a no yaxto 'oj sc'an winac, xchi.

¹⁶ Q'uinloc tzta'w win 'ay xajmb'al cha, tzyaln 'ixtic: Tz'a cab' no xepu tic b'ab'el, tzlajw cha, ax e'n no chib'j tic 'icha tza nib'j cha, toto xchi winac. Ma'ay, yowlal 'oj 'ac' xon no 'ayn ticnec, toto ma'ay, 'oj in to'c no 'ayach, xchi win checb' cha.

¹⁷ Yuj jun cha, caw wal niwquil jun tzo'n̈ smul eb' yunnal Elí chi tz'och 'a yojltac Jehová, yujto may yel'ch tzyutj eb' no xajmb'al tz'ajx cha.

¹⁸ Ax win Samuel, caw wal yune to winac, 'aych pax jun spichl win camx chaleco nab'a lino yic tzya'n servil win Jehová.

¹⁹ A 'ix snun win 'unn cha, 'a junjn ab'il tzb'on 'ix junjn sjucn pichl winac. Ax yic tzc'och 'ix yet' win yichmil chi yac' xajmb'al 'a junjn ab'il 'a Silo, tzyi'n can 'at 'ix te spichl win cha.

²⁰ Ax win Elí cha, 'ix yaln win swach' paxti 'a yib'n̈ Elcana yet' 'a yib'n̈ 'ix Ana. 'Ix yaln win 'ixtic: Ya' cab' Jehová onnal yet' 'ix estzil tic, sjelc win c'anb'il yuj 'ix, xya'n pax 'ix ya'malc servil Jehová, xchi winac. Xlajw xoj cha, xpax eb' 'a yatut. 'Ixtan̈ej xyutj win Elí chi yaln wach' paxti 'a yib'n̈ eb' 'a junjn ab'il.

²¹ Ax Jehová xyac' swach'c'ojlal 'a yib'n̈ 'ix Ana, 'ix 'alj 'oxwn̈ swinc 'unin yet' chawn̈ 'ix 'unin. Ax win Samuel 'ipn sq'uib' win 'a scajnub' Jehová.

Tenb'il 'och wan eb' yunnal Elí

²² Caw wal 'ichm winc xo win Elí cha, palta 'ix yab' tas tzb'o eb' yunnal chi 'a eb' yit israelal. Xlaj way ewin yet' eb' 'ix 'ix tztan̈wni sti smac Mantiado 'aj tzchaj sba Dios yet' eb' 'anma'.

²³ Yuj cha, xyaln 'a eb' yunnal chi 'ixtic: Smasnil eb' 'anma tic, c'uxn tzyal eb' wab'i', tastc maysch'olnil chi tzlaj e b'o'. ¿Tas yuj 'ixta tzeyutj e b'a?

²⁴ May ex wunnal, caw wal maysch'olnil tas tzyal eb' schon̈b' Jehová tic 'a eyib'n̈ yuj tas tze b'o'o.

²⁵ Toto 'ay junc mach tz'och smul 'a junc yit 'anma'il, tztac' to tzcolwj Dios yet'oc. Palta toto 'ay mach tz'och smul 'a Jehová, ¿mach wal 'oj stac' scolni? xchi Elí. May xon yel'ch tas xyal smam eb' chi 'a 'a, yujto a Jehová tox 'ix sna'a to 'oj cham eb'.

²⁶ Ax win quelm Samuel 'ipn sq'uib'i, caw wach' snab'en 'a sat Dios yet' 'a sat eb' 'anma'.

²⁷ A 'a yic jun tiempoal cha, ata xc'och jun win schecb' Dios 'a win Elí. 'Ix yaln 'ixtic: A Jehová 'ixtc wal yaln 'a eb'an̈: A yic 'ayc' eb' a mam echm 'a Egipto, yic tz'a'w servil eb' 'a win faraón, caw wal wach' xwutj in ch'oxn in b'a 'a eb'.

²⁸ Ax 'a scal smasnil eb' eyit israelal, ata ex in si'cn 'eli, yic tzex 'och ya'malc 'och sti eb' 'ayin, sec ax xo tze n̈us no xajmb'al 'a yib'n̈ yet'l 'aj tz'a'i. Tzeya'n tz'a pax incienso, 'aych cab' pax e camx chaleco eyu'uj yic tzex 'ochch 'a wojltac. An̈jtona', xwac' sc'ux eb' e mam eyichm smasnil jun tzo'n̈ ofrenda tz'ajx tz'a 'a wojltac yic tzin yi'n chan̈ eb' eyit israelal tic.

²⁹ ¿Tas yuj may yel'ch jun tzo'n̈ xajmb'al yet' jun tzo'n̈ ofrenda 'a e sat, atn jun tzo'n̈ tzwac' 'ajxoc 'ayn 'a in cajnub'? ¿Tas yuj cojxn wal ewin onnal tic tza xajnej 'a wib'an̈? Tzeya'n b'a'chb'oc e b'a yuj swach'l yofrenda eb' in chon̈b' tzyac' 'ayin.

³⁰ Yuj cha, an Jehová e Diosal in ax israel ex tic, an waljnac 'ixtic: Ach tic yet' eb' en̈tl b'aq'uin̈, ax tzin eyac' servil, xin chi. Ax ticnec tzwaln can paxi, to man̈x 'ixta'oc 'oj 'ajoc. A eb' 'ay wel'ch 'a sat, 'ay pax yel'ch eb' 'a in sat. Ax eb' may wel'ch 'a sat, may pax yel'ch eb' 'a in sat. An Jehová in, an tzwala.

³¹ Wan xo sjaw sc'ul wi'n 'ec' opiso yet' yic eb' a mam echam, man̈x 'a xon junc eb' en̈tl 'oj 'och 'ichm 'anma'il.

³² Caw wal 'oj cus a c'ojl eln 'och tas 'oj 'aj opiso ya' sb'a wan in b'on smasnil tas wach' 'a eb' et israelal tic. Man̈x 'a wal b'a'n̈ 'ay junc eb' en̈tl 'oj 'och 'ichm 'anma'il.

³³ Palta 'oj wactc can junchawn̈oc eb' en̈tl chi yil yet'l in xajmb'al, sec 'oj cus sc'ojl yiln 'ochi, ax smasnil jun tzo'n̈ xo eb' en̈tl tot 'oj 'aljoc, caw quelm 'unn to eb' ax smilx eb'.

³⁴ A jun tic 'oj 'och ch'oxnb'ilal 'ayach, to a chawn̈ eb' onnal, atn win Hofní yet' win Finees, to junn̈j c'u 'aj 'oj cham eb' schawn̈il.

³⁵ Ax wa'n can 'och junc xo ya'mal 'och sti eb' 'anma 'ayin, atn junc win yiclum tzyutj sb'a 'ayn 'icha tzin nib'ej. 'Oj wac' najtxb'oc yopiso eb' yin̈til, ax wa'n yopiso yet' jun win rey 'oj in si'li.

³⁶ Ax smasnil eb' en̈tl 'oj canoc, 'oj jawc eb' wul yac' 'ejm sb'a 'a yojltac junc win cha, yic 'oj wul sc'annc eb' jac stumin mto c'axp'oc yo'och. 'Oj sc'ann eb' yopiso 'a winac yic tzmunlj yet' eb' ya'mal 'och sti eb' 'anma cha, sec ata tzyac' ganar jac tas tzc'uxu, xchi Dios, xchi jun checb' chi 'a win Elí.