A Ch'an̈ B'ab'el Libro Samuel 16 - Chuj San Sebastian Bible

Si'xnac 'och David reyal

¹ 'Ix yaln Jehová 'a Samuel 'ixtic: —¿B'a'n̈to 'oj och wan oc' yuj Saúl? Man̈xtzac in nib'j to an̈ja 'aych win reyl 'a chon̈b' Israel. A ticnec 'ac' b'ut'joc no sch'ac calnelu yet' aceite. Tzlajw cha, tzach 'at 'a yatut win Isaí win 'aj Belén, yujto a 'a scal eb' yunnal, ata 'ay jun xin sic' 'elt 'oj 'ochx can reyl sjelc winac, xchi.

² —¿Tas wal tzin 'aj in 'ati? Toto tzyab' Saúl jun tic, caw tzin smil chamoc, xchi Samuel cha. 'Ix ta'w Jehová 'ixtc 'a 'a: —'Ij 'at junc no cob's wacx et'oc, tzaln 'a eb' 'aj Belén 'ixtic: To tzin jaw wul wac' in xajmb'al 'a Jehová, xa chi 'a eb'.

³ Tzlajw cha, tzawtn Isaí yet' eb' yunnal wul schi no xajmb'al chi et'oc. An xo 'oj wal 'ayach tas 'oj a b'o'. A junc mach 'oj in ch'ox 'ayach, a tzac' q'ue aceite 'a sjolom, yic tza si'n can 'och reyal, xchi Dios.

⁴ 'Ix syiclni Samuel sb'on tas xyal Jehová. Ax yic xc'och 'a Belén, 'ix 'elt eb' yichmtac wincal chon̈b' chi scha sc'och yet' xiwc'ojlal, 'ix yaln eb' 'ixtic: —¿Tas tzwul a b'o'? ¿Tzaljc'ojlal mto cusc'ojlal? xchi eb' 'a 'a:

⁵ —Wach' tas tzwul in b'o', to tzin jaw wul wac' in xajmb'al 'a Jehová. Sacb'tzejc e b'a, tzex c'och pax wet' 'a yic 'oj wa'nc in xajmb'al tic, xchi. 'Ix sacb'tzan Samuel win Isaí yet' eb' yunnal 'icha tzyal ley. Xlajw cha, xyawtn 'at eb' yic tzchin eb' no xajmb'al chi yet'oc.

⁶ Ax yic xc'och Isaí yet' eb' yunnal 'a 'aj 'ayq'ui, 'ix yiln 'och Samuel win Eliab, snan 'ixtic: Wal yel a jun winc 'ayc' 'a yojltac Jehová tic, a sic'b'il 'och reyl yu'uj, xchi.

⁷ Palta xyaln Jehová 'ixtc 'a Samuel: Man̈ ach 'och q'ueln 'a win tic yuj tas yilx 'ochi, man̈ elch ste'il, yujto matz in nib'j winac. Ax 'anmax tic, a wal yilx 'och junc mach, a chi tzeyilchi, palta an tic a snab'en eb' tzwilchi, xchi.

⁸ Xlajw cha, xyaln Isaí 'a win yunnal tzcuch Abinadab, to tzc'och 'a yojltac Samuel. 'Ix yaln Samuel chi 'ixtic: —Man̈oc win tic si'ch Jehová, xchi:

⁹ 'Ix yaln Isaí 'a junx yunnal tzcuch Sama to tzc'och 'a yojltac Samuel, 'ix yaln pax Samuel chi 'ixtic: —Man̈oc pax win tic si'ch Jehová, xchi.

¹⁰ Ax yic xlajw 'ec' eb' yunnal Isaí 'a yojltac Samuel yucwn̈il, 'ix yaln 'ixtc 'a Isaí: May junc eb' tic si'ch Jehová, xchi.

¹¹ Yuj cha, 'ix sc'anb'n 'ixtc 'a winac: —¿Tom cojn eb' onnal tic smasnil? xchi Samuel. —'Ayt junx win slajb' 'unin, 'aycn 'at win chi 'ilj calnelu, xchi Isaí. —'At 'ac' 'ijxoc cot winac; toto matz jaw winac, matz tac' tzon̈ wa'ec, xchi Samuel cha.

¹² Yuj cha, x'at ya'nc Isaí 'at 'awtxoc cot junx win cha. A win cha chacchin yilxi, caw wach' yilx yol sat, caw wach'n̈j yilx 'och sniwnal. Ax yic xjaw winac, xyaln Jehová 'a Samuel 'ixtic: —Atn win tic; 'ac' q'ue aceite 'a sjolm winac, xchi.

¹³ Xlajw cha, xyi'n cot Samuel no ch'ac 'aj 'ay 'ejm aceite. Q'ueln 'och eb' 'u'tacab'il cha, xya'n q'ue Samuel aceite 'a sjolm win David cha. A 'a yic jun c'u cha, 'ix 'ochcn Yespíritu Jehová 'a win yet' spoder. Xlajw swa eb', 'ix meltzj pax can Samuel 'a Ramá.

X'och David munljoc 'a Saúl

¹⁴ 'Ix yij 'el Jehová Yespíritu 'a Saúl, ax jun espíritu caw man̈ wach'c 'ix ya'cn 'och 'a 'a, caw wal tz'ixtx yu'uj.

¹⁵ Yuj cha, 'ix yaln eb' tz'a'w servil 'ixtc 'a a: —Caw wal 'aych jun espíritu man̈ wach'c 'aych yuj Dios, a jun tic tzach 'ixtni.

¹⁶ Yuj cha, a ticnec ach cajlil, al 'ayn̈ a checb' on̈ tic on̈, to tz'at qui say junc mach 'ojtnac syucn te arpa, sec a yic tzach yixtn jun espíritu man̈ wach'c cha, ax win tzyucn te arpa chi ab'i', sec tzb'ox a c'ojol, xchi eb'.

¹⁷ 'Ix ta'w Saúl 'ixtc 'a eb' schecb' cha: —Sayc 'ec' junc 'an, a wal junc mach caw jeln syucn te', a tzeyij cot 'ayin, xchi 'a eb'.

¹⁸ 'Ix yaln jun 'a scal eb' schecb' chi 'ixtic: —'Ay wal jun win wojtac. Caw jeln win syucn te arpa cha, yunnal win Isaí winac. Ata cajn 'a Belén. Caw jeln winac, yojc ya'n owal. Caw wach' pax yilx 'ochi, jeln spaxtini, 'aychn̈ej Jehová yet'oc, xchi.

¹⁹ Yuj cha, xya'n 'at Saúl schecb' 'a Isaí, xyaln 'at 'ixtic: 'A' cot win onnal David 'ayin, win 'ilm calnelu, xchi.

²⁰ Yuj cha, xya'n 'at Isaí win yunnal chi 'a Saúl, atn win David. 'Ix ya'n 'at pax jun no b'uru yet'oc, scuchn no jun 'ictzal 'ixm pan, yet' jun tz'um 'aj 'ay 'ejm yal uva, yet' jun no yune chiwo.

²¹ Ax yic xc'och David 'a yojltac Saúl, 'ix yaln Saúl chajtlto tz'ochcn David chi schecb'oc, caw xchamc'ojlax David chi yuj Saúl cha. 'Ix ya'n 'ajxoc 'och yi'malc syamc'ab' yic owal.

²² Xlajw cha, xya'n 'at Saúl chi jun schecb' 'a Isaí, xyaln 'at 'a 'ixtic: —Tzin c'an 'ayach, to tzcancn David tic wet'oc, yujto caw wach' 'ayn tzwila, xchi.

²³ Yuj cha, a yic tz'ixtx Saúl chi yuj jun espíritu man̈ wach'c cha, ax David chi tz'i'n cot te arpa. Tzlajw cha, tzyamn 'och syucni. 'Ixta tz'aj yel jun espíritu chi 'a Saúl, tzjapx sc'ojol, tzb'ox can 'el'chi.