A Ch'an̈ B'ab'el Libro Samuel 14 - Chuj San Sebastian Bible

¹ 'Ay jun c'ual, 'ix yal Jonatán win yunnal Saúl 'a jun schecb' 'et'jnac syamc'ab' yic owal, xyaln 'a 'ixtic: —Con̈ wet'oc, 'e'con̈ 'a junx c'axp 'ec' cha, ax qui c'och 'a 'aj 'ay yet'l eb' filisteo, xchi. Palta may tas 'ix yal yab' smam.

² Ax win Saúl ata 'ayc' 'a sti 'el chon̈b' Gabaa 'a yich jun te te tzcuch granado 'ayc' 'a stz'ey 'amc' 'aj tzte'x 'ixm trigo. Ax eb' soldado ajun yet'oc, 'ay waque ciente sb'isl eb'.

³ A pax ta ajun win Ahías ya'mal 'och sti eb' 'anma 'a Dios, yet' win te spichl yic yopiso cha. A win Ahías cha yunnal win Ahitob yu'tac Icabod, win yunnal Finees yixchicn can Elí, win ya'mal 'och sti eb' 'anma 'a Dios 'a Silo 'a pecti'. Ax eb' 'anma ajun yet' Saúl cha, man̈ yojcoc eb' toto a Jonatán tox 'ix 'ati.

⁴ Ya' sb'a cha, ax Jonatán 'aych 'a snab'en sc'och 'a 'aj 'ay yet'l eb' filisteo. A 'a snan̈l chab' q'uen niwc tenam, ata tz'ec' jun b'e 'a snan̈l q'uen tzcuch Boses, yet' q'uen tzcuch Sene.

⁵ Jun q'uen 'ay 'a stojlal norte 'a yojltac 'at Micmas, ax junx q'uen 'a stojlal sur 'a yojltac 'at Gabaa.

⁶ Xyaln Jonatán 'a win 'et'jnac syamc'ab' yic owl chi 'ixtic: —Cotan̈, 'e'con̈ 'a junx c'axp 'ec' cha, ax qui c'och 'a 'aj 'ay yet'l eb' chuc schon̈b' cha. Toq'ue 'oj colwjoc Jehová quet'oc, yujto a Jehová, may yajltacl on̈ scolni, wach'xam niwn qui b'eyi, mto jaywn̈ej qui b'eyi, xchi.

⁷ —B'o tas tza nib'j a b'o', an tic 'oj in colwjn̈ej et' 'a 'aj tza nib'j in colwal, xchi win 'et'jnac syamc'ab' Jonatán.

⁸ Yuj cha, xyaln Jonatán 'ixtic: —Con̈, 'e'con̈ 'a 'aj 'ay jun tzo'n̈ soldado cha, qui ch'ox qui b'a 'a eb'.

⁹ Toto tzyal eb' 'ayn̈ 'ixtic: Tan̈wj on̈c ta', masnto tzon̈ c'och 'aj 'ayx 'ec' cha, toto xchi eb', tzon̈ can 'a quet'l 'aj 'ayn̈ 'ec' cha, matz on̈ c'och 'aj 'ay eb' cha.

¹⁰ Palta toto tzyal eb' 'ayn̈ 'ixtic: Cotn̈ec 'aj 'ayn̈ 'ec' tic, toto xchi eb', tzon̈ 'at 'aj 'ayc' eb' cha, yujto a jun cha, ch'oxnb'il 'oj 'aj 'ayon̈, chajtlto a Jehová tz'a'n 'och eb' 'a yol qui c'ab', xchi.

¹¹ Ax yic xch'oxn sb'a eb' schawn̈il 'a 'aj 'ay yet'l eb' filisteo macwjum cha, yic xyiln sb'a eb' 'a eb', 'ix yaln eb' filisteo chi 'ixtic: 'Iltec, yaj eb' hebreo 'a cha, wan laj yeltoc eb' 'a yol sjul 'aj sc'ub'jnac 'el sb'a, xchi eb'.

¹² Xlajw cha, x'awj eb' 'a Jonatán yet' 'a jun schecb' chi 'ixtic: —¡Cotn̈ec 'aj 'ayn̈ 'ec' tic, 'ay jun tas 'oj cal eyab'i'! xchi cob' eb'. Yuj cha, xyaln Jonatán 'a jun schecb' chi 'ixtic: —'Ochn̈n̈ej tza'n wu'uj, yujto a Jehová a 'oj 'a'n 'och eb' 'a yol qui c'ab' an̈ israel on̈ tic, xchi.

¹³ Xlajw cha, x'at Jonatán 'a 'aj 'ayc' eb' filisteo cha, caw wal pa'n 'aj xb'ey 'a sat q'uen cha. A sc'ab' xcan toc'an yic xb'eyi, ste'wtzan pax sb'a yet' yoc, tza'n 'och jun schecb' chi yu'uj. Ax yic xc'och eb' 'a eb' 'ajc'ojl cha, a eb' tz'em yuj Jonatán, ax jun schecb' chi tzwach' miln cham eb'.

¹⁴ A 'a jun b'ab'l owl x'och yuj Jonatán cha, yet' pax jun 'et'jnac syamc'ab' cha, 'aym junc'loc eb' filisteo smil eb' 'a yol chan̈e ch'an̈il.

¹⁵ Smasnil eb' filisteo 'ayc' 'a yol scamplamento cha, yet' eb' pucnc 'el 'a spatquil 'eli, caw x'och jun niwquil xiwc'ojlal 'a eb', yet' eb' caw jeln 'a owal, caw xiw eb'. A wal 'a jun rato cha, 'ix 'ec' jun quixcab' 'a sat lum lum cha, 'ixtnta xyutj Dios ya'n cot jun niwquil xiwc'ojlal 'a scal eb'.

¹⁶ Ax eb' macwjum 'aych yuj Saúl 'a Gabaa 'a yol yic Benjamín, ax xyiln eb' to caw sactzicnac yec' eb' filisteo chi 'elc yuj xiwlal.

¹⁷ Yuj cha, xyaln Saúl 'ixtc 'a eb' 'anma ajun yet' cha: —Sayc eyil 'a qui calc tic, tzeyilni mach junc man̈ 'ayc' 'ec' quet'ec, xchi. Ax yic sayn eb' yila', ax xyiln eb' to may Jonatán 'ayc' yet' jun schecab'.

¹⁸ 'Ix yaln Saúl 'a win Ahías 'ixtic: —'Ij cot te scaxail strato Dios, xchi. A 'a yic jun tiempoal cha, to ata 'ayc' te caxa chi yet' eb' israel.

¹⁹ Ya' sb'a wanto spaxtin Saúl yet' win ya'mal 'och sti eb' 'anma 'a Dios, ax eb' filisteo cha, caw 'ipn swach' somchj chan̈ eb' 'a scamplamento cha. Yuj cha, xyaln Saúl 'a win 'ixtic: —Man̈x e' cot te', xchi.

²⁰ Xlajw cha, xya'n Saúl syam sb'a smasnil eb' chon̈b' ajun yet' cha, 'ix 'at eb' 'aj 'aych owl cha. Ax xyiln eb', to caw tox somchj 'el eb' filisteo cha, mun xoj a eb' tzmil cham sb'a.

²¹ Ax eb' hebreo 'aycn 'ec' 'a scal eb' filisteo cha, eb' cann̈c can 'a scal eb' 'a yictax yaln̈taxi, 'ix 'och eb' yet' eb' yit israelal yic x'och eb' 'a owl yet' eb' filisteo cha. 'Ix ya'ch sb'a eb' yet' eb' ajun yet' Saúl, yet' pax Jonatán cha.

²² 'Ixta pax smasnil eb' israel sc'ub'jnac 'el sb'a 'a lum jolmctac witz yic Efraín, 'ix yab' eb' chajtlto tz'at eb' filisteo 'eloc. Yuj cha, 'ix 'och tza'n pax eb' yuj eb', yic tzya'n eb' owl yet' eb',

²³ masnto xc'och eb' ya'n owl 'a Bet-avén. 'Ixta 'ix yutj Jehová scoln 'el chon̈b' Israel 'a jun c'u cha.

A sti Saúl ya'jnac

²⁴ Palta a eb' israel, caw 'ix tzactzj chan̈ eb' 'a jun c'u cha, yujto 'ay jun sti Saúl xyal 'ixtic: Cot cab' catb' 'a yib'n̈ mach tzwa 'a yic mantzac q'uic'b' cha'an̈ yic mantzac wa'x in pac 'a eb' 'ajc'ojol, xchi. Ax eb' chon̈ab', mantzac wa xon eb' jab'oc.

²⁵ 'Ix 'at smasnil eb' chon̈b' 'a jun calte', til wal no yal chab' 'ay 'a sat lu'um.

²⁶ Ax yic xc'och eb' 'anma 'a jun calte cha, a jun yal chab' cha, tzb'ey yoc 'icha a a', may junc eb' xya'lj yu'ni, yujto caw tzxiw eb' 'a jun paxti alb'il can 'a 'a.

²⁷ Palta ax Jonatán, ma'ix yab' ya'n can smam chi jun sti 'a eb' chon̈b' cha, yuj cha, 'ix scoln 'ejm win sn̈i sc'occh 'a scal no yal chab' cha, sle'n winac. Yuj wal cha, caw x'ochx yip win xyab'i.

²⁸ Ax jun yit chon̈b' chi 'ix aln 'a 'ixtic; —A 'a mam, 'ay jun sti xyalcn 'ayn̈ 'ixtic: Cot cab' catb' 'a yib'n̈ mach tzc'uxn junc tas tzc'uxx ticnec, xchi. Yuj cha, caw lajn xoj yel quip qui masnilec, xchi 'a Jonatán.

²⁹ —A 'in mam, caw wal tu tas tzyij cot 'a q'uib'n̈ec. 'Ilt ticnec, caw x'och wip, yujto 'ix in lec' jab' no yal chab' tic.

³⁰ Ocxom wal eb' chon̈b' tic, yel xo wal am x'och yip eb', toto x'ajx sc'ux eb' jantc tas xyijcan 'ec' 'a eb' 'ajc'ojol. Tiltom wal eb' filisteo xcham cujec, xchi Jonatán.

³¹ A 'a yic jun c'u cha, ata xlajw 'el eb' filisteo yuj eb' soldado israel. 'Ix 'och tza'n eb' yuj eb' 'a Micmas, masnto xc'och eb' 'a Aialón. Palta a eb' chon̈b' cha, caw wal xc'unb' eb'.

³² Yuj cha, 'ix syamn cot eb' tas xyij 'ec' 'a eb' yajc'ojl cha, no calnelu, no wacax, yet' no quelmtac wacax. Xlajw cha, smiln cham eb' no', 'ix schin eb' no smasnil yet' schiq'uil.

³³ Palta 'ay jun tzo'n̈ eb' x'at alnc 'a Saúl 'ixtic: —A eb' chon̈ab', caw tz'och smul eb' 'a Jehová; wan schin eb' no chib'j yet' schiq'uil, xchi eb'. Yuj cha, xyaln Saúl 'ixtic: —Ax tic, caw x'och e mul. 'Ijec cot junc q'uen niwquil q'uen 'a tic.

³⁴ Tzeyaln pax 'a eb' 'anma cha, to tzyij cot eb' swacax, mto scalnelu. Tzlajw cha, tzmiln cham eb' no 'a tic, tzchin eb' no', sec matz 'och e mul 'a Jehová yic tze chin no chib'j chi yet' schiq'uil, xchi 'a eb'. A 'a yic jun 'ac'wl cha, a eb' soldado cha, 'ix yij cot eb' no noc' cha, smiln can eb' no ta'.

³⁵ Xlajw cha, sb'on Saúl jun yet'l xajmb'al 'a Jehová, at 'ijnoc sb'on jun b'ab'l yet'l xajmb'al cha.

³⁶ Xlajw cha, xyaln Saúl 'ixtic: —Coyc ca'c owl yet' eb' filisteo 'a jun 'ac'wl tic, ax qui'nec 'ec' smasnil tas 'a eb', masnto 'oj sacb'oc 'eli, ax qui miln cham eb' smasnil, man̈x 'a junc 'oj cactquec cani, xchi. —B'o tas tza nib'ej, xchi eb'. Palta 'ix yaln win ya'mal 'och sti eb' 'anma 'a Dios 'ixtic: —Ya' sb'a mantzac on̈ 'atec, qui c'anb'quec 'a Dios, xchi.

³⁷ Yuj cha, sc'anb'n Saúl 'a Dios 'ixtic: Mamin, ¿tom tz'at wac' owl yet' eb' filisteo? ¿'Oj ac' am eb' 'a yol qui c'ab' on̈? xchi. Palta ax Jehová ma'ix ta'w 'a Saúl 'a jun c'u cha.

³⁸ Yuj cha, xyaln Saúl: —Cotn̈ec 'a tic e masnil ex syajlil chon̈ab' yic tzqui saynec quila', mach x'och smul 'a qui calc ticnec.

³⁹ Yujto wa'jnac in ti 'a Jehová, qui Colmal an̈ israel on̈c tic, wach'xam a win wunnal Jonatán 'ix 'och smul, cojnto tojln̈ej scham winac, xchi. Palta may junc 'a scal eb' chon̈b' chi xta'wi.

⁴⁰ 'Ix yaln Saúl 'ixtc 'a smasnil eb' soldado cha: —Ax tic, wach' eyajcn 'a jun c'axp cha, an xo tic yet' win wunnal Jonatán tic, 'oj qui can 'a tic on̈, xchi. 'Ix yaln eb' 'anma chi 'ixtc 'a Saúl: —B'o tas tza nib'ej, xchi eb'.

⁴¹ Yuj cha, xyaln Saúl 'ixtc 'a Jehová: —'A'ch suerte 'a quib'n̈ wal 'a stojlal, mach x'och smul 'a qui cal tic on̈, xchi. Ax x'aji, a 'a yib'n̈ Jonatán yet' 'a yib'n̈ Saúl, ata x'em jun suerte cha, ax eb' chon̈ab', 'ix colchj can 'el eb'.

⁴² 'Ix yaln Saúl 'ixtic: —Ax ticnec, 'a'ch suerte 'a wib'n̈ yet' win wunnal Jonatán, xchi. Ax x'aji, a 'a yib'n̈ Jonatán x'em jun suerte cha.

⁴³ Yuj cha, xyaln Saúl 'a Jonatán 'ixtic: —Al 'ayin, tas xa b'o'o, xchi. —Wal yel, 'ix in nib'j 'och no yal chab', yuj cha, 'ix in coln 'ejm sn̈i te in c'occh tic 'a scal no', 'ix in le'ni. Al ticnec waji, tztac' in chami, xchi Jonatán cha.

⁴⁴ —Ya'ch cab' Dios junc niwquil yailal 'a wib'an̈ toto ach tic, ma'oj a chami, xchi Saúl.

⁴⁵ Palta 'ix yaln eb' chon̈b' 'ixtc 'a Saúl: ¡Tom tztac' scham Jonatán, yujto yuj winac on̈ colchji! ¡Man̈ smojc 'ixta'! Yojc wal Jehová to may 'oj 'i'noc Jonatán tic, yujto a Dios 'ix yamc'ab'n winac, xchi eb'. 'Ixta 'ix yutj eb' chon̈b' scoln can 'el Jonatán. Yuj cha, ma'ix chami.

⁴⁶ 'Ix 'och wan Saúl spechn eb' filisteo, ax eb' filisteo cha, 'ix meltzj can eb' 'a slu'um.

⁴⁷ A yic yochcn Saúl reyl 'a chon̈b' Israel, syamn 'och yac' owl yet' smasnil eb' 'ajc'ojl oyn 'och 'a stz'ey, atn eb' 'aj Moab, eb' yin̈tl Amón, eb' yic Edom, yet' eb' sreyl Soba, yet' pax eb' filisteo. Tzann̈j 'ajtil tz'at yac' owal, an̈j tz'a'n ganar.

⁴⁸ 'Ix ste'wtzan sb'a Saúl ya'n owl yet' eb' amalecita, 'ix can eb' 'a yaln̈ yu'uj. 'Ixta xyutj scoln 'el eb' israel 'a yol sc'ab' eb' 'elc'um.

⁴⁹ A eb' yunnal Saúl, atn eb' tic: Jonatán, Isúi yet' Malquisúa. 'Ay pax chawn̈ yisil, atn 'ix Merab, yet' 'ix Mical.

⁵⁰ Ahinoam sb'i yistzil Saúl, yisl win Ahimaas. Abner sb'i win syajlil eb' soldado Saúl cha, yunnal Ner win yican Saúl.

⁵¹ Cis sb'i smam Saúl, Ner sb'i smam Abner, yunnal win Abiel eb'.

⁵² Ya' sb'a 'aych Saúl yajlil, caw 'ix yac' owl yet' eb' filisteo si'mb'il. Yuj cha, a yic tzyilni toto 'ay eb' winc caw wal jelan, caw 'ay yip, c'uxn 'ix 'och eb' soldadoil yu'uj.