A Ch'an̈ B'ab'el Libro Samuel 13 - Chuj San Sebastian Bible

'Ochnc owl yet' eb' filisteo

¹ Caw te'n xo sq'uinl Saúl yic x'och reyl 'a chon̈b' Israel, ax 'a yic 'ayx 'och 'a schab'l ab'il yoch reyal,

² 'ix si'n 'elt 'oxe mil eb' winac yic tz'och eb' soldadoil 'a scal eb' yit chon̈ab'. Chab' mil eb' xcancn yet' 'a Micmas 'a lum jolmctac witz yic Betel, ax jun mil eb' xcan 'a Gabaa 'a yol yic Benjamín. Ax win Jonatán win yunnal Saúl, a win tz'a'n mandar eb'. Ax jun tzo'n̈ xo eb' xcani, 'ix checx meltzjoc junjn eb' yuj Saúl 'a yatut.

³ Ax Jonatán 'ix smil jun c'aj eb' soldado filisteo 'a Gabaa. A eb' filisteo cha', 'ix yab' sb'a eb' yuj jun cha. Yuj cha, yajn̈ej xya'n win Saúl 'utz'xoc q'uen trompeta 'a smasnil yol yic israel, yic tzyamn sb'a eb' soldado smasnil.

⁴ Smasnil eb' israel 'ix yab' eb', chajtlto 'ix satx 'el jun c'aj eb' soldado filisteo yuj win Saúl. Yuj cha caw 'ix cot yowl eb' filisteo 'a eb' israel. Ax eb' israel cha, 'ix syamn sb'a eb' yet' win Saúl 'a Gilgal.

⁵ 'Ix syamn pax sb'a eb' filisteo yic tzya'n eb' owl yet' eb'. 'Ay lajn̈schawinc mil scaruaje eb' yic owal, waque mil eb' winc 'ay q'ue 'a yib'n̈ chej, niwnto pax eb' tzb'ey 'a yoc. 'Icha wal yarenail sti a mar, 'ixta eb'. 'Ix cot eb' axta sb'o eb' scamplamento 'a Micmas 'a stojlal 'aj tzq'uel c'u 'a Bet-avén.

⁶ A yic xyiln eb' israel to matz techj yuj eb' 'a eb' filisteo, caw x'och xiwc'ojlal 'a scal eb'. 'Ix 'at eb' sc'ub'c 'el sb'a 'a yoltc n̈aq'ue'en, 'a yoltc xab', 'a sat q'ue'en, 'a slot'l tenam yet' 'a yoltc ch'olan.

⁷ 'Ay pax eb' xc'axw 'ec' 'a a niwn a Jordán, 'ix c'och eb' 'a lum Gad yet' 'a lum Galaad, palta ax Saúl, an̈ja 'ayt 'ec' 'a lum Gilgal. A smasnil eb' soldado ajun yet'oc, caw tz'ib'x eb' yuj xiwlal.

⁸ Ax Saúl 'ix can 'a Gilgal uque c'u yic tztan̈wni sc'och win Samuel, yujto 'ixta yaj yaln can win 'a 'a. Palta ax x'aji, ma'ix c'och win Samuel cha, yuj cha, 'ix laj syamn 'och spax eb' soldado win rey cha.

⁹ Yuj cha, 'ix yaln Saúl 'ixtic: —'Ijec cot no xajmb'al 'oj 'ajxoc tz'a'oc, yet' no xajmb'al yic junc'ojlal, xchi. Xlajw cha, xya'n tz'a win no xajmb'al cha.

¹⁰ At wal cha, 'ix c'och Samuel. Yuj cha, 'ix 'elt Saúl scha winac, yic tzya'n stzatzl sc'ojol.

¹¹ Palta xyaln Samuel 'ixtc 'a 'a: —¿Tas wal xa b'o'o? xchi. —Yujto xwila wan laj s'at eb' soldado 'elc 'a in tz'ey, ach xo tic matz ach jaw 'icha yaj aln can sc'ual, ax eb' filisteo tox 'ix syam sb'a eb' 'a Micmas,

¹² yuj cha, 'ix in nani toq'ue tz'eml eb' yac' owl wet' 'a Gilgal tic, an xo mantzac wac' 'ab'enal in b'a 'a yol sc'ab' Jehová. Yuj cha, 'ix wa'n pural wa'n tz'a no xajmb'al tic, xchi Saúl cha.

¹³ Yuj cha, xyaln Samuel 'a Saúl 'ixtic: —¡Yuj a man̈ nab'enal 'ix a b'on jun tic! Ma'ix a yiclj tas xyal Jehová qui Diosalec 'ayach. Al to ma'ay, ach ya'cn 'och Jehová reyl 'a scal eb' quit israelal tic 'a jun 'ejmn̈ej.

¹⁴ Al ticnec, man̈ najtloc 'oj ac' reyal. A Jehová 'oj saync junc xo mach to tzyiclj tas tzyala, a 'oj ya'ch yajlil a jeloc, yujto ma'ix a yiclj tas tzyal schecnb'il, xchi.

¹⁵ Xlajw cha, 'ix 'elx Samuel 'a Gilgal, 'ix c'ochx can 'a Gabaa 'a yol yic Benjamín. Ax Saúl 'ix sb'isn eb' soldado ajun yet' cha, 'aym waque'oc ciente eb' 'a smasnil.

¹⁶ Ajun pax jun yunnal yet'oc, atn win Jonatán, yet' pax eb' soldado cha, 'ix 'atcn eb' 'a Gabaa 'a yol yic Benjamín, palta ax eb' filisteo ata 'ay scamplamento eb' 'a Micmas.

¹⁷ 'Oxmacn̈ xyutj 'el sb'a eb' filisteo cha, yic tz'at yi'nc 'ec' eb' tas 'ay 'a eb' israel, jun macn̈ eb' x'atcn 'a Ofrá 'a yol yic Sual,

¹⁸ ax jun macn̈ xo eb' x'atcn 'a Bet-horón; ax eb' yic yoxmacn̈il, 'ix 'atcn eb' 'a lum span̈nil yic Zeboim, 'a 'aj tz'el yich lum cusltac lu'um.

¹⁹ A 'a smasnil yol yic chon̈b' Israel, may xon junc eb' tzb'on q'uen hierro 'ay ta', yujto yaljnac eb' filisteo 'ixtic: May cab' junc eb' hebreo tic tztac' sb'on q'uen espada, mto q'uen lanza, xchi eb'.

²⁰ A smasnil eb' israel, a yic tz'ec' ye jun tzo'n̈ sq'uen yamc'ab' eb', yowlal tz'at eb' 'a eb' filisteo yic tzn̈icx q'ue pax ye syamc'ab' eb' cha, 'icha q'uen arado, q'uen 'azaron, q'uen ch'acab', yet' q'uen jos.

²¹ A stojl sn̈icnb'il q'ue ye q'uen arado chi yet' q'uen 'azaron yuj eb' filisteo cha, chab' q'uen cotc tumn plata tzc'an eb', ax yuj q'uen ch'acab' yet' yuj pax q'uen tztecx 'och 'a no wacax yic tzb'eyx no', jun q'uen yune tumn plata tzc'an eb'.

²² Yuj cha, cojn Saúl yet' Jonatán, cojn eb' yet' slanza yet' yespada, ax eb' soldado ajun yet' eb', may yic eb'.

Ya'jnac ganar Jonatán owl 'a Micmas

²³ Ax eb' filisteo cha, xya'ch eb' smacmal jun b'e lot'n sat tz'ec' 'a sch'olnal Micmas.