A Ch'an̈ B'ab'el Libro Samuel 11 - Chuj San Sebastian Bible

'Ajxnac ganar eb' amonita yuj Saúl

¹ Xlajw cha, 'ix cot Nahas win sreyl Amón yet' eb' soldado yic tzya'n owl 'a chon̈b' Jabes 'a yol yic Galaad. Palta xyaln smasnil eb' syajlil eb' cajn 'a Jabes chi 'ixtc 'a Nahas: —B'o junc a trato quet' on̈, tzlajw cha, tzon̈ 'och a checb'oc on̈, xchi eb'.

² 'Ix ta'w Nahas chi 'ixtic: —Tzin b'o jun in trato eyet'oc, cojn toto tzchaj e c'ojl wi'n 'elt junjnoc yol e sat 'a e wach' junjn ex, sec 'ixta 'oj 'aj yel e q'uixwel yet' eb' eyit israelal, xchi.

³ Yuj cha, 'ix ta'w eb' yichmtac wincal chon̈b' Jabes 'ixtic: —'Ac' qui tiempo uque'oc c'u yic tzca'n 'at qui checb' 'a smasnil yol smacb'en qui chon̈b' an̈ israel on̈ tic. Toto may mach 'oj jawc colwjoc quet' on̈, toto 'ixta', tzca'ch qui b'a 'a yol e c'ab', xchi eb'.

⁴ A yic xc'och eb' checb' chi 'a Gabaa, atn jun chon̈b' chi 'aj cajn 'ec' Saúl, 'ix yaln eb' schecnb'il chi 'a eb' 'anma cajn 'ec' ta'. Yuj cha, 'ix 'oc' chan̈ eb' 'anma chi smasnil.

⁵ Wanto wal cha, 'ix c'och Saúl, spet 'a smunljel, pechb'il jun tzo'n̈ mam wacx yu'uj. Yajn̈j wal cha, 'ix sc'anb'n 'ixtic: —¿Tas tz'i'n eb' 'anma tic yuj chi tz'oc' eb'? xchi. 'Ix yaln eb' 'anma smasnil tas xwul yal eb' winc 'aj Jabes chi 'a eb'.

⁶ A yic xyab'n Saúl jun tzo'n̈ paxti cha, caw x'och Yespíritu Dios yet' spoder 'a 'a; yuj cha, caw xcot yowl Saúl chi si'mb'il.

⁷ 'Ix yi'n cot chawn̈ no mam wacax, scotc tzu'n 'at no', 'ix ya'n no 'a jun tzo'n̈ eb' schecab', yic tz'ec' sch'oxnc eb' 'ilxoc no 'a smasnil yol smacb'en eb' yit israelal. Tzlaj 'ec' yalnc eb' checb' chi 'ixtic: 'Ixtc wal 'oj 'aj swacx mach ma'oj 'och tza'n yuj Saúl, yet' pax Samuel, yic 'oj 'at eb' 'a owal, xchi eb'. 'Ix jaw jun niwquil xiwlal 'a yib'n̈ eb' 'anma chi smasnil yuj Jehová. Junxn̈ej xyutj sb'a eb' smasnil, 'ix wul ya'nc 'och sb'a eb' yet' eb'.

⁸ Ax yic sb'isn Saúl eb' soldado chi 'a Bezec, 'ay lajn̈schawinc mil eb' 'ay 'a yol yic Judá. 'Oxe ciente mil eb' syam sb'a 'a jun tzo'n̈ xo 'in̈tal eb' israel cha, 'ix 'och tza'n eb' yu'uj.

⁹ 'Ix yaln Saúl 'a eb' checb' yic Jabes chi 'ixtic: —Alc 'a eb' 'aj Jabes cha, to a q'ui'n 'a chimc'ual, 'oj 'at qui col eb' on̈, xchi. Xlajw cha, 'ix 'at eb' checb' chi 'at yal jun tzo'n̈ tic 'a eb' 'aj Jabes cha; yuj cha, caw 'ix tzalj chan̈ eb'.

¹⁰ 'Ix yaln 'at eb' 'ixtc 'a win Nahas, atn win 'ajc'ojl yajch 'a eb': —A q'uic'an, tzca'ch qui b'a 'a yol e c'ab' on̈, yic tze b'on tas tze nib'j tzon̈ eyutj on̈, xchi eb'.

¹¹ Ax 'a junx c'u 'a yic 'ayt sacb'i, yic q'ui'to, 'ix syamn 'och Saúl spojn 'el eb' soldado, 'ox c'aj xyutj 'el eb'. 'Ayt wal sacb'i, xc'och eb' 'at smil cham eb' amonita cha, masnto 'a yic x'och chimc'ual. Ax eb' ma'ix chami, sactzicnac s'at eb' 'eloc, may 'ajtil yamn 'ix 'ajcn chawn̈oc eb'.

¹² 'Ix yaln eb' 'anma chi 'a Samuel 'ixtic: —¿Mach eb' xalni, to man̈ smojc yoch Saúl tic qui reyloc? 'A'c cot jun tzo'n̈ winc chi 'ayn̈ 'a tic, to 'oj qui milc cham eb', xchi eb'.

¹³ Palta xyaln Saúl 'ixtic: —A 'a jun c'u tic, may junc 'anma tztac' schami, yujto a Jehová on̈ colnec 'el ticnec, xchi.

¹⁴ 'Ix yaln pax Samuel chi 'ixtc 'a smasnil eb' chon̈ab': —Coyc 'a Gilgal, yic tz'at swach' chanoc Saúl tic yopiso yoch reyal, xchi.

¹⁵ Yuj cha, 'ix 'at smasnil eb' 'anma chi 'a Gilgal cha, 'ix syamn sb'a smasnil eb' 'anma 'a yojltac Jehová ta'. 'Ix swach' 'a'n can 'och eb' yopiso Saúl yochcn reyal. Xlajw cha, xya'n tz'a eb' no xajmb'al yic junc'ojlal 'a yojltac Jehová, ax Saúl yet' smasnil eb' chon̈ab', caw 'ix tzalj eb'.