A Ch'an̈ B'ab'el Libro Samuel 1 - Chuj San Sebastian Bible

Ya'jnac Dios jun yune 'ix Ana

¹ A 'a chon̈b' Ramataim 'a yol slum eb' yin̈tl Efraín, ata cajn jun winc Elcana sb'i. Yunnal win Jeroham, yixchicn Eliú, schab'l 'ichicn win Tohu, win yunnal Zuf cajn 'a scal eb' yic Efraín.

² A win tic, chawn̈ yistzil winac, Ana sb'i jun 'ix, Penina sb'i junx 'ix. A 'ix Penina cha, 'ay yune 'ix, ax pax 'ix Ana cha, may yic 'ix.

³ 'A junjn ab'il tzxit'c win Elcana chi 'a schon̈b' 'at yac' xajmb'al 'a Jehová tztac' yuj smasnil, atn 'a chon̈b' Silo. Ata 'ay chawn̈ eb' ya'mal 'och sti eb' 'anma 'a Dios, atn Hofní yet' Finees. A eb' cha, yunnal win Elí.

⁴ A yic tz'at ya'nc win Elcana chi xajmb'al, tzya'n can win jab' no xajmb'al chi schi 'ix Penina cha, yet' 'a eb' yunnal yet' 'a eb' yisil, tzya'cn win yic junjn eb'.

⁵ Palta ax 'a 'ix Ana cha, a no chib'j caw wach' tzya'cn win 'a 'ix, yujto caw wal 'ay schamc'ojlal win 'a 'ix, wach'xam may yune 'ix tzyac' Jehová.

⁶ Caw tu tzyal 'ix Penina chi 'a 'ix yic tzya'n 'ix cus sc'ojl 'ix Ana cha, yujto may junc yune 'ix tzyac' Jehová.

⁷ 'Ixtan̈ej tzyutj sb'a 'a junjn ab'il, a yic tzxit'c eb' 'a scajnub' Jehová. A 'ix Penina cha, caw wal tzb'uchwj 'ix 'a 'ix Ana cha, yuj cha, caw tz'oc' 'ix, man̈xtzac wa 'ix.

⁸ Yuj cha, sc'anb'n win Elcana chi 'a 'ix 'ixtic: ¿Tas yuj tzach 'oc' Ana? ¿Tas yuj matz ach wa yuj a cusc'ojlal cha? ¿Tom man̈ wach'c waj et'oc, 'icha 'a yic 'ay lajn̈wan̈oc one'? xchi winac.

⁹ 'Ay jun 'ejem 'ayc' eb' 'a Silo cha. A yic xlajw swa eb', 'ix q'ue wan 'ix Ana cha, 'ix 'at 'a scajnub' Jehová. Ax 'a yol sti smac jun cajnub' cha, ata wocn 'ejm win Elí, win ya'mal 'och sti eb' 'anma 'a Dios.

¹⁰ Ax yic xc'och 'ix ta', caw wal ji'jmtac yoc' 'ix, syamn 'och 'ix sleslwi.

¹¹ Xya'n can 'ix sti 'a Jehová 'ixtic: Mamin Jehová caw wal tztac' oj smasnil. Toto smoj wal eln 'och in cusc'ojlal an a checb' in tic, tzin a nan coti. Comnoc tz'el wal a c'ojl a'n junc wune winc 'unin. A jun wune cha, tzwac' pax eco'oc 'a smasnil tiempo yic tzach ya'n servil. Ma'oj joxxoc 'el xil sjolom, sec a tzch'oxn 'eli to ec yaji, xchi 'ix.

¹² Caw najt hora xleslwi 'ix ya' sb'a ax win Elí wan smaclni win yil yib'x sti 'ix.

¹³ A 'ix Ana cha, mun a spixn 'ix tzleslwi, matz 'ab'x tas tzyal 'ix, cojn sti 'ix tz'ib'xi. A snan win Elí to 'u'm 'an̈ 'ix,

¹⁴ yuj cha, 'ix yaln win 'a 'ix 'ixtic: —¿B'a'n̈to wal tzactj o'n te 'an̈ tic? 'Actj o'n te', xchi winac.

¹⁵ —May mamin, man̈ in 'u'moc 'an̈, to 'ay wal in cusc'ojlal tzwul wal 'a yojltac Jehová.

¹⁶ Man̈ a na to tu tas wan in b'on an a checb' in tic, yujto at 'ijnoc in leslwi tic yuj jun in q'uixwc'ojlal yet' pax yuj in cusc'ojlal, xchi 'ix.

¹⁷ —Paxn̈ 'a junc'ojlal ach 'ix, a cab' qui Diosalec an̈ israel on̈c tic 'oj yac' tas xa c'an 'a 'a, xchi win Elí cha.

¹⁸ —Yuj wal dios 'ayach, xchi 'ix 'a winac. Xlajw xoj cha, 'ix pax 'ix 'a 'aj 'ay sposada cha, 'ix wa 'ix 'a tzaljc'ojlal, man̈x 'a scusc'ojlal 'ix.

¹⁹ Ax 'a junx c'u caw 'ix seb' q'ue wan eb', xleslwi can eb' 'a Jehová, 'ix pax eb' 'a yatut 'a Ramá. Xlajw cha, xway win Elcana chi yet' 'ix Ana cha, 'ix snan cot Jehová tas c'anb'il yuj 'ix 'a 'a.

²⁰ 'Ixta x'aj scuchn chan̈ 'ix yune'. Ax yic xc'och stiempoal, 'ix 'alj jun swinc 'unn 'ix, xya'n sb'ic Samuel. Xyaln 'ix 'ixtic: A win 'unn tic to c'anb'il win wuj 'a Jehová, xchi 'ix.

²¹ 'Ix c'och sc'ul s'atx win Elcana chi yet' eb' yunnal yet' eb' yistzil 'a chon̈b' Silo, 'icha xon tzyac' 'a junjn ab'il yic tz'at ya'nc xajmb'al ta'wb'il yuj 'a Jehová, 'icha yaj sleyal.

²² Palta ma'ix 'at 'ix Ana chi yet' eb', xyaln 'ix 'a win yichmil chi 'ixtic: —A ticnec ma'oj in 'ati, masnto 'oj 'el win 'unn tic 'a yim. 'Ixta to b'i'an, ax 'at wa'nc can win 'a yojltac Jehová, ax scan win ta 'a jun 'ejmn̈ej, xchi 'ix.

²³ 'Ix ta'w win yichmil 'ix chi 'a 'ixtic: —B'o cab' 'icha tzal cha. Wach' ajcn yet' winac, masnto tz'el win 'a yim, cojn to tzcolwj Jehová et'oc yic tza'n 'el'choc tas 'ix ac' a ti a'n 'a 'a, xchi win Elcana cha. 'Ixta x'aj scan 'ix yet' win 'unn cha, 'ix sq'uib'tzani, masnto x'el win 'a yim.

²⁴ Ax yic x'el win 'unn chi 'a yim, a win smam win 'unn cha yet' snun winac, 'ix yi'n 'at eb' win 'a scajnub' Jehová 'a Silo, caw wal yune to winac. 'Ix yi'n 'at eb' jun no quelm wacx 'oxe ab'il sq'uinal, jun 'echtab' 'ixm trigo yet' jun no tz'um b'ut'n yet' yal uva.

²⁵ Xlajw cha, 'ix smiln cham eb' no quelm wacx chi xajmb'al-l 'a Jehová, xya'n can eb' win 'unn chi 'a win Elí.

²⁶ Xyaln 'ix Ana chi 'ixtic: —Mamin 'ichm winac, 'ac' wal niwnc'ojlal 'ayin, wal yel an ton tic wulnc in 'ec' 'a a tz'ey 'a jun 'el, yic in leslwi 'a Jehová.

²⁷ Yuj ton win 'unn tic in leslwi cha, ax Jehová 'ix 'el 'a sc'ojl ya'n tas 'ix in c'an 'a 'a.

²⁸ Ax ticnec, to tzwul wa'cn win yico'oc Jehová, yaln̈ej jantc tiempo 'oj yil winac, xchi 'ix. Xlajw cha, x'em n̈ojnjoc win yaln sb'a 'a Jehová.