A Sb'ab'el Carta San Pedro 4 - Chuj San Sebastian Bible

Wach' tzcutjec qui c'anlb'an copiso

¹ Caw xyab' Cristo syal yet' sniwnal yic xchami. Yuj cha, qui na'ec, to chamnc on̈c xo pax jun xo. Yujto a eb' chamnac, man̈xtzac sb'o eb' maysch'olnil.

² Yuj cha, 'ixta cab' tzcutjec qui b'a, sec wach' 'oj qui b'oc 'icha tznib'j Dios, ya' sb'a 'ayn̈ect 'ec' 'a yolyib'n̈q'uinl tic. Man̈x 'oj qui b'oc 'icha tznib'j qui niwnalec tic.

³ A 'a yic yalan̈, niwn tiempo e b'ojnac jun tzo'n̈ tas 'aj 'aych snab'en eb' man̈ 'ojtnacoc Dios. Palta can cab' jun tzo'n̈ chi ticnec. Yujto a 'a jun tiempoal cha, cojxn 'ajmulal e b'ojnac, cojn maysch'olnilal e nib'jnac 'ochi. 'U'm ex 'an̈, toxn̈ej tzex laj somlji ta'. Til wal 'an̈ eyu'jnac. An̈jtona', eyaljnac e b'a 'a jun tzo'n̈ tzalx 'och diosal, a jun tzo'n̈ cha, caw man̈ smojoc.

⁴ Ax eb' man̈ 'ojtnacoc Dios, tzsat sc'ojl eb' ticnec, yujto man̈xtzac e mol b'oj jun tzo'n̈ caw maysch'olnil chi yet' eb'. Yuj cha, tzb'uchwj eb' 'ayex.

⁵ Palta yowlal 'oj yal q'uet eb' smul 'a Dios. Yujto lista xo yaj sb'eyc'ojlan smasnil 'anma', eb' pitzan yet' eb' chamnc xo.

⁶ Yuj wal jun tic, alb'il can wach' 'ab'x 'a eb' chamnc xo. Yuj cha, wach'xam xcham sniwnal eb' yuj sb'eyc'ojlal Dios, 'icha tz'aj smasnil 'anma', palta ax spixn eb', tztac' schan sq'uinal, 'icha Dios 'ay sq'uinal.

⁷ A ticnec, jab'xoj 'oj lajwc 'ec' smasnil tas. Yuj cha, caw lista tzcutjec qui b'a. Te'n tzcutjec qui nab'en qui leslwi.

⁸ Ax junx 'oj walb't 'ayx tic, to caw tzlaj qui chamc'ojloquec qui b'a yet' smasnil qui c'ojol. Wach'xam caw niwn smul junc xo mach 'ayn̈ec, toto 'ay qui chamc'ojlalec, 'oj ca'c niwnc'ojlal 'a 'a.

⁹ Ca'c sposada eb' quit creyenteal tzlaj 'ec' 'ayn̈ec, palta man̈oc cab' yet' qui chab'c'ojlal.

¹⁰ Tzlaj ca'laquec servil 'ayn̈ junjn on̈ec, a tzyala, tastc copiso tz'ajx yuj Dios. Toto 'ixta', wach' tzcutjec qui c'anlb'an copiso cha. Yujto chucch copiso tzyac' 'ayn̈ junjn on̈ yuj swach'c'ojlal.

¹¹ Toto 'ayn̈ec tztac' caln 'eli, a cab' spaxti Dios tzcalc 'eli. Toto 'ayn̈ec pax tzon̈ 'a'w servil, caw yelc'ojlal tzon̈ munljec, yujto a Dios tz'a'n quip. Wach' tzcutjec qui b'on smasnil tas, sec 'oj alxoc wach' paxti 'a Dios yuj Jesucristo. Alx cab'i' to caw niwn yel'chi, niwn spoder 'a smasnil tiempo. 'Ixta cab' tz'aji.

Tzlaj cab' syal yuj qui creyenteal

¹² Ex chamc'ojlb'il wu'uj, a yic tzon̈ 'ajx prowal yuj jun tzo'n̈ yailal caw ya, matz tac' sat qui c'ojlec yu'uj. Man̈ qui na'ec, to may 'aj tzjaw xon jun tzo'n̈ cha.

¹³ Palta caw tzalj coyec, yujto junxn̈ej tzon̈ 'ajc cab'n syal yet' Cristo. Toto 'ixta tzcutjec qui b'a, a yic 'oj quilnec sjaw Cristo 'a scal stzictznial, caw 'oj wach' 'ajxc qui tzaljc'ojlalec.

¹⁴ Toto 'ay eb' tzon̈ b'uchnec, yujto 'aych qui nab'enec 'a Cristo, caw tzaljc'ojlal quiquec. Yujto a Yespíritu Dios, atn jun caw niwn yel'chi, a cajn 'och 'ayn̈ec. [A eb' cha, tu tzyal eb' 'a spatc Cristo. Palta an̈ec xo tic, niwn yel'ch 'a qui satec.]

¹⁵ Toto 'ayn̈ec tzcab'c syail, man̈ yujoc cab' ma'j cham 'anma', man̈ yujoc cab' 'elc'al, man̈ yujoc cab' junc tas 'ay yowlal yuj eb' yajal, man̈ yujoc cab' to tz'at qui comn 'a'c 'och qui b'a 'a junc 'aj may calnec quico'.

¹⁶ Palta toto 'ayn̈ec, yujn̈ej to yic on̈c Cristo tzcab'nec syail, man̈ on̈ q'uixwoc. Calc wach' paxti 'a Dios, yujto yic on̈c xo Cristo.

¹⁷ Tox 'oj jawc stiempoal sb'eyc'ojlax smasnil 'anma'. An̈ec yunnaln̈ec xo Dios, 'oj qui b'ab'l b'eyc'ojlaxi. Toto tzon̈ b'ab'l b'eyc'ojlax an̈ec tic, ¿ocxom wal eb' matz yiclni xon jun wach' 'ab'x yic Dios?

¹⁸ An̈ec tojl xo qui nab'en, teb'il 'oj qui colchjec. Toto 'ixta 'oj cajc an̈ec tic, ¿ocxom wal eb' may yel'ch Dios 'a sat, yet' eb' maysch'olnil sb'eyb'al?

¹⁹ Yuj cha, a yic tzjaw junc yailal 'a quib'n̈ec 'icha tznib'j Dios, yowlal an̈ja wach' tzcutjec qui b'eyb'al. Tzca'nec qui b'a 'a yol sc'ab' jun b'ojnacn̈ec, yujto a jun cha, tz'el'chn̈ej tas tzyala.