A Sb'ab'el Carta San Pedro 2 - Chuj San Sebastian Bible

¹ Yuj cha, yowlal tze wach' 'actj can jantcn̈ej tas maysch'olnil. Man̈x eyixtc paxti junc 'anma'. Man̈x chab'satoc tzeyutj e b'a. Man̈ ex chichnc 'och 'a junc mach yuj tas 'ay 'a 'a. Man̈ ex b'uchwjc 'a spatc junc xo mach.

² 'Icha junc tz'ulc 'unn tznib'j yim, 'ixta cab' e nib'n jun cuynb'il yic Dios, atn jun may jac spaltail, sec 'oj 'och ste'nal e nab'en yu'uj, ax e wach' colchji.

³ Yujto xeyojquej 'eli, to caw wach' Cajlil 'ayn̈ec.

A Cristo, lajn 'icha junc q'ue'en

^4-5 Qui nitzc 'och qui b'a 'a stz'ey Cajlilec. 'Icha tz'aj yajx q'ue jun tzo'n̈ qu'en 'a yib'n̈ junc niwquil q'uen to yipnub' n̈a yaji, 'ixta cajc 'a 'a. A jun q'uen tic, tzyal 'el'chi atn Cristo. A eb' 'anma', spatquiljnac can 'el eb'. Palta a Dios, a si'jnac can 'eli. Caw niwn yel'ch 'a sat. A Cristo tic, pitzan, pitzn on̈c yet' jun xo. Yuj cha, an̈ec tic, tzon̈ ya'c 'och Dios yatutoc. A ticnec, 'ay calnec quic mun xoj tzca'c 'och qui ti 'a 'a, yujto an̈j 'ayn̈ec yico'. Yuj Jesucristo tztac' ca'nec jun tzo'n̈ xajmb'al 'a Dios 'a 'esal. Caw tzalj yet' jun tzo'n̈ cha.

⁶ Yuj cha, 'ixtc yaj yaln can Dios 'a Ch'an̈ U'un̈: An 'oj wa'cn 'och jun q'uen q'uen yipnub'alc yich n̈a 'a Sión. A jun cha, sic'b'il 'el wu'uj, caw niwn yel'chi. A mach 'oj ya'ch jun chi yipc sc'ojol, ma'oj somchjc 'el yu'uj, xchi 'a Ch'an̈.

⁷ An̈ec tzca'c 'och qui c'ojl 'a 'a, caw niwn yel'ch 'ayn̈ec. Palta 'ay pax eb' matz ya'ch sc'ojl 'a 'a. Yuj eb' cha, tzyaln pax 'ixtc 'a Ch'an̈ U'un̈: A q'uen q'uen 'ix spatquilj can 'el eb' b'om n̈a, atn q'uen 'ix wach' 'ajx 'och yopiso, xchi.

⁸ Tzyaln pax junx tic 'ixtic: 'Icha junc q'uen 'aj tztench eb' 'anma yoc, tztelw eb' yu'uj, 'ixta 'oj 'aj 'a sat eb', xchi 'a Ch'an̈. Yujto 'ixta Cristo 'a sat eb' matz ya'ch sc'ojl 'a 'a. Ton̈j tzsomchj 'el eb' yu'uj, yujto matz yiclj eb' spaxti'. Yictax pecti', checl xon yaj eb', to 'ixta 'oj yutc sb'a eb'.

Yic on̈c xo Dios ticnec

⁹ Palta an̈ec xo tic, junxn̈ej quin̈tl qui masnil 'a sat Dios, yujto sic'b'iln̈ec xo 'el yu'uj. 'Ayx copisoec ca'n 'och qui ti 'a Dios, tzca'nec servil qui Reyal. Caw junxn̈ej chon̈b'al cajc 'a sat Dios. Cojn wal 'a tzca'c servil. Yic on̈c xo qui masnil ticnec. 'Ixta tzon̈ 'ajec, sec wach' calnec 'eli, chajtlto man̈ jantcoc swach'l Dios. Yujto a on̈ 'awtnec 'elt 'a scal q'uic'q'uinal, yic on̈ 'ochc 'a jun sacq'uinl caw wach', atn jun yico'.

¹⁰ A 'a yic yalan̈, man̈ on̈ schon̈b'oc Dios. Palta ax ticnec, schon̈b' on̈c xo. A 'a yic yaln̈ cha, may mach x'o'ch sc'ojl 'ayn̈ec. Palta ax ticnec, atn Dios tz'o'ch sc'ojl 'ayn̈ec.

Yowlal cojn Dios tzca'c servil

¹¹ Ex chamc'ojlb'il wu'uj, man̈ qui chon̈b'oquec yolyib'n̈q'uinl tic, yujto ton̈j 'e'lb'a que'c 'a 'a. Yuj cha, tzin tew 'at 'ayex, caw man̈ e b'o jun tzo'n̈ tas tznib'j 'och e niwnal. Yujto a jun tzo'n̈ cha, caw tzon̈ juw 'el yu'uj.

¹² Caw wach'n̈j tzcutjec qui b'eyb'al yil eb' mant 'ojtnacoc Dios. A ticnec, tzyal eb' to maysch'olnil tzcutjec qui b'a. Palta toto tzyil eb' qui wach' b'eyb'alec, 'oj yal eb' wach' paxti 'a Dios yic 'oj jawoc.

¹³ Yuj e chamc'ojlal 'a Cajlil, smoj yiclum tzeyutj e b'a 'a jantcn̈ej mach 'ay yopiso yuj eb' 'anma'. Tzeyiclj tas tzyal eb' rey, eb' tz'a'n mandar smasnil.

¹⁴ Tzeyiclni pax jun tzo'n̈ xo eb' yajal, yujto 'ac'b'il yopiso eb' yuj eb' rey cha, yic tzya'n 'och eb' syailal eb' matz yiclni ley cha. Tzyaln pax eb' wach'l eb' wach' sb'eyb'al.

¹⁵ Tznib'j Dios, caw wach' tzcutjec qui b'eyb'al, sec wach' a eb' may snab'en, man̈x 'oj stac' yaln eb' jun tzo'n̈ tas may yel'ch 'a qui patquec.

¹⁶ An̈ec tic, libre xo cajec. Yuj cha, 'ixta cab' tzcutjec qui b'a. Palta matz tac' qui nanec, to tztac' qui comn b'onec maysch'olnil, yujn̈ej to libre cajec. Ocxo jun, qui nac coti, chajtlto on̈ 'ochc ya'malc servil Dios.

¹⁷ 'Ay cab' yel'ch junjn mach 'a qui satec. Tzqui chamc'ojlanc pax eb' quit creyenteal. Xiw coyc 'a Dios. Niwn cab' yel'ch pax win rey 'a qui satec.

Yab'jnac Cristo syal cujec

¹⁸ Ax xo moso eyaj 'a eb' e patron̈, yiclum tzeyutj e b'a. Niwn cab' yel'ch eb' 'a e sat. Man̈ cojnoc eb' wach' snab'en, eb' manso tzyutj sb'a 'aj tzeyiclej. Tzeyicljn̈ej pax 'a eb' tu snab'en.

¹⁹ Toto yujn̈ej 'aych qui nab'en 'a Dios, tzcomn 'ajx 'och yailal 'a quib'n̈ec, toto tzca'c techjoc, caw tzalj Dios quet'ec.

²⁰ Q'uinloc tz'ajx 'och junc yailal 'a quib'n̈ yuj junc maysch'olnil tzqui b'o'o. ¿Tom yujn̈ej tzca'c techjoc jun yailal cha, smoj tzon̈ alx wach'il? Caw ma'ay. Palta q'uinloc ton̈j tzcomn 'ajx 'och qui yailal yuj junc tas wach' tzqui b'o'o. Toto tzca'c techjoc jun yailal cha, atn jun chi caw wach' 'a sat Dios.

²¹ On̈ yawtjec 'och Dios yico'oc, sec tzcab'c syal yuj qui wach' b'eyb'alec tic. Yujto a Cristo, yab'jnac syal cujec. 'Ixta yutjnac sch'oxn swach' b'eyb'al 'ayn̈ec, sec a tzqui b'eylb'ejec.

²² A jun cha, may 'aj x'och jac smul. May jun 'ejmoc 'ix yixtj paxti junc 'anma'.

²³ A 'a yic 'ix b'uchwj eb' 'a 'a, ma'ix b'uchwj pax 'a eb'. Ax yic 'ix 'ajx pax 'och 'a syailal, ma'ix yala, to 'oj yac' spac 'a eb'. Ton̈j xyac' 'ab'enal sb'a 'a Dios, atn jun Juez caw tojol.

²⁴ A Cristo 'ix cuchn can qui mulc yet' sniwnal, yic x'och 'a spenc te culus, sec wach' man̈x 'a yaln maysch'olnil yic 'ayn̈ec, 'icha to chamnc on̈c 'a 'a. 'Ixta on̈ yutjec, sec caw wach'n̈j tzcutjec qui b'eyb'al. Caw xyab' syal cujec, sec tzon̈ colchjec can 'el yu'uj.

²⁵ A 'a yic yalan̈, lajn on̈c 'icha jun tzo'n̈ calnelu pucnc can 'ati. Palta ax ticnec, on̈ meltzjec cot 'a Quilmalec, atn jun tzon̈ tan̈wniec.