A Ch'an̈ B'ab'el Libro Yic Yab'ixal Eb' Rey 9 - Chuj San Sebastian Bible

Jun strato Dios yet' Salomón

¹ A yic xlajw sb'o 'el'ch jun yatut Jehová yuj Salomón, yet' jun sdespacho, yet' smasnil jun tzo'n̈ xo tas 'ix yac' sb'o'oc,

² 'ix sch'oxn sb'a Jehová jun 'ejm xo 'a 'a, 'icha yutjnac sch'oxn sb'a 'a chon̈b' Gabaón.

³ 'Ix yaln 'ixtic: 'Ix wab' tas 'ix al 'ayn yet' a lesal, yet' tas 'ix a c'an 'ayin. Tox 'ix in si'cn 'el jun n̈a tic wico'oc, yic tz'och 'emmquilal 'ayn 'a 'a. Caw 'aynn̈ej 'ec' ta 'a junjn c'u, 'oj in tan̈wcn̈ej 'a smasnil tiempo.

⁴ Yuj cha, wach'n̈j cab' tzotj a b'a yet' smasnil a c'ojol, 'icha yujtnac sb'a David, atn a mam. Tzin a'n 'och yipc a c'ojol, tzach b'ey wal 'a stojlal, tza yiclni smasnil tas 'ix wac' a b'o', tza yiclni pax jun tzo'n̈ in ley yet' jun tzo'n̈ in checnb'il.

⁵ Toto 'ixta tzotej, 'ayn̈j eb' en̈tl 'oj wa'ch reyl 'a chon̈b' Israel tic 'a smasnil tiempo, 'icha wutjnac waln can 'a a mam.

⁶ Palta toto ax tic yet' eb' eyunnal, 'oj eyi'l e b'a 'a in tz'ey, toto ma'oj eyiclc in checnb'il yet' in ley 'ix wa'cn 'ayex, ax 'a jun tzo'n̈ comn dios 'oj eyac' 'emmquilal, ax eya'n servil eb',

⁷ toto 'ixta', 'oj wi'l in chon̈b' Israel tic 'a sat lum lum wa'jnac can 'ayx tic. A jun n̈a 'ix in si'cn 'och wico'oc can tic, 'oj wi'cn 'el 'a wojltac, nachji ax ex sb'uchn smasnil eb' nacion̈.

⁸ A jun n̈a 'ix 'ochcn wico'oc tic, wach'xam caw nib'jub'tac ticnec, palta caw jun b'uln̈ 'oj 'aj slan̈chj can 'ejmi. A smasnil eb' 'oj 'ec' 'a stz'ey, caw 'oj sat sc'ojl eb' yilni, ax stzetzn eb' yilx 'ochi, ax yaln eb' 'ixtc junjn 'a 'a: ¿Tas laj yuj 'ixtc xyutj Jehová jun chon̈b' tic yet' pax jun yatut tic? 'oj schic eb'.

⁹ Ax yaln pax eb' 'ixtic: Yujto 'ix yactj can eb' Jehová sDiosal, jun x'i'n 'elt eb' smam yichm eb' 'a lum Egipto, ax 'a jun tzo'n̈ comn dios 'ix yac' eb' 'emmquilal, 'ix ya'n servil pax eb'. Yuj wal jun tzo'n̈ cha, 'ix ya'n cot Jehová jun niwquil yailal tic 'a yib'n̈ eb', 'oj schic eb', xchi Dios.

Jun tzo'n̈ xo tas sb'ojnac Salomón

¹⁰ Junc'l ab'il 'ix yac' Salomón ya'n b'o chab' niwc n̈a cha, atn jun yatut Jehová, yet' jun yatut winac.

¹¹ A Hiram win sreyl Tiro, a x'a'n stel jun tzo'n̈ n̈a chi 'a Salomón, atn te c'ute', yet' te c'u'taj yet' pax smasnil q'uen oro xc'anx 'a 'a. Ax rey Salomón 'ix 'a'n junc'l chon̈b' 'ay 'a yol yic Galilea 'a Hiram cha.

¹² A yic xwul yilnc win Hiram jun tzo'n̈ chon̈b' 'ix yac' Salomón chi 'a 'a, caw ma'ix schaj sc'ojol.

¹³ 'Ix yaln 'ixtic: ¿Tas cob' chon̈b'al jun tzo'n̈ xac' 'ayn tic ach in wach' c'ojol? xchi. Yuj cha, maysch'olnil 'ix ya'cn scuch jun lum chi 'aj 'ay jun tzo'n̈ chon̈b' cha, 'ixta xya'cn sb'ioc.

¹⁴ Ax q'uen oro xya' cot Hiram 'a Salomón, 'aym junc 90 quintal q'ue'en.

^15-24 'Ix ya'ch win rey Salomón eb' yin̈tl eb' cananeo 'a munljel 'a 'ac'b'il puralil, atn eb' man̈ chamncoc yuj eb' israel yic yi'n can 'ec' eb' slum eb' cananeo cha. Tzyal 'el'chi atn eb' amorreo, eb' hitita, eb' ferezeo, eb' heveo yet' eb' jebuseo. Moson̈ej yaj eb', man̈ yico'oc sb'a eb'. Yuj smunljel eb', 'ix sb'on win Salomón yatut Dios yet' yatut winac. Sb'ojnac pax eb' 'anma chi jun tzo'n̈ xo chon̈ab': atn Hazor, Meguido yet' Gezer. (A win sreyl Egipto, ya'jnacx win owl yet' chon̈b' Gezer cha, 'emnc yuj winac, smiln cham win smasnil eb' 'anma cajn ta', sn̈usn can pax win jun chon̈b' cha. A jun chon̈b' chi siyj can win 'a 'ix yisil, yic xnupn 'ix yet' Salomón. Ax Salomón chi 'ix b'on pax jun chon̈b' chi jun 'ejm xo yuj smunljel eb' cananeo cha.) An̈jtona', a pax eb' xyac' win b'onc chon̈b' Bet-horon jun 'ay 'a yaln̈ 'ejmi, Baalat, yet' Tamar, ata 'ay 'a lum cusltac lum yic Judá, yet' jun tzo'n̈ chon̈b' 'aj tzmolx tas tzc'uxxi, yet' jun tzo'n̈ chon̈b' 'aj 'ay no chej tz'och 'a jun tzo'n̈ caruaje yic owal. Sb'on pax eb' smasnil jun tzo'n̈ xo tas 'ix yac' Salomón sb'o eb' 'a Jerusalén, 'a Líbano yet' 'a smasnil yol smacb'en. A pax eb' lan̈jnac jun tzo'n̈ lum ch'olctac 'a stojlal 'aj tzq'uel c'u 'a Jerusalén. Sb'o eb' jun tic, yic tox 'ix 'el 'ix yisl win sreyl Egipto, 'ix yistzil win Salomón 'a yol Schon̈b' David, 'ix c'och cajn 'ix 'a yatut 'ix sb'o win 'a junx lugar. 'Ay 550 eb' winc 'aych yilmalc jun tzo'n̈ munljel cha. May junc eb' yit chon̈b' Salomón chi xyac' pural smunlj 'a jun tzo'n̈ munljel cha. A yic eb', to x'och eb' syajlilc eb' soldado yic tz'ijx b'ey eb' yuj eb', x'och eb' comandanteil, capitan̈il 'a jun tzo'n̈ caruaje, yet' 'a jun tzo'n̈ eb' soldado tz'ec' 'a yib'n̈ chej.

²⁵ A yic xlajw sb'o 'el'ch jun yatut Dios chi yuj Salomón, 'a junjn ab'il 'ox 'ejm tzyac' q'ue win no xajmb'al tz'a 'a yib'n̈ yet'l xajmb'al yic Jehová, yet' no xajmb'al yic junc'ojlal. Tzn̈usn pax win incienso yet'oc.

²⁶ Ya'jnac pax rey Salomón b'o jun tzo'n̈ barco 'a Ezión-geber, jun 'ayc' 'a stz'ey Elot 'a sti a Chac Mar, 'a lum lum yic Edom.

²⁷ 'Ix schecn cot win Hiram jun tzo'n̈ eb' smunljum 'a yojl eb' te barco cha, atn eb' caw yojc yec' 'a yib'n̈ a mar. 'Ix 'at eb' yet' jun tzo'n̈ eb' smunljum Salomón,

²⁸ 'ix c'och eb' 'a Ofir, axta x'ilchj q'uen oro yuj eb', 'ix yi'n cot eb' 280 quintal q'uen oro chi 'a rey Salomón cha.