A Ch'an̈ B'ab'el Libro Yic Yab'ixal Eb' Rey 6 - Chuj San Sebastian Bible

Sb'ojnac Salomón yatut Jehová

¹ A yic 480 ab'il yelt eb' israel 'a Egipto, a yic schan̈l ab'il xo yoch Salomón reyl 'a chon̈b' Israel, yic schab'l xo 'ujl schan 'el yich jun ab'il cha, 'a jun 'uj tzcuch Zif, ata schax 'el yich sb'o chan̈ yatut Jehová.

² A jun yatut Dios 'ix yac' b'o rey Salomón cha, 27 metro x'aj spac'b'il, b'aln̈e metro x'aj schiquin, nan̈l schan̈lajn̈il metro x'aj ste'il.

³ B'aln̈e metro x'aj yoc scoredoral, lajn x'aj schicn 'icha yatut Dios, ax sat scoredoral cha, nan̈l yol metro x'aji.

⁴ An̈jtona', 'ix ya'n b'o pax sventnual, lewn 'ix 'aj sat 'a yojol, ax 'a spatquil lot'an.

⁵ 'Ix ya'n 'ajxoc 'och yoyl jun tzo'n̈ cuarto 'a schapaq'uil 'a spatquil, yet' 'a schicn 'a spatquil yatut Dios cha.

⁶ 'Oxe piso x'aj't 'a cha'an̈, jun b'ab'l piso, chab' metro yet' 25 centímetro slewnal sat; ax schab'l piso, chab' metro yet' 70 centímetro slewnal sat, ax yoxl piso, 'oxe metro yet' 15 centímetro slewnal sat; jab'jnal 'ix 'aj satch 'a spac'b'il 'a spatic, sec wach' matz olx jun spac'b'il chi 'aj tz'och spatzb'il jun yatut Dios cha.

⁷ A yic 'ix 'el yich sb'o'i, wach' xon yaj eb' q'uen q'uen sb'o'i, tzeyb'ilx eb' q'ue'en. Yuj cha, a yic wan sb'o jun n̈a cha, man̈x 'a 'aj 'ix 'ab'x sc'an̈ q'uen martillo, q'uen ch'acab', yet' junc xo q'uen yamc'ab'.

⁸ A spuertail jun tzo'n̈ cuarto cha, a 'a stojlal sur tzcani, yic tzon̈ 'och 'a yojl jun yatut Dios cha, ax yic tzon̈ q'ue 'a schab'l piso, yet' a yoxl piso, 'ay sc'ochal.

⁹ A yic xlajw sb'o scajonal 'ix ya'n 'ajxoc q'ue spatzb'il, yet' te 'a'nte 'a yib'an̈, a jun tzo'n̈ te cha, nab'a c'ute'.

¹⁰ Sb'on pax jun tzo'n̈ cuarto 'a spatquil, chab' metro yet' 25 centímetro 'ix 'aj stel junjn piso. 'Ix q'ue spatzb'il xc'och tenn 'a jun n̈a cha, nab'a c'ute ste'al.

¹¹ Xlajw cha, 'ix yaln Jehová 'a Salomón 'ixtic:

¹² A yuj jun n̈a wan a b'on tic, toto tza'n ach 'ochn̈ej 'a spatquil in ley, tza yiclni in checnb'il, tza b'eylb'an smasnil in cuynb'il, toto 'ixta', 'oj wac' 'el'choc smasnil tas alb'il can wuj 'a a mam oj ach tic, atn David.

¹³ 'Oj in can cajn 'a e cal ax israel ex tic, ma'oj ex wactcani, xchi Dios.

¹⁴ A yic xlajw ya'n b'o win jun yatut Dios cha,

¹⁵ 'ix ya'n 'ajxoc 'och te 'a'nte to c'ute 'a sat smasnil yich jun n̈a chi 'a yojol, tzchaj 'el 'a yich, masnto 'ix q'ue'ch 'a yaln̈ patzab', 'ix 'em pax 'a'nte 'a yojol, c'u'tajn̈ej te x'ejmi.

¹⁶ An̈jtona', xya'n b'o jun cuarto 'a yol jun n̈a cha, 'a'nte c'ute 'ix 'och 'a 'a. Tzchaj 'el yich 'a sat lu'um, masnto 'ix q'ue'ch 'a yaln̈ patzab', b'aln̈e metro x'aj junjn spac'b'il. 'Ixtnta 'ix yutj ya'n b'o jun slugar Dios 'a yojol, atn jun Lugar cojn Dios 'ay yico'.

¹⁷ Ax junx 'ay 'a yojltac 'elt jun yet'l Dios 'a yol jun n̈a cha, wajxclajn̈e metro 'ix 'aj spac'b'il.

¹⁸ Ax 'a yol jun n̈a cha, c'ute 'aych 'a yojl smasnil, 'aych yixtal sat te 'a'nte cha, 'icha yilx sat te tzima, mto te nichte', 'ixta x'ajchi. May junc q'uen q'uen checl 'elta.

¹⁹ Caw wal wach' 'ix yutj Salomón sb'on jun Lugar to cojn Dios 'ay yic cha, sec ata tzcan scaxail strato Jehová 'a yojol.

^20-22 A jun Lugar to cojn Dios 'ay yico', b'aln̈e metro x'aj spac'b'il, b'aln̈e metro schiquin, b'aln̈e metro x'aj ste'il. Nab'a oro x'aj yojol, ax 'a yojltac 'elta, ata xyac' Salomón b'o jun yet'l xajmb'al b'ob'il yet' te c'ute', 'aych oro 'a 'a. 'Ix 'och q'uen cadena nab'a oro 'a spuertail.

²³ Xya'n b'o chab' yechl querubín 'a yojl jun Lugar to cojn Dios 'ay yic cha. A yet' te olivo 'ix b'o'i, nan̈l yol metro 'ix 'aj stel junjn eb',

²⁴ chab' metro yet' 25 centímetro stel junjn sc'axl eb', yuj cha, nan̈l yol metro tzmac chab' sc'axl junjn querubín cha.

²⁵ Lajnn̈ej stel sc'axl eb' schab'il, lajnn̈ej pax stel eb', lajnn̈ej pax x'aj eb' sb'o'i.

²⁶ Nan̈l yol metro stel chab' yechl querubín cha.

²⁷ 'Ix ya'n 'ajxoc 'och jun tzo'n̈ querubín chi 'a yojl jun Lugar to cojn Dios 'ay yico'. A eb' cha, jen̈n 'el sc'axl eb'. A sc'axl jun, tzc'och tenn 'a sat yich n̈a, ax sc'axl junx cha, tzc'och tenn 'a junx sat yich n̈a. Ax chab'x sc'axl eb' tzchaj sb'a 'a snan̈l yojl jun n̈a cha.

²⁸ An̈jtona', 'ix ya'n 'ajxoc 'och pax q'uen oro 'a jun tzo'n̈ querubín cha.

²⁹ 'Ix ya'n 'ajxoc 'och yechl querubín, yet' yechl te palma, yet' pax yechl te nichte' yelwnub'loc sat smasnil yich n̈a cha, 'a yojol yet' 'a spatquil.

³⁰ An̈jtona', 'ix ya'n pax 'ajxoc 'ejm oro 'a yib'n̈ te 'a'nte 'ay 'ejm 'a yojl jun yatut Dios cha, yet' pax 'a te 'ay 'ejm 'a spatquil.

³¹ Olivo spuertail jun yet'l Dios 'a yojol, ax te jolm puerta spacl 'aj tzchaj sb'a te'.

³² Olivo chab' spuertail cha, 'ix ya'n 'och yechl querubín, yet' yechl te palma, yet' pax yechl te nichte 'a te', 'ix ya'n 'ajxoc 'och q'uen oro 'a jun tzo'n̈ yixtal cha.

³³ An̈jtona', olivo pax te 'ix 'och spiraliloc 'a sti 'aj tzon̈ 'och 'a yojl yatut Dios cha, pachpmb'a 'ix 'aj te'.

³⁴ Ax te chapachn̈ puerta cha, c'u'taj te', palta tztac' slatz'n sb'a snan̈l te schab'il.

³⁵ 'Ix ya'n 'ajxoc 'och yechl querubín, yelwnub'loc te puerta cha, yet' yechl te palma, yet' pax yechl te nichte'. Xlajw cha, xya'n pax 'ajxoc 'och oro 'a jun tzo'n̈ yechl cha.

³⁶ Xya'n pax b'o smuroal stitc 'amac', 'ox tzol q'uen pachpmb'a q'uen 'ix latz'xi, ax junx tzol te patzb' c'ute 'ix 'ochi.

³⁷ Schan̈l ab'il xo yoch Salomón reyal, 'a jun 'uj tzcuch Ziv, 'ix 'el yich yejm yipnub'al yich yatut Jehová.

³⁸ Ax 'a yic yuxlchil ab'il yoch reyal 'a jun 'uj tzcuch Bul, swajxquil 'ujl 'a yol jun ab'il cha, 'ix lajw sb'o 'el'ch smasnil, 'icha wal yaj yechl 'a yun̈al. Uque ab'il 'ix yac' sb'o'i.