A Ch'an̈ B'ab'el Libro Yic Yab'ixal Eb' Rey 4 - Chuj San Sebastian Bible

Yopiso Salomón

¹ 'Ix 'och Salomón reyl 'a chon̈b' Israel.

² A eb' niwn yel'ch yopiso yet'oc, atn eb' tic: Azarías yunnal Sadoc, win ya'mal 'och sti eb' 'anma 'a Dios;

³ Elihoref yet' Ahías yunnal Sisa, atn eb' tz'ib'n yab'xil tas tzb'o win rey; ax Josafat yunnal Ahilud, yajtz'ib' win rey yaji;

⁴ Benaía yunnal Joiada, a 'aych syajlilc eb' soldado; ax Sadoc yet' Abiatar, ya'mal 'och sti eb' 'anma 'a Dios yaj eb'.

⁵ A Azarías yunnal Natán, a yajl yaj 'a scal eb' gobernador; Zabud yunnal pax Natán, ya'mal 'och sti eb' 'anma 'a Dios, ya'mal pax snab'en win rey yaji.

⁶ A Ahisar, mayltoma yaj 'a sdespacho win rey, yet' Adoniram yunnal Abda, a tz'iln eb' munljum, eb' to yowlal tzmunlji.

⁷ A Salomón cha, 'ay lajchwan̈ eb' sgobernador tz'a'n servil 'a yol smacb'en chon̈b' Israel. A yopiso jun tzo'n̈ eb' cha, junjn eb' tzyij cot eb' tas tzc'ux win rey yet' yunnal 'a yatut, junjn 'uj 'a yol ab'il.

⁸ A lajchwan̈ eb' tz'a'n servil cha, atn eb' tic: A yunnal Hur, a 'ajcuenta yi'n cot jun tzo'n̈ chi 'a jolmctac witz yic Efraín.

⁹ A yunnal Decar, a 'ajcuenta yi'n cot jun tzo'n̈ chi 'a jun tzo'n̈ chon̈b' tic: atn Macaz, Saalbim, Bet-semes, Elón yet' Bet-hanán.

¹⁰ A yunnal Hesed, a 'ajcuenta yi'n cot jun tzo'n̈ chi 'a Arubot, 'a Socó, yet' 'a smasnil yol yic Hefer.

¹¹ A yunnal Abinadab, a yistzil, atn 'ix Tafat yisl Salomón, a 'ajcuenta yi'n cot jun tzo'n̈ chi 'a smasnil yol smacb'en Dor.

¹² Baana yunnal Ahilud, a 'ajcuenta yi'n cot jun tzo'n̈ chi 'a Taanac, 'a Meguido yet' 'a smasnil yol yic Bet-seán. A jun cha, junn̈j yaj yet' Saretán 'a yaln̈ 'emt Jezreel, tzchaj cot 'a Bet-seán, masnto tzc'och 'a Abel-meholá, yet' 'a junx scaxpil yic Jocmeam.

¹³ A yunnal Geber, a 'ajcuenta yi'n cot jun tzo'n̈ chi 'a Ramot 'a yol yic Galaad yet' smasnil yaldea'il Galaad, to yic eb' yin̈tl Jaír yunnal Manasés. A pax 'ajcuenta 'a Argob, 'a yol yic Basán. Ata 'ay 60 niwc chon̈b' 'aych smuroal, broncen̈ej 'aych yijloc spuertail.

¹⁴ Ahinadab yunnal Iddo, a 'ajcuenta yi'n cot jun tzo'n̈ chi 'a Mahanaim.

¹⁵ Ahimaas, atn win nupnnac yet' 'ix Basemat yisl Salomón, a 'ajcuenta yi'n cot jun tzo'n̈ chi 'a yol yic Neftalí.

¹⁶ Baana yunnal Husai, a 'ajcuenta yi'n cot jun tzo'n̈ chi 'a yol yic Aser yet' 'a Alot.

¹⁷ Josafat yunnal Parúa, a 'ajcuenta yi'n cot jun tzo'n̈ chi 'a yol yic Isacar.

¹⁸ Simei yunnal Ela, a 'ajcuenta yi'n cot jun tzo'n̈ chi 'a yol yic Benjamín.

¹⁹ Geber yunnal Uri, a 'ajcuenta yi'n cot jun tzo'n̈ chi 'a yol yic Gad, atn 'a schon̈b' can Sehón sreyl can eb' amorreo, yet' Og sreyl can Basán. Cojn win chi yajl yaj 'a jun macn̈ lum lum cha.

Sjelnal yet' sricoal Salomón

²⁰ A eb' 'aj Judá yet' eb' israel, man̈x jantcoc sb'isl eb', lajn eb' 'icha yarenail sti a mar. Til wal tas tzc'uxxi yet' tas tz'u'xi, caw wal 'ay tzaljc'ojlal ta'.

²¹ A Salomón yajl yaj 'a yib'n̈ smasnil jun tzo'n̈ chon̈b' cha, tzchaj cot 'a a Eufrates, masnto tzc'och 'a schon̈b' eb' filisteo, yet' 'a 'aj tzlajw c'och sti smacb'en yic Egipto. A smasnil jun tzo'n̈ eb' cha, 'ix ya'n̈j eb' stojlb'al 'a Salomón, 'ayn̈j 'och eb' 'a yaln̈ schecnb'il winac.

²² A tas tzc'ux Salomón 'a junjn c'u yet' smasnil eb' 'ayc' yet'oc, 70 quintal 'ixm harina caw wach', 140 quintal jun tzo'n̈ xo comn harina,

²³ lajn̈wan̈ no mam wacx caw b'a'ch yajx servil, junc'l no tzcot 'a potrero, jun ciente pax no calnelu, chuc pax yaj smasnil c'aj e no c'ultquilchej, yet' pax no ch'ic caw b'a'ch yajx servil.

²⁴ A Salomón yajl yaj 'a yib'n̈ lum lum 'a stojlal 'aj tz'ejm c'u 'a a Eufrates, tzchaj cot 'a Tifsa, masnto 'a Gaza; a yajl 'a yib'n̈ smasnil sreyl jun tzo'n̈ chon̈b' cha, caw wal 'ay junc'ojlal 'a scal yet' jun tzo'n̈ nacion̈ 'ay 'a stz'ey.

²⁵ A 'a yol stiempoal yic pitzn Salomón, a smasnil yol yic Judá yet' Israel, caw junc'ojlal yaj eb' 'anma smasnil, tzchaj cot 'a Dan 'a stojlal norte masnto 'a Beerseba 'a stojlal sur. Junjn eb', mun 'ay yawb'ente eb' 'awb'il yuj 'a stz'ey yatut.

²⁶ An̈jtona', chan̈e mil scabayeriza Salomón 'aj 'aych e no schej, a e no tzto'n te caruaje yic owal, 'ay pax lajchwe mil soldado tzq'ue 'a yib'n̈ chej.

²⁷ Ax eb' gobernador tz'i'n cot tas tzc'ux win rey Salomón, yet' smasnil eb' 'aych 'a smexa winac, junjn eb' gobernador tzyij cot yic 'a junjn 'uj, 'ixta tzyutj eb', sec wach' may tas tzyac' palta.

²⁸ A mach 'aych 'a stzol-l yi'n cot jun tzo'n̈ cha, tzyij cot 'ixm cebada, yet' yan̈ no chej, yet' pax yic jun tzo'n̈ xo no 'ictzum noc', tz'at can 'a slugar 'aj 'ayc' cha.

²⁹ Man̈x jantcoc sjelnal Salomón 'ix yac' Dios. Til wal tas tznachj 'el yu'uj, man̈xtzac b'ischji.

³⁰ A sjelnal cha, caw 'ec'b'al 'a yib'n̈ sjelnal eb' 'aj Egipto, yet' 'a yib'n̈ eb' 'ay 'a stojlal 'aj tzq'uel c'u.

³¹ Yel xo jeln 'a yib'n̈ smasnil eb' winc b'inab'il yuj sjelnal: Atn Etán yin̈tl Zera, yet' 'a Hemán, Calcol, yet' pax 'a Darda, atn eb' yunnal Mahol. 'Ix 'ojcax 'el yab'xil 'a smasnil nacion̈ 'ay 'a stz'ey cha.

³² 'Ix yalcn 'el 'oxe mil paxti yic jelnal, sb'on pax 1,005 b'it.

³³ 'Ix yal yuj te te', yet' yuj c'ultac, tzchaj cot yaln yuj te c'ute 'ay 'a Líbano, masnto 'a te hisopo tzq'uib' 'a spatquil yich n̈a. An̈jtona', 'ix yaln yuj smasnil no noc', no ch'ic, no tzjuc sb'a 'a sat lu'um, yet' no chay.

³⁴ A 'a smasnil nacion̈ 'aj 'ix c'och yab'xil sjelnal Salomón, 'ix cot eb' 'anma yet' eb' rey, yic tzwul 'ab'xnoc eb' 'a 'a.