A Ch'an̈ B'ab'el Libro Yic Yab'ixal Eb' Rey 3 - Chuj San Sebastian Bible

Xnupn Salomón*r* yet' 'ix yisl win sreyl Egipto

¹ 'Ix nupn Salomón yet' 'ix yisl win sreyl Egipto, 'ixta x'aj yoch wach'c'ojlal 'a snan̈l chab' nacion̈ cha. 'Ix yi'n cot win 'ix, 'ix ya'n can 'a schon̈b' David, ya' sb'a wan swach' b'o yatut, yet' yatut Jehová, yet' pax muro tz'och oyn 'a spatquil Jerusalén.

² A 'a yic jun tiempoal cha, ata tz'at yac' eb' 'anma xajmb'al 'a jolmctac witz, yujto mantzac b'o yatut Jehová.

Tzc'an Salomón sjelnal 'a Dios

³ Caw wal tzchamc'ojlej Salomón Jehová, tzyiclni ley alb'il can yuj David 'a 'a, atn smam. Locn pax tz'at yac' xajmb'al yet' incienso 'a jolmctac witz,

⁴ tz'at ya'noc pax xajmb'al chi 'a Gabaón. Jun mil xajmb'al tz'at yac' tz'a ta', yujto niwn yel'ch jun lugar cha.

⁵ 'Ay jun 'ac'wal yic 'ayc' 'a Gabaón cha, 'ix sch'oxn sb'a Jehová 'a Salomón 'a waychil, 'ix yaln Dios 'a 'ixtic: C'an tas tza nib'j 'ayin, 'oj wac' 'ayach, xchi 'a 'a.

⁶ 'Ix ta'w Salomón 'ixtic: Ach tic Mamin, caw 'ay a chamc'ojlal 'a a checb' David, atn in mam, yujto yiclumn̈ej 'ix yutj sb'a 'ayach. Caw tojl 'ix yutj sb'a 'aych 'a smasnil sc'ojol, yuj cha, 'ix 'el 'a a c'ojol to an 'unnab'iln tic, in 'em wocn 'a sdespacho, 'icha ton wan yuj ticnec.

⁷ Ach tic Mamin Jehová, in Diosal ach, 'ix 'el 'a a c'ojl in a'n 'och reyl sjelc in mam, wach'xam quelm in to, mant 'a in jelnal.

⁸ Palta 'ayn xo 'och yilmalc a chon̈b' 'ix a si'cn 'el tic. A jun chon̈b' tic caw wal niwquil, man̈xtzac stac' sb'ischj eb' 'anma tic, til wal sb'isl eb'.

⁹ Yuj cha, tzin c'an 'ayach, to tzac' in jelnal, sec wach' 'oj stac' in b'onyaj jun chon̈b' tic, sec 'oj nachjoc 'el wu'uj, 'aj 'ay wach'il yet' tu'al. ¿Tas wal 'oj wutc wa'n cuenta jun a niwquil chon̈b' tic, toto ma'oj ac' in jelnal? xchi Salomón.

¹⁰ Caw schaj sc'ojl Jehová tas sc'an win rey cha,

¹¹ yuj cha, 'ix yaln Dios 'ixtic: Yujto a jun tzo'n̈ tic tza c'ana, man̈oc a q'uinal, man̈oc a ricoal, man̈ pax oc schaml eb' 'ajc'ojol, palta to a sjelnal a nab'en 'ix a c'ana, yic tzojcan 'el a'n cuenta in chon̈ab',

¹² yuj cha, 'oj wac' tas chi xa c'an cha. 'Oj wac' a jelnal, mant 'a mach lajn snab'en 'ix 'ec' 'icha ach tic, may pax junc xo tot 'oj 'och 'a yic 'oj lajwc stiempoal eco'.

¹³ Man̈ cojnocn̈ej a jelnal 'oj wac'a', palta 'oj wac' pax a ricoal yet' sniwquil-l el'chi, wach'xam ma'ix a c'ana. Ya' sb'a pitzn ach, may junc xo rey 'icha ach tic 'a scal smasnil eb' rey.

¹⁴ Toto 'oj a b'o tas tzin nib'ej, ax a yiclni in ley yet' in checnb'il, 'icha 'ix yutj syiclni a mam cha, toto 'ixta', 'oj wac' najtxb'oc a q'uinal, xchi Dios.

¹⁵ Ax yic 'ix 'el swayn̈ Salomón, 'ix yiln cot sb'a to swaych x'ochi. Ax yic 'ix japx 'a Jerusalén, 'ix c'och 'a yojltac scaxail strato Jehová, 'ix ya'n xajmb'al to tz'a smasnil, yet' xajmb'al yic junc'ojlal. Xlajw cha, 'ix ya'n 'och jun niwquil wa'el, xyawtn cot smasnil eb' 'aych yopiso wac yet'oc.

Sjelnal rey Salomón

¹⁶ A 'a yic jun tiempoal cha, 'ix c'och chawn̈ eb' 'ix 'ajmul 'ix 'a yojltac win rey.

¹⁷ 'Ix yaln jun 'ix 'a win 'ixtic: —¡'O'ltacn mamin rey! An tic yet' jun 'ix tic, junn̈j n̈a 'aj cajn on̈, a yic xc'och sc'ul yalj wune', 'ayc' 'ix wet' tic 'a te n̈a cha.

¹⁸ Schab'jil wal yalj wune cha, 'ix 'alj pax yic 'ix tic. Cojn on̈ qui chawn̈il 'a yol te n̈a chi 'on̈, may junc xo mach 'ayc' quet' on̈.

¹⁹ Palta ax 'a jun 'ac'wal, sc'an̈tzan cham 'ix yune tic, yujto chamnc 'ix swayi.

²⁰ 'Ix q'ue wan 'ix 'a chim'ac'wal, ya' sb'a waync in, 'ix yi'n chan̈ 'ix jun yune chamnc xo cha, 'ix wul sc'otnc can 'och 'ix 'a in tz'ey, ax jun wic pitzn tic, a xyij 'at 'ix 'a stz'ey sjelc yic cha.

²¹ Ax yic 'ayt sacb'i, 'ix wa'n chuw wune tic walni, ax xwilni to chamnc xo. Palta at wal yic 'ix caw sacb'eli, 'ix wilni to man̈oc jun wune cha, xchi 'ix.

²² 'Ix yaln junx 'ix chi 'ixtic: —Ma'ay, atn jun wune pitzn tic, a jun chamnc xo cha, eco', xchi 'ix. Palta 'ix ta'w pax 'ix xb'ab'l aln chi 'ixtic: —Ma'ay, ec jun chamnc xo cha, ax jun pitzn tic, wico', xchi 'ix. 'Ixta 'ix yutjn̈ej eb' sten sb'a 'a yojltac win rey.

²³ Xlajw cha, xyaln win rey 'ixtic: Tzyal jun 'ix tic to yic 'ix jun 'unn pitzn to tic, ax jun 'unn chamnc xo cha, eco xchi 'ix. ¡An̈jtona junx 'ix cha, 'ixta pax xyutj 'ix yaln a 'ix xb'ab'l aln cha! xchi win rey.

²⁴ Yuj cha, xya'n win rey 'ijxoc cot junc q'uen espada. A yic 'ix c'och q'ue'en,

²⁵ 'ix yaln win rey chi 'ixtic: —Polc 'ejm snan̈l jun 'unn pitznto tic, tzlajw cha, tzeya'n c'axpoc yic junjn eb' 'ix, xchi winac.

²⁶ Palta ax 'ix snun jun 'unn pitznto cha, caw 'ix 'och pitz'n cusc'ojlal 'a 'ix yuj jun yune cha, 'ix yaln 'ix 'a win rey chi 'ixtic: —¡Mamin rey! ¡'El cab' 'a a c'ojol, matz polx 'ejm snan̈l jun 'unn pitznto tic! ¡'Ajx cab' 'a 'ix tic! xchi 'ix. Palta 'ix yaln junx 'ix cha: —Matz can wet'oc, matz can pax yet' 'ix. ¡Polx cab' 'ejm snan̈al! xchi 'ix.

²⁷ Xlajw cha, 'ix yaln win rey chi 'ixtc 'a eb' winc cha: —Man̈ e mil cham jun 'unn pitznto tic, 'a'c 'a 'ix matz nib'n milxc cham cha, yujto caw yel yic 'ix, xchi win rey.

²⁸ 'Ix yab'n smasnil chon̈b' Israel, yuj tas 'ix yutj win rey sb'onyaj jun owl cha, yuj cha, caw wal niwn yel'ch win rey 'a sat eb', yujto 'ix 'ajx sjelnal yuj Dios, yic tzb'onyaj junc mach.