A Ch'an̈ B'ab'el Libro Yic Yab'ixal Eb' Rey 21 - Chuj San Sebastian Bible

Win Acab yet' slum win Nabot

¹ 'Ay jun win 'aj Jezreel, Nabot sb'i winac, 'ay jab' slum win 'aj 'ay yawb'en uva 'a stz'ey 'aj 'ay sdespacho win Acab, win rey 'a chon̈b' Samaria.

² 'Ay jun c'ual, 'ix yaln win Acab 'ixtc 'a win Nabot: —'Ac' jab' 'a lum 'ayin, sec ata tzwawj jac witaj, yujto stz'ey xon watut 'aj 'ay; ton̈j cab' tzin jel 'ayach, mto tzyal a c'ojl jun, tzin man 'ayach, xchi winac.

³ 'Ix ta'w Nabot 'ixtc 'a win Acab: —Matz tac'a, yujto matz chaj sc'ojl Dios tzin chon̈l in macl lum 'ac'b'il 'ayn yuj eb' in mam wicham, xchi.

⁴ Xlajw cha, 'ix pax win Acab 'a yatut, tzcus winac, caw wal tzowx sc'ojl yuj tas xyal win Nabot cha. Yuj cha, a yic 'ix c'och 'a yatut cha, 'ix 'ec' t'ocn 'a sat sch'at, ax 'a yich n̈a chi 'ix 'och q'uelan, ma'ix yal sc'ojl win xwa'i.

⁵ Xlajw cha, xjaw 'ix yistzil win 'a 'a, atn 'ix Jezabel, xyaln 'ix 'a win 'ixtic: —¿Tas yuj tzach cusi, man̈xtzac yal a c'ojl tzach wa'i? xchi 'ix 'a winac.

⁶ —Tzin cusi yujto ma'ix yac' win Nabot 'aj Jezreel jab' slum 'ayin, xchi winac.

⁷ —Ach tic sreyl ach Israel, q'uen̈ wa'an, wa'an̈, man̈ ach cusoc. Mun 'oj in na' tas 'oj 'aj eca'an slum win Nabot cha, xchi 'ix yistl win cha.

⁸ Xlajw cha, stz'ib'n 'ix jun tzo'n̈ carta 'a sb'i win Acab, xya'n 'ejm 'ix seyo win 'a eb' ch'an̈ carta cha, 'ix ya'n 'at 'ix 'a ewin 'ichmtac winac, yet' 'a eb' yajl 'a jun chon̈b' 'aj cajn win Nabot cha.

⁹ A eb' ch'an̈ carta cha, 'ixtc yaln eb' ch'an̈: Alc 'a eb' 'anma', to tz'och eb' 'a c'ajb'c'ojlal, tzeya'n 'elt win Nabot 'a yojltac eb'.

¹⁰ Tze sayn chawn̈oc winc tu snab'en tzte'wtzej sb'a ya'n testigoal sb'a 'a yojltac, tzyaln eb' 'ixtc 'a 'a: Ach tic, ach b'uchwj 'a Dios yet' 'a win rey, xchi cab' eb' 'a 'a. Tzlajw cha, tzeyi'n 'el win 'a sti 'el chon̈ab', axta tzjul q'uenax winac, sec tzcham ta', xchi ch'an̈ carta cha.

¹¹ Ax eb' 'ichmtac winc cha, yet' eb' yajl 'a schon̈b' Nabot, sb'o eb' 'icha xyutj 'ix Jezabel yaln 'a scarta cha.

¹² 'Ix ya'n 'och sb'a ewin 'a c'ajb'c'ojlal, xya'n 'elt eb' win Nabot 'a yojltac eb' 'anma cha.

¹³ Xlajw cha, 'ix c'och chawn̈ winc tu snab'en 'a Nabot, 'ix yaln eb' 'ixtc 'a eb' 'anma cha: A win Nabot tic, xb'uchwj win 'a Dios yet' 'a win rey, xchi eb'. Yuj cha, 'ix yi'n 'el eb' 'anma chi win 'a sti 'el chon̈ab', sjulq'uenan eb' winac, axta xchamcn win ta'.

¹⁴ Xlajw scham winac, 'ix ya'n eb' alxoc 'a 'ix Jezabel, to a Nabot 'ix julq'uenaxi, 'ix chami, xchi 'at eb' 'a 'ix.

¹⁵ Ax yic xyab'n 'ix Jezabel to xcham win Nabot, 'ix yaln 'ix 'a win Acab 'ixtic: —A ticnec 'ixic, 'at maccn eco'oc lum slum win Nabot, win 'aj Jezreel, atn lum ma'ix schon̈ win 'ayach, yujto a ticnec, man̈x pitznoc winac, chamnc xo winac, xchi 'ix.

¹⁶ Ax yic xyab'n win Acab to chamnc xo win Nabot, yuj cha, 'ix 'at smacnoc 'ec' win yico'oc jab' slum win Nabot cha, win 'aj chon̈b' Jezreel.

¹⁷ Xlajw cha, 'ix yaln Jehová 'ixtc 'a Elías 'aj chon̈b' Tisbe:

¹⁸ 'Ixic, 'at 'ilt win Acab, win sreyl Israel cajn 'a Samaria. A ticnec yaj win 'a jab' slum win Nabot, to tzmacc win yico'oc lu'um.

¹⁹ 'At al 'a win 'ixtic: 'Ixtc wal xyutj Jehová yaln 'ayach: Yujto 'ix a mil win Nabot, 'ix a to'n 'ec' slum winac, yuj cha, a wal 'aj 'ix le'x schic'l win Nabot yuj e no tz'i', a pax ta 'oj slec' e no ec jun xo, xchi Dios, xchi Elías cha.

²⁰ 'Ix yaln win Acab 'ixtc 'a Elías cha: —Ach 'ajc'ojol, a ticnec in 'ilchj pax o'oj, xchi Acab. —Xyaln Elías chi 'ixtc 'a winac: Ach 'ilchj ton b'i'an, yujto yel xo wal xa te'wtzej a b'a a tas tu 'ix a b'o 'a sat Jehová.

²¹ Yuj cha, xyal Jehová 'a eb'n̈ 'ixtic: 'Oj wi' cot cusc'ojlal 'a eb'an̈, 'oj in satl smasnil ewin en̈til. 'Oj in satl eb' winc to niwc yel'chi, yet' eb' 'aych checb'al 'a scal chon̈b' Israel.

²² 'Icha wal wutjnac in satn 'el yin̈tl win Jeroboam, win yunnal Nabat yet' pax eb' yin̈tl win Baasa, yunnal Ahías, 'ixta wal 'oj wutc in satn 'el en̈til, yujto 'ix a tzuntzj cot yowl in c'ojl yuj tas xa b'o'o. 'Ix a jucb'tzej eb' etchon̈b' 'a maysch'olnil, xchi Dios.

²³ Ax pax yuj 'ix Jezabel, 'ixtc xyutj Jehová yaln yuj 'ix: A e no tz'i 'oj chinc schib'jal 'ix Jezabel 'a yol smacb'en chon̈b' Jezreel, xchi.

²⁴ A eb' en̈tl 'oj cham 'a yol chon̈ab', a no tz'i 'oj chinc eb'. Ax eb' en̈tl 'oj cham 'a scalte', a e no 'usj 'oj chinc eb', xchi Dios, xchi Elías 'a win Acab.

²⁵ (Wal yel, may junc rey 'ixta xyutj sb'a 'icha win Acab, yujto xmontchj win yuj yistzil yic ste'wtzan sb'a sb'on tas tu 'a sat Jehová.

²⁶ Caw wal yajb'entac xyutj sb'a winac, yic 'ix ya'n 'ejm sb'a win 'a jun tzo'n̈ yechl comn dios. Lajn wal xyutj sb'a win 'icha tzyutj sb'a eb' amorreo, atn eb' 'ic'b'il 'el yuj Jehová 'a yojltac eb' israel.)

²⁷ A yic xlajw yab'n win Acab jun tzo'n̈ paxti cha, 'ix stziln jat spichul, ax jun tzo'n̈ pichl n̈achtac sat, a 'ix ya'chi, 'ix ya'n 'och sb'a 'a c'ajb'c'ojlal. 'Ix way win yet' jun tzo'n̈ pichl yic najb'al cha, caw wal tzcus winac yic tz'eq'ui.

²⁸ Yuj cha, 'ix yaln pax Jehová 'ixtc 'a Elías:

²⁹ —¿Tzam ela tas tzyutj win Acab yi'n 'ejm sb'a 'ayin? Yujto xyij 'ejm sb'a win 'ayin, ma'oj wa' cot yailal 'a yib'n̈ winac yic pitzn to. At 'a yic 'aych junc yunnal chi reyl sjeloc, ata 'oj jawc cusc'ojlal wuj 'a yib'n̈ smasnil eb' yin̈til, xchi Jehová 'a Elías.