A Ch'an̈ B'ab'el Libro Yic Yab'ixal Eb' Rey 17 - Chuj San Sebastian Bible

Xyal-l Elías yab'xil*r* to man̈x 'oj yac' n̈ab'

¹ 'Ay jun schecb' Dios Elías sb'i, ata cajn 'a chon̈b' Tisbe 'a yol yic Galaad. A aljnac 'ixtc 'a win Acab: An tic schecb' in Jehová qui Diosalec an̈ israel on̈ tic. 'A sat tzwaln can 'ayach, to man̈x 'oj yac' n̈ab' jaye'oc ab'il, man̈x 'a xon chicb'chan̈ 'oj 'em 'a 'ac'wal, masnto an 'oj walxi, xchi.

² Xlajw cha, xyaln Jehová 'a 'ixtic:

³ Eln̈ 'a jun lugar tic, tz'at a c'ub'c 'el a b'a 'a sti a b'eymal a Querit, a 'ay 'a stojlal 'aj tzq'uel c'u 'a sc'axpil 'ec' sti 'a Jordán.

⁴ 'Oj oc' a a cha, tox xwal 'a e no joj, to a e no 'oj 'i'nc 'at tas tza c'uxu, xchi 'a 'a.

⁵ 'Ix syiclni Elías tas xyal Jehová, 'ix 'at sc'ub'nc 'el sb'a 'a sti a Querit cha, 'ix can cajn ta'.

⁶ 'A junjn sq'uin̈b'ial yet' 'a junjn yemc'ual tzlaj yi'n 'at no joj chi tas tzc'uxxi yet' chib'j 'a winac, ax a a chi tzyuq'uej.

⁷ Palta ax x'aji, 'ix tup chan̈ a a cha, yujto man̈x 'a n̈ab' tzyac' 'a jun nacion̈ cha.

A Elias yet' 'ix chamnc yichmil*r* 'a chon̈b' Sarepta

⁸ Yuj cha, xyaln pax Jehová 'ixtc 'a Elías:

⁹ Lem, 'ixc wal mu'c ticnec 'a chon̈b' Sarepta 'a yol yic Sidón. Ata cajn jun 'ix 'ix chamnc yichmil, tox xwala, to ata tzach can cajn yet' 'ix, a 'ix 'oj 'a'nc tas tza c'uxu, xchi.

¹⁰ Cojn xyab'n Elías tas 'ix alx 'a 'a, 'ix 'at 'a chon̈b' Sarepta. Ax yic xc'och 'a 'aj 'ay spuertail jun chon̈b' cha, 'ix yilni to 'ay jun 'ix 'ix chamnc yichmil wan sayn sc'atztz ta'. 'Ix yawtn cot win 'ix 'a stz'ey, 'ix yaln win 'ixtc 'a 'ix: —Tzin c'an wal yuj diosal 'ayach, to tz'at 'ec' wuc' jac al 'a yol junc a vaso, xchi.

¹¹ Wan xo s'at 'ix 'at yic' a a cha, 'ix 'awj pax win 'a 'ix, 'ix yaln win 'ixtic: —Tzin c'an wal yuj diosal 'ayach, tzej cot in wa junc o'och, xchi.

¹² 'Ix ta'w 'ix 'a win 'ixtic: —'A sat Jehová a Diosal tzwaln 'ayach, to man̈x xon junc woch uyb'nac. Cojxn wal jun jop jab' in harina 'ay 'a yol in xalu yet' jab'x in aceite 'a yol yet'ul, cojn tzin c'och yet' chab' in c'atztz tic, ax in b'on jab'x chi in c'ux yet' jun wune'. 'Oj lajwc xoj cha, ax qui tan̈wni b'a'n̈ 'oj qui cham yuj wejl on̈, xchi 'ix.

¹³ 'Ix yaln Elías 'ixtc 'a 'ix: —Man̈ ach xiwoc. 'Ixic, 'at b'o tas 'icha 'ix otj aln cha. Palta tza b'ab'l b'oj junc woch chi 'a 'ixm harina cha, tza b'oln 'a stzac'ac', tzwul a'nc 'ayin, tzlajw cha, tz'at a b'onc junc eco' yet' junc yic win one cha.

¹⁴ Yujto a Jehová qui Diosal an̈ israel on̈ tic on̈, a 'ix alni, to a 'ixm harina 'ay 'a yol a xalu yet' jab'x a aceite cha, ma'oj lajwc muc'uc, masnto 'oj ya'x n̈ab' 'a sat lum lum tic, xchi.

¹⁵ Yuj cha, 'ix 'at sb'onc 'ix tas xyal Elías cha. Caw 'ayn̈j tas sc'ux eb', 'ix wa Elías, xwa 'ix 'ix cha, xwa pax win 'unn chi yet' eb'.

¹⁶ A 'ixm harina cha, may x'aj 'ixm slajwi, 'ixta pax jun aceite cha, ma'ix lajwi. 'Ix 'el'ch 'icha wal xyutj Jehová yaln 'a Elías.

¹⁷ Xlajw ye'cn jun tzo'n̈ cha, 'ay jun c'ual 'ix 'och yab'il 'a win 'unn cha, caw wal ow x'ajch syailal winac, ax x'aji, 'ix chami.

¹⁸ Yuj cha, 'ix yaln 'ix 'a Elías 'ixtic: —¿Tas waj et' ach schecb' Dios? ¿Tom yuj a'n in na cot in mul, yuj cha, xcham jun wune tic? xchi 'ix.

¹⁹ —'A' cot win one cha, xchi Elías chi 'a 'ix. Schan 'ec' Elías jun 'unn chi 'a 'ix. Xlajw cha, xyi'n q'ue 'a jun cuarto 'a 'aj tzway 'a cha'an̈, sc'otn 'ec' 'a sat sch'at cha.

²⁰ Yajn̈ej x'awj chan̈ 'a Jehová, 'ix yaln 'ixtic: Mamin Jehová in Diosal ach, ¿tom tza chaj cot wal scusc'ojlal 'ix chamnc yichmil tic? A pax 'a 'ix 'ay in posada, palta xcham pax win yune 'ix tic, xchi.

²¹ 'Ox 'ejm yamn x'at lachn 'a yib'n̈ win 'unn cha, 'ix yaln 'ixtc 'a slesal: Mamin Jehová in Diosal ach, tzin tew wal 'ayach, comnoc tzac' pitzwc win 'unn tic, xchi.

²² 'Ix yab' Jehová tas xyal Elías cha, 'ix 'ochx yic' win 'unn cha, 'ix pitzw pax winac.

²³ Yajn̈j wal cha, xyi'n pax 'emt win Elías chi win 'unn chi 'a jun cuarto 'aj 'ayc' 'ix nunb'il cha, 'ix yaln 'ixtc 'a 'ix: —'Ilto, a win one tic 'ix pitzw pax winac, xchi.

²⁴ —A ticnec b'i'an, 'ix wojquej 'eli to yel schecb' ach Dios. A spaxti Jehová tzal-li, caw tz'el'chn̈ej eb', xchi 'ix 'a winac.