A Ch'an̈ B'ab'el Libro Yic Yab'ixal Eb' Rey 15 - Chuj San Sebastian Bible

'Ochnc win Abiam reyl 'a Judá

¹ A 'a yic swajxclajn̈il xo ab'il yoch win Jeroboam reyal, win yunnal Nabat, 'ix schan 'el win Abiam yich ya'n reyl 'a Judá.

² 'Oxe ab'il xyac' win reyl 'a Jerusalén, Maaca sb'i 'ix snun winac, yisl can win Absalón 'ix.

³ A win Abiam tic, 'ix sb'eylb'ej sb'eyb'al smam cha, 'icha wal yutjnac smam chi sayn smuloc, 'ixta pax xyutj ya'n 'och smul cha. Caw man̈ tojloc snab'en 'a sat Jehová sDiosal, man̈ 'ichaoc yutjnac David snab'en, atn win smam 'ichm win cha.

⁴ Palta yuj schamc'ojlal Jehová 'a David cha, yuj cha, 'ix si'n chan̈ jun yin̈tl cha, yic x'och reyl 'a chon̈b' Jerusalén. Ax jun yin̈tl chi xcoln chon̈b' Jerusalén,

⁵ yujto a win David cha, caw tojl snab'en win 'a sat Jehová. May 'aj xyij 'el win snab'en 'a tas xyal Jehová 'a 'a, cojn wal smul 'ix 'ochi, yic xya'n milxoc win Urías hitita.

^6-7 A yic pitznto win Roboam, caw 'ayn̈j owl 'a scal win yet' win Jeroboam. An̈jtona', 'ay pax owl 'a scal win Abiam yet' win Jeroboam. Ax jancto yab'xil Abiam, ata tz'ib'b'il can 'a ch'an̈ libro yic yab'xil eb' sreyl Judá.

⁸ Ax yic xcham winac, ata xmucx win 'a Schon̈b' David, ax jun yunnal tzcuch Asa, a 'ix 'ochx can reyl sjeloc.

'Ochnc win Asa reyl 'a Judá

⁹ A yic sjunc'lil ab'il yoch win Jeroboam sreyloc chon̈b' Israel, 'ix 'och win Asa reyl 'a Judá.

¹⁰ A win Asa cha, 41 ab'il 'ix yac' win reyl 'a Jerusalén. A snun chichm winac, Maaca sb'i 'ix, 'ix yisl can win Absalón.

¹¹ A win Asa cha, caw tojl xyutj win snab'en 'a sat Jehová, 'icha 'e'nc smam 'ichm David winac.

¹² 'Ix spechl win smasnil eb' winc tzb'on 'ajmulal yet' yit wincal 'a yol nacion̈ cha, 'ix yi'n 'el smasnil jun tzo'n̈ yechl comn dios b'ob'il yuj smam 'icham.

¹³ 'Ay jun yechl Asera 'ac'b'il b'o yuj 'ix Maaca, atn 'ix snunchichm winac. Yuj jun cha, 'ix yi'n 'el win sb'inab'ilal snunchichm cha. 'Ix sma'n poj win Asa chi jun yechl cha, axta 'ix 'at sn̈us tz'a win 'a sti a niwn a Cedrón.

¹⁴ Wach'xam ma'ix yij 'el win smasnil jun tzo'n̈ macsej 'a 'aj tzyal sb'a eb' 'anma 'a jolmctac witz, palta caw tojl xyutj win Asa chi snab'en 'a sat Jehová.

¹⁵ 'Ix ya'n 'och win q'uen oro, q'uen plata yet' jun tzo'n̈ xo yamc'ab' 'a yol yatut Jehová, atn jun tzo'n̈ smol 'a'j win yet' smam cha.

Junn̈j xyutj sb'a Asa yet' Ben-adad

¹⁶ Caw 'ayn̈j owl 'a scal Asa yet' win Baasa sreyl chon̈b' Israel.

¹⁷ A yic snib'n win Baasa cha yac' owl 'a chon̈b' Judá, 'ix 'at winac, axta xc'och win 'a chon̈b' Ramá. 'Ix syamn 'och win sb'on scuartel ta', yic tzmacn win yol sb'e eb' chon̈wjum, sec wach' man̈x 'a mach tztac' sc'och 'a win Asa.

¹⁸ Yuj cha, 'ix yi'n 'elt win Asa chi smasnil q'uen oro, yet' q'uen plata molb'il 'a yatut Jehová, yet' pax q'uen molb'il 'a yol sdespacho win rey cha. 'Ix ya'n win eb' q'uen 'a eb' schecab', yic tz'at ya'nc eb' 'a win Ben-adad sreyl Siria, ata cajn win 'a Damasco. (A Ben-adad cha, yunnal Tabrimón, yixchicn Hezión.) 'Ix ya'n win Asa chi alxoc 'a win Ben-adad 'ixtic:

¹⁹ Qui b'o junc qui trato et'oc, 'icha ya'jnac eb' qui mam quicham. Tic tzwa't jun tzo'n̈ q'uen oro yet' q'uen plata siylab'il 'ayach. 'Ac' juwc a trato a b'ojnac yet' win Baasa sreyl chon̈b' Israel, sec tz'och wan win ya'n owl wet'oc, xchi win Asa cha.

²⁰ 'Ix schan sc'ojl win Ben-adad tas 'ix yalb't win rey Asa, yuj cha, schecn 'at win eb' capitan̈ yet' eb' soldado yic tz'at ya'nc eb' owl 'a eb' lum chon̈b' 'a yol yic Israel. 'Ixta x'aj yajx ganar chon̈b' Ijón, Dan, Abel-bet-maaca, yet' smasnil chon̈b' 'a yol yic Cineret yet' 'a smasnil yol smacb'en eb' yic Neftalí.

²¹ Ax xyab'n win Baasa jun cha, 'ix yactn win sb'on smuroal chon̈b' Ramá, ax 'a chon̈b' Tirsa 'ix c'ochi.

²² Xlajw cha, 'ix ya'n win rey Asa 'awtxoc smasnil eb' winc 'aj Judá, xyaln winac to c'uxn tzc'och eb' smasnil. Xlajw cha, 'ix 'at yi'nc eb' q'uen q'uen xcan 'a chon̈b' Ramá, yet' te te sc'an win Baasa yic sb'on win jun chon̈b' chi yalni. Ax yet' jun tzo'n̈ chi sb'o win rey Asa lum chon̈b' Gueba 'a yol smacb'en eb' yin̈tl Benjamín, yet' chon̈b' Mizpa.

Schaml win Asa

²³ A jancto yab'xil win Asa yet' tas sb'o'o, yab'xil sjelnal winac, yet' eb' lum chon̈b' xlaj sb'o chan̈ winac, ata tz'ib'b'il can 'a ch'an̈ libro yic yab'xil eb' sreyl Judá. Ax yic x'och win 'ichm wincal, 'ix 'och syailal, a yoc 'ix 'och syab'il.

²⁴ A yic 'ix cham Asa, ata 'ix mucx 'a Schon̈b' David. Xlajw cha, ax jun yunnal tzcuch Josafat, a 'ix 'ochx can reyl sjeloc.

'Ochnc win Nadab reyl 'a Israel

²⁵ A yic schab'l ab'il yoch win Asa reyl 'a Judá, 'ix schan 'el win Nadab yoch reyl 'a chon̈b' Israel, atn win yunnal Jeroboam. Chab' wal ab'il 'ix yac' win reyal.

²⁶ Palta caw wal tu tas sb'o 'a sat Jehová, a sb'eyb'al smam chi sb'eylb'ej, atn win 'ix jucb'tzan eb' yit israelal 'a maysch'olnil.

²⁷ Ax win Baasa yunnal win Ahías win yin̈tl can Isacar, 'ix 'och 'ajc'ojlal 'a win Nadab cha, axta smil cham win Baasa chi win Nadab 'a chon̈b' Gibetón. A jun chon̈b' cha, yic eb' filisteo, yujto a win Nadab chi 'ix 'a'n 'och oyn eb' soldado israel 'a spatquil Gibetón cha.

²⁸ A yic yoxl ab'il yoch win Asa reyl 'a Judá, ata 'ix milx cham win Nadab yuj win Baasa, ax win Baasa cha, 'ix 'ochx can reyl sjeloc.

²⁹ Cojn wal yic x'och win 'a yopiso cha, 'ix syamn 'och win smiln smasnil eb' yin̈tl Jeroboam, c'uxn xcham eb' smasnil, man̈x 'a xon wal junc yin̈tl xcani, masnto xlajw 'el eb' 'icha yaj yaln can Jehová 'a jun schecb' tzcuch Ahías cajn 'a Silo.

³⁰ Yuj smul Jeroboam ya'jnac 'ochi, atn yic yi'n 'at eb' yit israelal 'a scal maysch'olnil, yuj cha, stzuntzn cot yowl sc'ojl Jehová, atn sDiosal chon̈b' Israel.

³¹ Ax jancto yab'xil win Nadab yet' tas b'ob'il yu'uj, ata tz'ib'b'il can 'a ch'an̈ libro yic yab'xil eb' sreyl Israel.

³² A yic xya'n win Asa reyal, caw 'ayn̈j owl 'a scal win yet' win Baasa.

'Ochnc Baasa reyl 'a Israel

³³ Yoxl ab'il xo yoch win Asa reyl 'a Judá, 'ix 'och win Baasa reyl 'a Israel, ax sdespacho, ata 'ay 'a Tirsa. A win tic, yunnal win Ahías; chan̈eschawinc ab'il xyac' win reyal.

³⁴ Palta a sb'eyb'al win Baasa cha, caw wal maysch'olnil 'a sat Jehová, 'ix ya'ch smul 'icha yic Jeroboam, atn win 'ix jucb'tzan eb' yit israelal 'a maysch'olnil.