A Ch'an̈ B'ab'el Libro Yic Yab'ixal Eb' Rey 13 - Chuj San Sebastian Bible

Tenb'il 'och wan Jeroboam*r* yuj jun schecb' Dios

¹ A yic wan ya'n tz'a Jeroboam incienso 'a yib'n̈ jun yet'l xajmb'al cha, 'ix c'och jun schecb' Dios 'a Betel 'a 'a, ata xcot 'a chon̈b' Judá, caw a Jehová xchecn coti.

² A Jehová 'ix aln 'a 'a, yuj cha, caw ow xyutj yaln 'a jun yet'l xajmb'al chi 'ixtic: Ach yet'l xajmb'al, a Jehová 'ix aln 'ixtic: A 'a scal eb' yin̈tl David, ata 'oj 'aljoc jun winc 'unin, 'oj 'ajxoc sb'ic Josías. A 'a eb'an̈, ata 'oj yac' milxoc cham win jun tzo'n̈ eb' ya'mal 'och cob' sti eb' 'anma 'a scomn diosal, atn eb' tz'a'n jun tzo'n̈ incienso 'a eb'an̈, ax ya'n pax tz'a win sb'acl 'anma 'a eb'an̈, xchi Dios, xchi jun checb' cha.

³ A 'a yic jun c'u cha, 'ay jun ch'oxnb'il 'ix sch'ox jun schecb' Dios cha, 'ix yaln 'ixtic: Atn jun ch'oxnb'il tic 'ix yal Jehová: A jun yet'l xajmb'al tic, 'oj pojoc, ax q'uen tan̈ 'ay q'ue 'a yib'an̈, 'oj puccn 'at q'ue'en, xchi.

⁴ 'Ayc' win rey Jeroboam chi 'a stz'ey jun yet'l xajmb'al cha, a yic xyab'n win smasnil tas 'ix yal win schecb' Dios chi 'a jun yet'l xajmb'al 'ayc' 'a chon̈b' Betel cha, 'ix ya'n 'at win sc'ab' 'a jun schecb' Dios cha, 'ix yaln 'ixtic: ¡Yamc coti! xchi. Palta a jun sc'ab' 'ix ya't 'a yic sch'oxn cha, caw x'ochcn yip, man̈x 'ic stac' spacn sb'a.

⁵ A wal 'a yic jun rato cha, 'ix poj jun yet'l xajmb'al cha, 'ix puccn 'at pax q'uen tan̈ 'ay q'ue 'a yib'an̈, caw 'ix 'el'ch 'icha wal xyutj jun schecb' Dios chi yalni, yujto a Jehová a x'a'n yala'.

⁶ Yuj cha, xyaln win rey chi 'a jun schecb' Dios chi 'ixtic: —Tzin tew 'ayach, to tzach leslwi 'a Jehová a Diosal wu'uj, sec tzb'ox can in c'ab' tic, xchi. Xlajw cha, 'ix leslwi jun schecb' Dios cha, 'ix b'ox can sc'ab' win rey chi jun 'ejm xo, 'icha yaj xon 'a yic yalan̈.

⁷ 'Ix yaln win rey chi 'a jun schecb' Dios chi 'ixtic: —Con̈ wet' 'a watut, yic tzach wa wet'oc, ax wa'n junc in siylab' 'ayach, xchi.

⁸ Palta 'ix ta'w jun schecb' Dios chi 'ixtc 'a win rey cha: —Wach'xam tzac' spacloc tas 'ay 'a a despacho chi 'ayin, matz in 'at et'oc, matz tac' in wa'i, matz tac' wu'n pax a a 'a jun lugar tic;

⁹ yujto 'ixta yaj yaln Jehová 'ayin, 'ix yal 'ayn 'ixtic: Man̈ ach wa 'a jun lugar cha, man̈ oc' pax a a', man̈ ach meltzjoc pax 'a a b'e 'aj tzach 'ati, xchi 'ayin, xchi win schecb' Dios cha.

¹⁰ Chuc junx b'e 'aj 'ix meltzj win schecb' Dios cha, man̈xoc 'a jun b'e 'aj x'ati yic xc'och 'a chon̈b' Betel.

¹¹ A 'a yic jun tiempoal cha, 'ay jun schecb' Dios caw 'ichm winc xo cajn 'ec' 'a Betel cha. 'Ix yaln eb' yunnal 'a 'a, yuj smasnil tas 'ix sb'o jun schecb' Dios chi 'a chon̈b' Betel, 'ix yaln pax eb' 'a smam chi yuj tas 'ix yal jun schecb' Dios chi 'a win rey.

¹² 'Ix sc'anb'n smam eb' chi 'a 'ixtic: —¿'Aja b'e 'aj x'at winac? xchi. 'Ix yaln eb' 'unnab'il cha, tas b'el 'aj 'ix meltzj jun winc cha.

¹³ Xlajw cha, 'ix yaln 'a eb' yunnal 'ixtic: —'A'c 'och stz'um no in b'uru, xchi. 'Ix ya'n 'och eb' stz'um no b'uru cha, xlajw cha, 'ix q'ue win 'a yib'n̈ no'.

¹⁴ A win schecb' Dios 'ichm winc xo cha, 'ix 'at 'a spatc junx win schecb' Dios cha, 'ix yamchj win yu'uj. Ata wocn 'ejm win 'a yich jun te ma'ach', 'ix sc'anb'n 'a win 'ixtic: —¿Ach am tic schecb' ach Dios ach cot 'a chon̈b' Judá? xchi 'a winac. —An toni, xchi winac.

¹⁵ —Con̈ wac wet' 'a watut, xchi win 'ichm winc chi 'a 'a. Palta xta'w win 'ixtic:

¹⁶ —Matz tac' in meltzji yic tzin wa et'oc, matz tac' wu'n pax a a et' 'a jun lugar tic.

¹⁷ Yujto a Jehová a 'ix aln 'ayn 'ixtic: Man̈ ach wa'oc, man̈ oc' pax a a 'a jun lugar cha, man̈ ach meltzjoc pax 'a a b'e 'aj tzach 'ati, xchi 'ayin, xchi winac.

¹⁸ 'Ix yaln pax jun 'ichm winc chi 'ixtc 'a winac, yic tzya'n 'es: —An̈jtona 'in, schecb' in Dios 'icha ach tic. A jun yángel Jehová 'ix aln 'ayn 'ixtic: 'At 'ij meltzjoc winac. Wa cab' win 'a atut, yu' cab' win a a 'a atut cha, xchi 'ayin, xchi winac.

¹⁹ Yuj cha, x'at jun schecb' Dios yet' win 'ichm winc cha, xwa'i, xyu'n pax a yet' win 'a yatut cha.

²⁰ Ax x'aji, wanto wal swa eb' 'a te mexa cha, 'ix ya'n Jehová paxtinc jun schecb' caw 'ichm winc xo cha.

²¹ Caw pit xotj a b'a 'a schecnb'il Jehová qui Diosal 'ix yal 'ayach,

²² yujto ach meltzji, ach wa'i, 'ix o'n pax a a 'a jun lugar tic 'aj 'ix yal Jehová, to matz tac'a. Yuj wal jun tic, ma'oj mucxoc a niwnal 'aj mucn eb' a mam echam, xchi win 'a 'a.

²³ Ax jun schecb' Dios 'aj Judá cha, a yic xlajw yu'n tas xyuq'uej, xlajw swa'i, ax win 'ichm winc cha, 'ix ya'n 'och win stz'um jun no b'uru, xyi'n win schecb' Dios cha.

²⁴ Xlajw cha, xpax win schecb' Dios 'aj Judá cha, ax x'aji, schan sb'a win yet' jun no león 'a yol b'e. 'Ix smiln cham no winac, xcancn t'ocn sniwnal win 'a yol b'e cha. Ax no b'uru yet' no león cha, 'ayc' e no 'a stz'ey sniwnal winac.

²⁵ 'Ay jun tzo'n̈ winc xb'ey 'a jun b'e cha, 'ix yiln eb' jun niwnal chi t'ocn 'ec' 'a yol b'e cha, ax no león 'ayc' no 'a stz'ey, xlajw cha, 'ix 'at yalnc eb' 'a chon̈b' 'aj 'ayc' jun schecb' Dios to 'ichm winc xo cha, 'ix yaln eb' yuj tas 'ix yil eb' 'a yol b'e cha.

²⁶ A yic xyab'n win 'ichm winc cha, win 'ix 'at 'i'noc meltzjoc win schecb' pax Dios chi 'a yol b'e, 'ix yaln win 'ixtic: Caw a win schecb' Dios, win ma'ix yiclni tas 'ix yal Jehová. Yuj cha, xya'n 'och Jehová win 'a yol sc'ab' no león cha, sch'iychtan no winac, xcham win yuj no', 'icha wal xyutj Jehová yalni, xchi.

²⁷ 'Ix yaln 'a eb' yunnal 'ixtic: 'A'c 'och stz'um junc no b'uru, xchi. 'Ix ya'n 'och eb' stz'um no b'uru cha.

²⁸ Xlajw cha, x'at winac, 'ix c'och win 'aj t'ocn 'ec' jun niwnal cha, ax no b'uru yet' no león cha, 'ayc' e no 'a stz'ey jun niwnal cha. A no león cha, mant 'a jac jun niwnal chi tox 'ix schi no', may pax 'ix yutj no b'uru cha.

²⁹ Xlajw cha, xyi'n chan̈ win sniwnal win schecb' Dios 'ix cot 'a Judá cha, 'ix yi'n cot 'a yol schon̈ab', yic tz'och 'a cusc'ojlal yu'uj, yic tzmucn paxi.

³⁰ Ax ta smuccn jun sniwnal win chi 'a yol jun pantion̈ yic xon win 'ichm winc chi yaji. 'Ix 'och 'a cusc'ojlal yu'uj, 'ix yaln 'ixtic: ¡'Ay, 'o'ltacch wal wu'tac! xchi.

³¹ A yic xlajw smucn can win jun niwnal cha, 'ix yaln 'a eb' yunnal 'ixtic: —A yic 'oj in chami, ata tzin e muc 'a 'aj 'ix mucx can sniwnal jun win schecb' Dios tic. Junn̈j tzeyutj in niwnal tic yet' sniwnal winac.

³² Yujto caw 'oj 'el'choc tas 'ix yac' Jehová yalcn win 'a jun yet'l xajmb'al 'ay 'a Betel, yet' 'a smasnil jun tzo'n̈ n̈a yic sdiosal eb' 'anma 'ay 'a jolmctac witz 'a yol yic Samaria, xchi.

³³ Wach'xam 'ix uj smasnil jun tzo'n̈ tic, a win rey Jeroboam ma'ix yactj can win smasnil stu b'eyb'al. A yic winac, to 'ix si'x 'och win jun tzo'n̈ eb' comn 'anma ya'malc 'och sti eb' 'a scomn diosal. Tzann̈j mach tznib'j tz'och ya'malc 'och sti eb' cha, tzya'n̈j 'och win yopiso eb' 'a jun tzo'n̈ 'ay 'a jolmctac witz cha.

³⁴ 'Ixta wal 'ajnc yoch smul win Jeroboam yet' smasnil eb' yin̈til, yuj wal cha, satx 'el eb' 'a sat lum lum tic.