A Ch'an̈ B'ab'el Libro Yic Yab'ixal Eb' Rey 10 - Chuj San Sebastian Bible

Wulnc 'ix reina yic chon̈b' Sabá*r* sc'umc rey Salomón

^1-2 A 'ix reina yic chon̈b' Sabá, xyab' 'ix yel yab'xil Salomón, to caw niwn yel'chi, yujto caw tz'ijx chan̈ Jehová yu'uj. Xjaw 'ix 'a Jerusalén yic tzwul ya'nc prowal 'ix Salomón yet' jun tzo'n̈ tas tzc'anb'ej, jun tzo'n̈ to caw ya snachj 'eli. Caw niwn eb' schecb' 'ix ajun yet'oc. Yet' pax 'ix nan̈l e no cameyo, cuchb'il jun tzo'n̈ perjuma yuj e no', caw niwn pax q'uen oro, yet' pax jun tzo'n̈ q'uen q'uen caw wach' yilxi. A yic xjaw 'ix 'a yojltac Salomón, 'ix sc'anb'n 'ix smasnil jun tzo'n̈ tas nab'il yu'uj.

³ 'Ix spacn win smasnil jun tzo'n̈ tas sc'anb'j 'ix cha. May junc tas sc'anb'j 'ix to ma'ix stac' spacn win rey cha.

^4-5 Caw wal 'ix sat sc'ojl 'ix yiln jantc sjelnal winac, yuj sdespacho b'ob'il yu'uj, yuj tas tzc'ux 'a sat smexa, yuj yet'l eb' 'aych yopiso yu'uj, yuj yilx spichl eb' tz'a'n servil, yet' eb' sb'achmal svaso, yet' pax no xajmb'al tzyac' tz'a 'a yatut Dios,

⁶ yuj cha, xyaln 'ix 'a win rey chi 'ixtic: A tas xwab' 'a in chon̈ab', yuj jun tzo'n̈ tas tza b'o'o, yet' yuj a jelnal tzb'inaxi, a jun tzo'n̈ tic, caw wal yel.

⁷ Caw wal matz in chaj cob' wab'i', palta at in jaw 'a tic, 'ix wiln 'och yet' in sat. A ticnec caw tzwa'ch 'a in c'ojol. A tas 'ix alx cha, may spacl 'ix alx wab'i'. A wal a jelnal, yet' smasnil tas 'ay 'ayach, yel xo 'ec'b'al 'a yib'n̈ tas 'ix alx wab'i'.

⁸ ¡Caw wach' yic eb' 'anma tzmunlj 'ayach, wach' pax yic eb' a checb' 'ayc'n̈ej 'a a tz'ey yic tzyab'n eb' a jelnal!

⁹ ¡Alx cab' wach' paxti 'a Jehová a Diosal, yujto schaj sc'ojl ach ya'n 'och reyl 'a chon̈b' Israel tic! ¡Yujto caw 'ay schamc'ojlal Jehová 'a Israel, yuj cha, ach ya'ch reyal, yic tza'n yajlil wal 'a caw stojlal yet' 'a swach'il! xchi 'ix.

¹⁰ Xlajw cha, xya'n 'ix 90 quintal q'uen oro 'a win rey cha, caw niwn perjuma xyac' 'ix 'a winac, yet' pax jun tzo'n̈ q'uen q'uen caw wach' yilxi. Man̈x 'a xon jun 'ejmoc xc'och perjuma 'a Israel 'icha wal sb'isl chi siyj 'ix sreinail chon̈b' Sabá chi 'a win rey Salomón.

^11-13 Ax win rey cha, 'ix yac' win smasnil tas snib'j 'ix reina cha, a tzyal tas sc'an 'ix 'a winac. Chuc pax yaj tas mun x'el 'a sc'ojl win rey chi ya'n 'a 'ix. Xlajw cha, xmeltzj 'ix 'a schon̈b' yet' eb' schecb' ajun yet' cha. 'Ay pax jun tzo'n̈ xo xcot 'a yol barco yuj win Hiram, xyij cot eb' q'uen oro 'a chon̈b' Ofir. Til wal te te tzcuch sándalo xyij cot eb', yet' pax jun tzo'n̈ q'uen q'uen caw wach' yilxi. A yet' te sándalo chi ya'jnac b'o win rey swarandail yatut Jehová, yet' yic sdespacho winac, xc'anx pax te arpail, yet' salterio yico'oc eb' tzb'itni. Man̈x 'a xon jun 'ejmoc xjaw te sándalo chi 'a chon̈b' Israel, 'icha ya'jnac 'a jun tiempo cha, man̈x 'a xon pax 'aj x'ilx te'.

Yab'xil win Salomón yet' sricoal

¹⁴ A q'uen oro tzchaj Salomón 'a junjn ab'il, 'ay 500 quintal q'ue'en.

¹⁵ Ax stojlb'al eb' chon̈wjum, yet' stojlb'al smasnil eb' rey 'a yol yic Arabia, yet' yic eb' yajl 'a yol yic Israel, man̈ 'ayc 'och jun tzo'n̈ chi stz'acb'oc.

¹⁶ 'Ix yac' win rey chi b'o chab' ciente q'uen niwc pachpmb'a q'uen tzmacn sat jul-lab' nab'a oro x'aji, lajchwe libra q'uen oro x'och 'a jun jun.

¹⁷ 'Ix ya'n pax win b'o 'oxe ciente q'uen tzmacn sat jul-lab' chi cotc x'aji, 'ec'b'al 'oxe libra q'uen oro chi x'och 'a jun jun. A 'a yol jun n̈a tzcuch Calte yic Líbano, ata xya'cn 'ochi.

¹⁸ 'Ix ya'n pax b'o jun niwquil despacho to nab'a marfil x'aji, 'ix ya'n 'ajxoc 'och q'uen oro to caw wach' 'a 'a.

¹⁹ A jun sdespacho cha, 'ay sc'ochal, waque sb'achquixtaquil. A yich spatquil xilail, xoynxoj x'aj sb'o'i, ax 'a jun xilail chi 'a junjn smo'och, b'ob'il 'och sc'ab', b'ob'il 'och pax yechl junjn no león 'a junjn sc'ab' cha.

²⁰ 'Aych pax lajchwan̈ yechl no león chi 'a jun sc'ochal cha, junjn 'a junjn smoch waque sb'achquixtacl cha. ¡May junc xo rey sb'ojnac yic 'icha jun cha!

²¹ An̈jtona svaso win rey, nab'a oro smasnil. 'Ixta pax schenal yet' xalual tas tzc'anx 'a jun n̈a tzcuch Calte yic Líbano, nab'a oro smasnil. May junc tas to plata, yujto a 'a stiempoal Salomón, a q'uen plata cha, may wal yel'ch q'ue'en.

²² 'Ay jun tzo'n̈ sniwc barco win rey Salomón jun tz'ec' yet' jun tzo'n̈ sniwc barco win Hiram, yoxxil ab'il tzjaw eb' 'a Israel, yet' eb' oro, plata, marfil, no chab'in, yet' no pavo real.

²³ 'Ixta x'aj sq'ue'ch win rey Salomón yet' sricoal yet' sjelnal 'a yib'n̈ jun tzo'n̈ xo eb' rey.

²⁴ Smasnil 'anma 'a yolyib'n̈q'uinl tic, caw tznib'j eb' yila', yet' yic tzyab'n eb' jantc wal sjelnal x'ajx yuj Dios.

²⁵ Tzyij cot eb' siylab' 'a win 'a junjn ab'il: 'icha q'uen oro, q'uen plata, jun tzo'n̈ pichul, yamc'ab' yic owal, jun tzo'n̈ su'q'ui sjab', e no cawyu chej, yet' pax e no mula.

²⁶ 'Ix smolb'tzan cot Salomón jun tzo'n̈ caruaje yic owal, yet' no chej. 'Ay mil 400 caruaje, 'ay pax lajchwe mil no chej tzq'ue eb' soldado 'a yib'an̈. 'Ay no 'ayc' 'a jun tzo'n̈ chon̈b' to yic xon no yaji. 'Ay pax no 'ay 'a Jerusalén yuj eb' tztan̈wni win rey.

²⁷ Man̈x jantcoc sb'isl q'uen plata smolb'tzej win rey 'a Jerusalén, 'icha xoj q'uen comn q'ue'en. Man̈x jantcoc pax te c'ute smolb'tzej winac, 'icha xoj te calte'al higo comn xoj 'ay 'a span̈nil yich lum witz.

²⁸ A no schej win rey Salomón, ata tzcot no 'a Egipto, yet' 'a Cilicia, yujto a eb' schon̈wjum win rey cha, a eb' tzmann cot no 'a jun tzo'n̈ chon̈b' cha.

²⁹ A junc caruaje tzmanx cot 'a Egipto, 600 tumn plata tz'ajx stojloc, ax no chej 150 tumn plata tz'ajx stojloc no'. A eb' sreyl eb' hitita yet' eb' sreyl eb' sirio a eb' tzcha mann pax e no 'a eb' schon̈wjum win rey Salomón.