Johanne 14 - Contemporary Southern Sotho Bible 2024

Johanne 14

¹ A dipelo tsa lona di se ferekane; le dumela ho Modimo, le dumele le ho nna.

² Ka tlung ya Ntate ho na le meaho e mengata; hoja ho ne ho se jwalo, nka be ke le boleletse. Ke ya ho le lokisetsa bodulo.

³ Mme etlare ha ke eya ho le lokisetsa bodulo, ke tla boela ke tle, mme ke le nkele ho nna; hore moo ke leng teng, le lona le be teng.

⁴ Le moo ke yang le a tseba, le tsela le a e tseba.

⁵ Thomase a re ho yena: Morena, ha re tsebe moo o yang; mme tsela re ka e tseba jwang?

⁶ Jesu a re ho yena: Ke nna tsela, le nnete, le bophelo;

⁷ Hoja le a ntseba, le ka be le tsebile le Ntate; mme ho tloha jwale le a mo tseba, mme le mmone.

⁸ Filipi a re ho yena: Morena, re bontshe Ntate, mme ho tla re lekane.

⁹ Jesu a re ho yena: Ke dutse le lona nako e kalo, mme ha o a ka wa ntseba, Filipi? ya mponeng o bone Ntate; mme o bolela jwang ha o re: Re bontshe Ntate?

¹⁰ Na ha o dumele hore ke ho Ntate, le hore Ntate o ho nna? mantswe ao ke le bolellang wona, ha ke a bue ka bonna, empa Ntate ya dutseng ka ho nna, ke yena ya etsang mesebetsi.

¹¹ Ntumeleng hobane ke ho Ntate, le Ntate o ho nna;

¹² Kannetenete ke re ho lona: Ya dumelang ho nna, mesebetsi eo ke e etsang o tla e etsa le yena; mme o tla etsa mesebetsi e meholo ho ena; hobane ke ya ho Ntate.

¹³ Mme eng kapa eng eo le e kopang ka lebitso la ka, ke tla e etsa, hore Ntate a tlotliswe ka Mora.

¹⁴ Haeba le kopa eng kapa eng ka lebitso la ka, ke tla e etsa.

¹⁵ Haeba le a nthata, le boloke ditaelo tsa ka.

¹⁶ Ke tla rapela Ntate, mme o tla le nea Moemedi e mong, hore a dule le lona ka ho sa feleng;

¹⁷ E leng Moya wa nnete; eo lefatshe le ke keng la mo amohela, kahobane ha le o bone, leha e le ho o tseba; hobane o ahile le lona, mme o tla ba ka ho lona.

¹⁸ Nke ke ka le tlohela le le dikgutsana, ke tla tla ho lona.

¹⁹ Ho se ho se hokae, mme lefatshe ha le sa tla mpona; empa lona le a mpona, hobane ke phela, le lona le tla phela.

²⁰ Ka tsatsi leo le tla tseba hobane ke ho Ntate, le lona le ka ho nna, le nna ka ho lona.

²¹ Ya nang le melao ya ka, mme a e boloka, ke yena ya nthatang; mme ya nthatang o tla ratwa ke Ntate, le nna ke tla mo rata, mme ke tla iponahatsa ho yena.

²² Judase, e seng Iskariota, a re ho yena: Morena, o tla iponahatsa jwang ho rona, e seng ho lefatshe?

²³ Jesu a araba, a re ho yena: Ekare ha motho a nthata, o tla boloka lentswe la ka, mme Ntate o tla mo rata;

²⁴ Ya sa nthateng ha a boloke dipolelo tsa ka, mme lentswe leo le le utlwang hase la ka, empa ke la Ntate ya nthomileng.

²⁵ Ke le boleletse taba tseo, ke sa ntse ke ena le lona.

²⁶ Empa Moemedi, e leng Moya o Halalelang, oo Ntate a tla o romela ka lebitso la ka, o tla le ruta tsohle, mme o tla le hopotsa tsohle tseo ke le boleletseng tsona.

²⁷ Ke le siela kgotso, ke le fa kgotso ya ka; A dipelo tsa lona di se ferekane, mme di se ke tsa tshoha.

²⁸ Le utlwile kamoo ke le boleletseng kateng, ka re: Ke a tsamaya, mme ke kgutlela ho lona. Hoja le a nthata, le ka be le thabile, kahobane ke itse, ke ya ho Ntate, hobane Ntate o moholo ho nna.

²⁹ Jwale ke le boleletse pele di etsahala, hore, mohla di hlahang, le tle le dumele.

³⁰ Ho tloha jwale ha ke sa tla bua tse ngata le lona, hobane morena wa lefatshe lena o a tla, mme ha a na letho ho nna.

³¹ Empa hore lefatshe le tsebe hoba ke rata Ntate; mme jwalokaha Ntate a ntaetse, ke etsa jwalo. Tsohang, re tlohe mona.