2 Bakorinthe 4 - Contemporary Southern Sotho Bible 2024

2 Bakorinthe 4

¹ Ka baka leo, ha re ena le tshebeletso eo, kamoo re hauhetsweng kateng, ha re tepelle;

² Empa re lahlile tse patilweng tsa bohlola, re sa tsamaye ka mano, mme re sa tshohe lentswe la Modimo; empa ka ho bonahatsa nnete, re ipuella matswalong a batho bohle pela Modimo.

³ Empa haeba molaetsa o molemo wa rona o patehile, o patetswe ba timelang.

⁴ E leng bao modimo wa lefatshe lena o foufaditseng dikelello tsa ba sa dumelang, hore lesedi la Evangeli ya kganya ya Kreste, eo e leng setshwantsho sa Modimo, le se ke la ba kganyetsa.

⁵ Hobane ha re ipolele, empa re bolela Jesu Kreste hore ke Morena; mme rona re bahlanka ba lona ka baka la Jesu.

⁶ Hobane Modimo, ya laetseng hore lesedi le tjhabe lefifing, ke wona o bonesitseng dipelong tsa rona, hore o tle o re nee lesedi la tsebo ya kganya ya Modimo sefahlehong sa Jesu Kreste.

⁷ Empa re na le letlotlo lena dipitseng tsa letsopa, hore matla a fetisisang e be a Modimo, e seng a rona.

⁸ Re tshwenyehile ka nqa tsohle, empa ha re tsielehe; re a tsieleha, empa ha re nyahame;

⁹ Re a hloriswa, empa ha re a furallwa; re liheloa fatše, empa ha re timetsoe;

¹⁰ Ka mehla re jara ho shwa ha Morena Jesu mmeleng, hore bophelo ba Jesu le bona bo tle bo bonahatswe mmeleng ya rona.

¹¹ Hobane rona ba phelang, kamehla re nehelanwa ka lefu ka baka la Jesu, hore bophelo ba Jesu le bona bo tle bo bonahatswe nameng ya rona e shwang.

¹² Kahoo lefu le sebetsa ho rona, empa bophelo bo sebetsa ho lona.

¹³ Re na le moya o le mong wa tumelo, jwalokaha ho ngodilwe, ho thwe: Ke dumetse, mme ke ka baka leo ke buileng; le rona re a dumela, mme ke ka baka leo re buang;

¹⁴ re ntse re tseba hobane ya tsositseng Morena Jesu bafung, le rona o tla re tsosa ka Jesu, mme o tla re hlahisa le lona.

¹⁵ Hobane tsohle di etsetswa lona, hore mohau o atileng ka ba bangata ba nang le teboho e ngatafale, e be tlotliso ya Modimo.

¹⁶ Ka baka leo ha re tepelle; empa leha motho wa rona wa kantle a senyeha, motho ya ka hare o ntse a ntjhafatswa letsatsi le letsatsi.

¹⁷ Hobane mahloreho a rona a bobebe, a motsotsoana, a re sebeletsa boima bo fetisisang, bo sa feleng, ba kganya;

¹⁸ Re ntse re sa talime tse bonahalang, empa re talima tse sa bonahaleng; empa tse sa bonahaleng ke tsa ka ho sa feleng.