Salmos 150 - Chuj San Mateo Bible

Aljocab' vach' lolonel d'a Jehová

¹ Aljocab' vach' lolonel d'a Jehová. B'itanan̈ec d'a Dios d'a scajnub'. B'itanan̈ec d'ay yujto te nivan sb'inajnaquil d'a satchaan̈.

² B'itanan̈ec d'a Dios yuj tas satub'tac sb'o'o. B'itanan̈ec d'ay yuj sb'inajnaquil, malaj junoc mach lajan yed'oc.

³ B'itanan̈ec d'ay yed' q'uen trompeta. B'itanan̈ec d'ay yed' te' arpa yed' pax salterio.

⁴ B'itanan̈ec d'ay yed' pandereta, tzex q'uepax cheneljoc yuj tzalajc'olal. B'itanan̈ec d'ay yed' flauta yed' pax juntzan̈ yamc'ab' yic b'it ay sch'an̈al.

⁵ B'itanan̈ec d'ay yed' q'uen platillo tzin̈in̈i sc'an̈i. B'itanan̈ec d'ay yed' q'uen platillo chaan̈ sc'an̈i.

⁶ Masanil tastac syic' yic', b'itanocab' d'a Jehová. Aljocab' vach' lolonel d'a Jehová.