Salmos 122 - Chuj San Mateo Bible

Lesal yuj junc'olal d'a Jerusalén

Sb'it vin̈aj David. Sb'it eb' israel ayic van sq'ue eb' d'a sb'eal Jerusalén.

¹ Man̈xo jantacoc ix in tzalaj yed' eb' ix alan d'ayin icha tic: Con̈ d'a stemplo Jehová, xchi eb'.

² Axo ticnaic ay on̈xo ec' d'a yol chon̈ab' Jerusalén tic.

³ A Jerusalén, junn̈ej chon̈ab'il yaj sb'oi.

⁴ A d'a jun chon̈ab' tic sja junjun macan̈il eb' schon̈ab' Jehová, yic vach' sb'itaj icha yutejnac yalancan d'a eb' co mam quicham.

⁵ A d'a jun chon̈ab' tic ay juntzan̈ despacho b'aj sch'olb'itaj eb' anima yuj yin̈tilal vin̈aj David d'a stojolal.

⁶ C'anec to syac' junc'olal Dios d'a Jerusalén. Junc'olalocab' yaj eb' xajanan jun chon̈ab' tic.

⁷ Ayocab' junc'olal d'a yol smuroal yed' d'a yol spat sreyal jun chon̈ab' tic, xe chi.

⁸ Yuj svach'iloc eb' in c'ab' voc yed' eb' vetchon̈ab', yuj chi' svala': Ayocab' junc'olal, xin chi.

⁹ Yujto xajan scajnub' Jehová co Diosal vuuj, yuj chi' ol vac' vip in sayanec' tas tz'och svach'iloc Jerusalén tic.