Salmos 101 - Chuj San Mateo Bible

Syac' sti' vin̈ rey d'a Dios

Sb'it jun tic vin̈aj David.

¹ A vach'ilal yed' tojolal ol in b'itej. Mamin Jehová in gana tzin b'itan d'ayach.

² Snib'ej in c'ol tzin b'eyb'alej tojolal. ¿B'aq'uin̈tax val ol ach och ved'oc? Malaj mach ol alan jab'oc chucal d'ayin yuj in b'eyb'al d'a in palacio.

³ Malaj b'aq'uin̈ ol in b'at q'uelan d'a chuc pensaril. Ach in Diosal, max yal-laj in c'ol sb'eyb'al eb' tzach paticaneli. Malaj b'aq'uin̈ ol in cha ja eb' d'a in tz'ey.

⁴ Najat ol vic'canel chucal d'a in pensar. Malaj valan vic yed' eb' sc'ulan chucal chi'.

⁵ Ol in satel eb' c'ub'eltac tz'alan specal eb' anima. A eb' ac'umtac yed' eb' syic'chaan̈ sb'a, man̈ ol techajlaj eb' vuuj.

⁶ Ol vila' mach eb' c'anab'ajum d'a sat lum luum tic, a eb' ol munlaj ved'oc. An̈ej eb' vach' sb'eyb'al ol och in checab'oc.

⁷ Man̈ ol in cha ajlaj eb' ixtum anima d'a in palacio. A eb' naumchaan̈ lolonel, man̈ ol in cha ajlaj eb' d'a vichan̈.

⁸ Mamin Jehová, d'a junjun c'u ol in satel eb' chuc cajan d'a sat co lum tic. Ol in satel masanil eb' sc'ulan chucal d'a yol a chon̈ab'.