Máciya 27 - Jola-Kasa

Li kújowetum Yéesu bata Filat

¹ Hunak hukaten li bújomabu bíb, huhaanaahu hata élambaayi li kunahaanaku kata ésukayi li kujoj min kujamoo buu kommuu li kukaan min kumuk Yéesu.

² Muñeˈe li kujokool kujenk kuban, li kuŋalool kújowetum kujow kusen águubelunaalawu Filat.

Sudaas li amukoolo

³ Nan Sudaas, abetumuu Yéesu li kuŋen bukan, ajukumuu aan Yéesu eketayi lajowemuu boot, li ajok li ehaaseen. Li aŋa’ sihanjalasu sata sídalamasu áyii li kuŋenayi alaañen ajow asen huhaanaahu hata élambaayi li kunahaanaku kata ésukayi,

⁴ Min aaniil: — Likankaan kahoofoo, min iŋa’muu an akaanut wahoowah ibet li kuŋenuul min joono li jimukool. Bale li koonool: — Waa bútumoli bóomi bo? Awu uhaase!

⁵ Sudaas li abeten sídalamasu li Eluufayi yata Ateemit, ban li ajow aŋa’ kaneew min akokoo.

⁶ Huhaanaahu hata élambaayi li humuluk sídalamasu, ban li hoon: — Colut min sídalamasu unsu siŋali kaan li sídalamasu sata Eluufayi yata Ateemit, mata laalu bunoom bata buloŋ bata an.

⁷ Nan kujamoomuu mata sídalamasu kuban, li kuŋa’ so kunoom etaam yan koone «etaam ateefa ubala», min kuŋa’ yo kukaan kalem kata kahok ejawoola.

⁸ Wahawu unwu újimuu boot yok síyaat bukanabuku li kuloŋ li kuhooñ etaamayi inyu «etaam húsim».

⁹ Muñowu kulimaku kan Selemi alobumuu kúbajummuu eeno, ammuu afulofet, nan aanumuu: «Kuyayyab sihanjalasu sata sídalam áyii li kuŋenayi, sata bunoomabu ban kata Isilayeel kujamoomuu min kubet boot li akila.

¹⁰ Ban li kusen sídalamasu boot bacaamabu bata etaamayi yaaneyimuu “etaam ateefa ubala,” loon Amaaŋenawu alobom momuu.»

Batiibabu bata Yéesu hákil Filat

¹¹ Muñeˈe li kújowetum Yéesu kujow kukaan hakil águubelunaalawu Filat, min agel̥l̥enool aanool: — Awu ommuu áyiiyawu ata Kusuwifaku? Yéesu li aanool: — Lúlobulo mo awu humumi.

¹² Fúlum tó, huhaanaahu hata élambaayi li kunahaanaku kata ésukayi li kul̥oof Yéesu koon lakankaan majakut, bale abagut.

¹³ Muñeˈe Filat li aan Yéesu: — Ujamut wahawu feh wan kulobemuu li wo li kuya li awu?

¹⁴ Bale Yéesu alobut wahoowah li wahawu feh wan kulobumuu kuya li akila. Muñeˈe águubelunaalawu Filat li asego ŋáa’.

Búsukabu li boon Yéesu abaaŋi li ekuluwa

¹⁵ Li kagaan kanookan kata Faak, águubelunaalawu lakatenekaten an akul̥i, an búsukabu bufañumuu min akaten.

¹⁶ Li baj no unnu, an an kukul̥e ajamoye ŋáa’ an koone Yéesu Balabaas.

¹⁷ Muñeˈe nan búsukabu buwoogumuu, Filat li agel̥l̥eniil aaniil: — Ayi jifañe min íkatenuluul? Mantee Yéesu Balabaas, mantee Yéesu an koonemuu Afakenaawu?

¹⁸ Filat lagel̥l̥eniigel̥l̥en loon muñaˈa mata lahaase jak aan batahaay bújimuu li kubet Yéesu li kuŋenool.

¹⁹ Muñeˈe nan Filat abahumuu tan kutiibemuu bukanabuku, aseekool li áhebenul kubil koonool: «Jakum unoken li elobayi yata ánayinaawu ummu akaanutumuu wahoowah, mata síyaat li hukahu lílanlaam ŋáa’ li sísaahut mata akila áji.»

²⁰ Huhaanaahu hata élambaayi li kunahaanaku kata ésukayi li kulob búsukabu min kul̥aw Filat min ákatenul Balabaas min akat min kumuk Yéesu.

²¹ Agúubelunaalawu Filat li alaañen agel̥l̥eniil aaniil: — Ayi li buko kúl̥uba jifañe min íkatenuluul? Li koonool: — Balabaas!

²² Filat li agel̥l̥eniil aaniil: — Kama muñowu buu leete ikaan Yéesu an koonemuu Afakenaawu? Buko feh li koonool: — Abaaŋi li ekuluwa!

²³ Filat li agel̥l̥eniil aaniil: — Kama waa lakaane wajakut? Li kuhaŋ mabaŋulo feh koon: — Abaaŋi li ekuluwa!

²⁴ Nan Filat ajukumuu aan ayilaat to wahoowah, ban búsukabu li buhaŋ máguul̥oo, li aŋa’ mal min afos kuŋenool hákil búsukabu ban li aan: — Butumom bulet li eketayi yata ánayinaawu ummu. Bowuul bo!

²⁵ Búsukabu feh li boonool: — Wahoowah wammuu ubil ulako to li eketayi yoola, ujow ulako li áloli li báñoololi!

²⁶ Muñeˈe Filat li ákatenuliil Balabaas. Bale li alob min kusollaaliyaku kuŋa’ kukaluwaas min kutek Yéesu kuban, li aseniil o’ kujow kubaaŋ li ekuluwa.

Kusollaaliyaku li kuleken Yéesu

²⁷ Muñeˈe kusollaaliyaku kata Filat li kújowetum Yéesu boot li eluufayi yata águubelunaalawu. Húmimahu hata kusollaali kaaku feh li hubil húguutool.

²⁸ Li kúfulen wañawu wata Yéesu min kukaanool hújufo hájunke.

²⁹ Ban li kuhec kugola kata úbuja kukaan éjambi kukaanool li húkow. Nan kubanumuu li kusenool hunuk átuk li kaŋenool káli. Li kúkuntuŋ hákilool min kunaak kulekenool koonool: — Jisaafi, áyiiyawu ata Kusuwifaku!

³⁰ Li kumasenool ban li kuyab hunukahu min kutekool li húkow.

³¹ Nan kulekenumuu Yéesu kuban, li kúfulen hújufowahu han kukaanoolumuu min kulaañen kukaanool wañawu woola. Ban li kújowetumool kúfu’ li ésukayi kujow kubaaŋ li ekuluwa.

Kusollaaliyaku li kubaaŋ Yéesu li ekuluwa

³² Nan kulakomuu káfululaku li ésukayi, li kufam li ánayine akee ata ésukayi yata Siilen an koone Simoŋ. Muñeˈe kusollaaliyaku li kutuuŋool ateb ekuluwaayi yata Yéesu.

³³ Li kujow kujow li kúliiŋ tan koone Goligota, yo yommuu: «Tin tata husend.»

³⁴ Nan kúliiŋ tomuu, li kusen Yéesu bunuk bayawooli li wah wátaliye. Bale nan acafen bomuu, li ahoy bahob bo.

³⁵ Muñeˈe li kubaaŋ Yéesu li ekuluwa, ban li kuñak kútuken kuyiliwum kugaboo wañawu woola.

³⁶ Nan kubaaŋumuu Yéesu li ekuluwaayi kuban li kubah to min kufooyool.

³⁷ Muñeˈe li kuŋa’ kababbalu min kukiic ló wahawu wájimuu li kumukool. Wahawu wakiici dómuu wo wommuu unwe: «Láale Yéesu, Ayíiyawu ata Kusuwifaku.» Ban li kuŋa’ kababbaluwaku kubaaŋ haatiya húkowahu hoola.

³⁸ Muñeˈe kusollaaliyaku li kubaaŋ li sikuluwa kúkuu kúl̥uba kukaan, aahu kaŋen Yéesu káli, aahu kaŋenool kamay.

³⁹ Bukanabuku kanaake kújowum tómuu, li kunaak kutek kúkowiil ban li kugel Yéesu.

⁴⁰ Li kunaak koonool: — Awu jaanumuu luyilo uhum Eluufayi yata Ateemit ban li uŋa’ kunak kúhaaji min ulaañen yo uteef! Nokoomuu loon awu ommuu Añiilawu ata Ateemit, kama ufakenoolo awu humumi! Uwálowul li ekuluwaayi!

⁴¹ Huhaanaahu hata élambaayi li bukanabuku kaliikenemuu ésukayi Eluwaayi yata Móyiis li kunahaanaku kata ésukayi li kuleken Yéesu koonool:

⁴² — Lafakenfaken bukan kukee, ban akitut ayili afakenoolo akila humumool. Inti akila ammuu áyiiyawu ata Isilayeel? Muñeˈe kama áwalowul li ekuluwaayi min úyinenaal li akila.

⁴³ Li Ateemit lákangume ban lansaan: «Injé emmuu Añiilawu ata Ateemit.» Muñeˈe kama boot min ujukaal mantee Ateemit fan afakenool, nokoomuu loon lafañoofañ.

⁴⁴ Maayeet ékuuwayi yan kubaaŋumuu li sikuluwaasu kooj Yéesu li kugelool loon kaabuku kugeloomuu.

Eketayi yata Yéesu

⁴⁵ Nan banakabu buyitenumuu, etaamayi feh li élim boot yok ewaatuwayi éhaajutayi banakabu bakel̥e.

⁴⁶ Nan ewaatuwayi éhaajutayi elehenumuu, Yéesu li akaaw butiya aan: «Elí, Elí, lema sabachthani?» Yo yommuu: «Ateemitom, Ateemitom, wáa újiye li ubetenom?»

⁴⁷ Muñeˈe kukee li bukanabuku kalako tomuu li kujamool li akaaw, li koon: — Ummu li kahooñ Elí!

⁴⁸ Muñeˈe akee li buko li ayaan atey ajow áŋalul hufalen hata hufons ayooken li bunuk bacabe hujow huhob, li akok ho li hunuk añuu Yéesu boot ahob.

⁴⁹ Bale kaabuku li koon: — Ukob min ujukaal mantee Elí fan abil afakenool.

⁵⁰ Yéesu li alaañen akaaw butiya ban, li awalo.

⁵¹ Muñeˈe no unnu, hufalalahu halakomuu li Eluufayi yata Ateemit li húhaacowumul haatiya boot li etaam hukaan ubey úl̥uba. Etaamayi li egoloo. Kugisaaku li kúwembulo.

⁵² Kuyaakaku li kúbabulo min kameeŋe li bukanabuku káyinenumuu li Ateemit ban li kuket, kuyitowul.

⁵³ Nan kúfululumuu li kuyaakaku, Yéesu bayitowulo aban li kaketumuu, li kujow boot Yeelusalem, ésukayi yata Ateemit. Bukan kameeŋe li kujukiil.

⁵⁴ Anahaanawu ata kusollaali téemeel li kusollaaliyaku kalako tomuu li akila kafooyaku kata Yéesu, li kujuk etaamayi li egoloo li wahawu feh wabajumuu, li kúkoli ŋáa’ min koon: — Li mal̥egenamu, ánayinaawu ummu lalakolako Añiil ata Ateemit!

⁵⁵ Li baj to foof kanaale kameeŋe kalakowe lóyi min kunaak kúŋandenul. Kanaalaabuku umbuku li etaamayi yata Gálile kúnabumulo li Yéesu boot kalambenool.

⁵⁶ Li kanaalaabuku umbuku, Mali ata ésukayi yata Madala, li Mali jaaw ata Saak buko Suseef, li jaaw ata bañiilabu bata Sebede, to kulakowe.

Kahokaku kata Yéesu

⁵⁷ Nan líiŋumuu kátiimayi, ánayine akee akaane usaanum, ata ésukayi yata Alimate, li áliiŋul. Anáyinaawu kajawool Suseef ban akila foof ágoom ata Yéesu.

⁵⁸ Muñeˈe Suseef ata Alimate li ajow ajuk Filat min aanool asenool ehuluŋayi yata Yéesu. Mal̥egen Filat li alob min kusenool yo.

⁵⁹ Suseef li aŋa’ ehuluŋayi yata Yéesu ban li aŋa’ kábil kawunkul kahiite min al̥iim yo.

⁶⁰ Nan Suseef al̥iimumuu ehuluŋayi aban, li aŋa’ yo ajow ahok li huyaakahu hoola, han akite li awok li hugisa. Ban, li abakken húlankiin háamak hujow húfib kánokenumaku kata huyaakahu, aban li ajow.

⁶¹ Mali ata ésukayi yata Madala li Mali aahu to kulakowe mabahe kujooŋoo li huyaakahu.

Kusollaali li kufooy huyaakahu

⁶² Li líiŋ hunak hukaten, hammuu hunakahu hanabumuu li hata kafaleyaku kata hunakahu hata húyiiyaayahu hata Kusuwifaku, huhaanaahu hata élambaayi, li Kufaaliisiyeŋaku.

⁶³ Nan kúliiŋumuu li koon Filat: — Anahaan, jiwayil̥owe kaanaku ámalamiñawu ummu lansaan akila li buloŋ aketumuu jow baj kunak kúhaaji, fan ayitowumul li kaketumuu.

⁶⁴ Mó mújimuu, ulob min huyaakahu hufooyi boot yok li hunakahu húhaajutahu, jakum bil kúgoomaku koola kujow kúkuwet ehuluŋayi min koon ésukayi layitowuuyitowul li kaketumuu. Mata kukaan momuu, émalimiñayi inyu yásolaayi fan ehaŋ yátinaalayi.

⁶⁵ Filat li aaniil: — Kusollaali kumbuke kayilo kufooy. Jijow jifooy huyaakahu loon jifañumuu.

⁶⁶ Mal̥egen li kujow kufale kafooyaku kata huyaakahu. Li kukuŋ hugisaahu hababumuu kánokenumaku kata huyaakahu ban li kuŋa’ kusollaali kukaan to min kufooy.