Máciya 24 - Jola-Kasa

Yéesu li alob mata kahumowaku kata eluufayi yata Ateemit li mata wahawu wammuu ubaj tówum adunaayi eban

¹ Yéesu li áfulul li Eluufayi yata Ateemit alako ejow, kúgoomaku koola li kúkoojulool min kúhiisool bateefelabu bata Eluufayi yata Ateemit.

² Bale Yéesu li aaniil: — Inti jijuke wahawu unwu feh? Li mal̥egenamu fan ilobuul: let baj taatu maayeet huyitik hano háami li hubil hulemboo li hufaal ho huyitik, ho báhoolulooti.

Sílaam li jálaaten

³ Emmuu Yéesu lajowujow abah li huyuuyahu hata unuunukenawu wan koonemuu Olíibiye, kúgoomaku koola li kúkoojulool baleyiil min kugel̥l̥enool koonool: — Ulóboli, nay wahawu unwu wóomi li ubaj? Waa wóomi li úhiis ebilayi yooli li kabanaku kata adunaayi?

⁴ Yéesu li aaniil: — Jíkaanum, jakum bil an abuntuul.

⁵ Mata bukan kameeŋe fan kubil min kuŋa’ kajawaku kúmbaam min koonuul buko kommuu Afakenaawu! Ban fan kubunt bukan kameeŋe.

⁶ Fan jijam bukanabuku li kulob mata kutiik, li mata koone kata kutiik. Bale sákoluul. Mata wahawu unwu wóotisooti ubaj. Bale let fan lako kabanaku kata adunaayi.

⁷ Esúk fan eyito etiik li ésuk, jáyii li jitiik li jáyii. Fan baj bamuufaay ban bameeŋe. Etaamayi foof fan egoloo ban bameeŋe.

⁸ Bale wahawu unwu feh uhinhin unokoo loon húkitumahu hata sílaamasu sata anaale li éluŋun.

⁹ «Muñeˈe no unnu, bukan fan kujokuul kubet li kuŋen bukan, min kúlaamenuul ban fan kumukuul. Bukanabuku feh fan kulatuul mata ínje íji.

¹⁰ Ban bukan kameeŋe fan kukat káyinen lí ínje. Fan kunaak kúhoolowoo, ban li kulatoo.

¹¹ Bukan kámale koon buko kufulofet koom, fan kúfulul ban fan kubunt bukan kameeŋe.

¹² Búl̥afutabu fan bumeeŋ li ésukayi bil gay, mó lí múji hufañahu han bukan kameeŋe kufañumuu kaabuku, li huhoko.

¹³ Bale an ahankenumuu min átuk lit boot yok li húbanumahu, Ateemit fan afakenool.

¹⁴ Hulimahu unhu Hásuumaahu hata Jáyiiyaju fan huwaaleyi tanootan li adunaayi feh, min lako búhiisenum boot li ésukayi feh. Banumuu, kabanaku kata adunaayi li kukit kúliiŋul.

Majakutamu Makajenemuu

¹⁵ — Mó mújimuu, fan jijuk «Majakutamu Makajenemuu» li mukaani tan ñéyimuu li Eluufayi yata Ateemit. Dañeel ammuu afulofet lalollob mata Majakutamu ummu. (An alakomaa kajanga, laate ánaanum jak yo yommuu waa!)

¹⁶ Nan wahawu unwu wommuu li ubaj, bukanabuku kammuu kulako li etaamayi yata Súde, koote kutey boot li kuyuuyaku.

¹⁷ An alakomuu haatiya eluuf, jakum áwalowul abil kaŋa’ wah li eluufayi yoola átowum atey.

¹⁸ An alakomuu li kal̥aakool, jakum alaañ boot boola ajow kaŋa’ kañool.

¹⁹ Iyéno, kanaalaabuku kammuu kuhalet, li kammuu li kulako kalaahen li kunakaku unku!

²⁰ Jil̥aw Ateemit jakum bil huteyahu hooluul hulako li taŋayi yata kutontaku, mantee foof li hunak hata húyiiyaay hata Kusuwifaku.

²¹ Mata no unnu, bukanabuku fan kúlaam sílaam sáamak sabajulelut nan adunaayi ejuul̥imuu boot yok muñeˈe. Ban let bil laañen baj sílaam loon unsu.

²² Ban Ateemit ajokeenutumuu min áyaakul kunakaku unku, an let aloŋ. Bale láyaakuuyaakul ko humum hata bukanabuku kan al̥usumuu kulako koola.

²³ «Muñeˈe an aanuulumuu: “Afakenaawu ummu taate!” mantee foof: “Ummu taata!” jakum jíyinen li akila.

²⁴ Mata bukan kámale koon buko kufakena koom, li bukan kámale koon buko kufulofet koom, fan kubil kúfulul. Fan kunaak kukaan wah wáamak wájaahaleniye boot jabunt buko bayiliyeene, maayeet bukanabuku humumiil kan Ateemit al̥usumuu kulako koola.

²⁵ Muñeˈe lilobuulobumuu ikat to.

²⁶ «Mó mújimuu koonuulumuu: “Jijuke, ummu li kayiinaayaka!”, jakum jijow bo. Mantee foof li koonuul: “Jijuke, ummu min ayolowe li úfitawu!”, jakum jíyinen.

²⁷ Mata loon kawiwijenaku kata emitayi kujukeyimuu Akiw boot yok Jalaŋ, mo foof ebilayi yata Añool-An yommuu li enokoo.

²⁸ Tanootan tan wah wakete woom, síkosumasu fan sifam to.

Eláañulayi yata Añool-An

²⁹ — Nan sílaamasu sata kunakaku unku sommuu siyaan siban, banakabu fan búlimen. Hul̥eeñahu fan hukat kawuŋen. Bawuutabu fan búlowumul li emitayi, Ateemit fan ákatenul sembaasu feh sammuu li emitayi.

³⁰ Muñeˈe no húhaasumahu hata Añool-An hommuu hujuki li emitayi. Esúkayi feh yammuu li etaamayi fan el̥okoo, ban fan ejuk Añool-An li abilumul li ufaalawu wata emitayi, li sembe li máyiineni máamak ló.

³¹ Nan kasiinaku káamakaku kommuu li kul̥oki, Añool-An fan áboñul kumalakaaku koola kujow boot tanootan li etaamayi, kujow kuwomen bukanabuku kan al̥usumuu, kítum li hulej haahe hata etaamayi boot li haaha.

Bukittenoolum bata bul̥el̥u

³² — Jiŋa’ bul̥el̥u jikaan bukittenoolum min jíhaasum to wah. Jowumuu waanawu wata bo únih, ban etojayi yata bo li éyawul, li jihaas joon húl̥iyahu húkoojulo.

³³ Li manolamu, bukuluul foof nan jommuu li jijuk wahawu unwu feh, jihaas joon Añool-An lálehenulo, lákoojulo li mal̥egen.

³⁴ Li mal̥egenamu fan ilobuul, bukanabuku kata muñeˈe let kuket foofiil feh tówum wahawu unwu feh ubaj.

³⁵ Emitayi fan ebil ébujo, etaamayi foof fan ebil ébujo, bale kulimaku kúmbaam let kuniilo maayeet.

Ateemit balewool ahaase nay adunaayi yommuu li eban

³⁶ — Bale bajut an ahaase nay hunakahu unhu hommuu li húliiŋ, li nay ewaatuwayi inyu yommuu li éliiŋ. Kumalakaaku kammuu li emitayi kuhaasut. Añiilawu ahaasut. Atuubaawu bale ahaase.

³⁷ Mata wahawu wabaj nomuu li taŋayi yata Nówe, wo foof wommuu li ubaj nan Añool-An ammuu li álaañul.

³⁸ Mata li kunakaku kákibbenumuu malamu máamakamu mameeŋenumuu etaamayi feh, bukanabuku kunaanaak kutiñ li kuhob, li kunaak kuyab ban li kukaan bañooliil buyabo, boot yok hunakahu nan Nówe anokenumuu li busaanaabu báamakabu.

³⁹ Bukanabuku kuhaasut koon wah unwu li ubaj, boot yok nan malamu máamakamu mubilumuu mutebiil foofiil feh muwujetum. Muñaˈa foof emmuu li bil nokoo nan Añool-An ammuu li álaañul.

⁴⁰ No unnu, kánayine kúl̥uba kulakomuu bulok li kal̥aak, ano fan aŋali min aahu akati to.

⁴¹ Kanaale kúl̥uba kulakomuu ehumen, ano fan aŋali min aahu akati to.

⁴² Mo emmuu kama jíkaanum, mata jihaasut hunak hay Amaaŋenawu ooluul ammuu li álaañul.

⁴³ Jihaas kaanaku, an ata eluufool ahaaseenemmuu ewaatu yay li ehukaayi ákuuwawu áami li abil, manooman fan ákaanum, ban let akat ákuuwawu min ásuuh eluufayi yoola min ánokenul.

⁴⁴ Mó mújimuu bukuluul foof jíkaanum, mata Añool-An fan álaañul nan jiyinooleenut joon no láami li álaañul.

Bukittenoolum bata aloka al̥egene ban li ájallo

⁴⁵ — Kama ayimaa ammuu aloka al̥egene ban li ájallo? Akila ammuu alokaawu an anahaanawu oola aŋa’muu kulokawool kaabuku asenool aaken, ánaakum aseniil hutiñiil taŋ yata hutiñ báliiŋe

⁴⁶ Awólo, alokaawu ummu, an anahaanawu oola ammuu li áliiŋul, li atookool akila li kakaan bulokabu ban asenoolumuu kakaan!

⁴⁷ Li mal̥egenamu fan ilobuul, anahaanawu fan asen alokaawu ummu ebajayi yoola feh aakenool.

⁴⁸ Bale nokoomuu loon alokaawu ummu lakankaan aloka ajakut, aane li buyinumool: «Anahaanawu úmbaam let álaañul muñeˈe»,

⁴⁹ min átoŋ kútek kufaalool kuloka, li atiñ ban li anaak ajow ahob li kákaliyenoolemuu,

⁵⁰ anahaanawu ata alokaawu ummu, fan abil álaañul hunak han alokaawu ahaasut aan no láami li álaañul, li ewaatu yan ahaasut.

⁵¹ Anahaanawu fan atek alokaawu kútek kásengiye. Ban fan aŋalool akaan li káhoolomuu, ban jíl̥okaju jommuu li sílaamasu sáamakasu.