Máciya 22 - Jola-Kasa

Yéesu li aŋa’ búyabo akaan bukittenoolum

¹ Yéesu li alaañen aŋa’ bukittenoolum min alob li bukanabuku aaniil:

² — Jáyiiyaju jata Ateemit jinokoonokoo li áyii alake sinaaŋ sata búyabo añoolool áyine.

³ Ayíiyawu li aboñ kulokaabuku koola kujow kúhooñul bukanabuku kan ahebumuu búyabowabu. Bale li kuhoy babil.

⁴ Li alaañen aboñ kuloka kakee min aaniil: «Jilob bukanabuku kan ihebumuu búyabowabu jooniil sinaaŋasu sata búyabowabu silaki ban. Limuumuk kúmuunaaku kúmbaam kaluukaaku, li sínuukuleŋasu súmbaam saluukaasu. Muñeˈe wahawu feh ufaleˈe. Jibil bata sinaaŋasu sata búyabowabu.»

⁵ Bale bukanabuku kan kuhebumuu kúkaanumut min kujow, akee bata kal̥aakool, aahu kájula.

⁶ Kaabuku li kujok kulokaabuku kata áyiiyawu kúcoocikoo, ban li kumukiil.

⁷ Ayíiyawu huuñool li hulit. Li aboñ kutiikaabuku koola kujow kumuk bukanabuku kamukumuu kulokaabuku koola, ban li kúsu’ ésukayi yooliil.

⁸ Fúlum tó, li aan kulokaabuku koola: «Sinaaŋasu sata búyabowabu silaki ban, bale bukanabuku kahebimuu kufineenut min kutooke kuhebi.

⁹ Muñeˈe jijow boot li úwaayawu wata útinawu, min jíhooñul bukanabuku feh kan jommuu li jijuk boot li búyabowabu.»

¹⁰ Mal̥egen kulokaabuku umbuku li kujow boot li útinawu kujow kúwomenul bukanabuku feh kan kujukumuu, kajakumuu li kajakutumuu kubil kumeeŋen dán sinaaŋasu sata búyabowabu sommuu li sitiñi.

¹¹ «Bale nan áyiiyawu abilumuu bajukabu bata bukanabuku kan kúhooñulumuu, li ajuk ló an akaanowut kañ kata kagaan.

¹² Ayíiyawu li agel̥l̥enool aanool: “Afaalom, kama awu buu lúnokenumulo láale eeno baakut kañ kata kagaan?” Anáyinaawu ayilaat alob to hulim.

¹³ Muñeˈe áyiiyawu li aan kulokaabuku koola: “Jijenk kootaku li kuŋenaku koola, ban li jitebool jibeten tíyaŋ li élimayi, ban jíl̥okaju jommuu, li sílaamasu.”

¹⁴ Mata bukan kameeŋe kúhooñuli, bale kal̥usimuu kufamut.»

Kufaaliisiyeŋ li kugel̥l̥en Yéesu mata búhalabu bahaleyimuu Sesaal

¹⁵ Muñeˈe Kufaaliisiyeŋaku li kujow kujoj min kujamoo li hulim han kommuu kugel̥l̥en Yéesu bájum li kúlowenumool li malobelamu moola.

¹⁶ Li kúboñul kúgoomaku kooliil li bukanabuku kata hujojahu hata Elod kujow koon Yéesu: — Anahaan, jihaase joon awu an alobe mal̥egen. Ban luliikeneliiken bukanabuku li mal̥egen buu kommuu kunaak kuloŋ loon Ateemit afañumuu. Ukóliwut anoowan, mata újukeleliit li buul.

¹⁷ Muñeˈe kama úloboli buu luyinoole. Mantee Eluwaayi yata Móyiis yonsoon lootaale uhalaal búhalabu bahaleyimuu áyiiyawu áamakawu Sesaal, mantee a’aa’?

¹⁸ Bale emmuu Yéesu lahaase uyinoolawu wooliil wajakutumuu, li aaniil: — Búhoolowabe! Wáa újiye li jóomi li jabuutoolom?

¹⁹ Jíhiisom sídalamasu saŋaleyimuu min hal. Mal̥egen li kúhiisool ehanjal.

²⁰ Nan kúhiisool yomuu, Yéesu li agel̥l̥eniil aaniil: — Kambu kata ayi li kajaw kata ayi kóomi ló?

²¹ Li koonool: — Kata Sesaal. Yéesu li aaniil: — Seeh, kama jilaañen Sesaal wahawu wata Sesaal. Ateemit li jilaañenool wahawu wata Ateemit.

²² Nan kujamumuu kulimaku unku, li kusego ŋáa’. Li kukat to Yéesu min kuwuj.

Búwonnoo mata kayitowulaku kata kaketumuu

²³ Hunakahu hanolahu, bukanabuku kan koonemuu Saduusiyeŋ li kubil kutook Yéesu. (Kusaduusiyeŋaku umbuku koone kaketumuu let kuyitowumul li eketayi.) Li kugel̥l̥en Yéesu koonool:

²⁴ — Anahaan, Móyiis lansaan: «Anáyine aketumuu ban aŋañenut, atuyool li atowo aseekool, mantee li kubukoo bañiil boot li ánayinaawu aketumuu.»

²⁵ Ban bajeene li óloli kutuyaay koono hutok li kúl̥uba. Atínaalawu li ayab anaale aban li aket. Emmuu kubajut bañiil, atuyool li atowo aseekool.

²⁶ Manolamu, ál̥ubutawu foof li aket, yaboo li áhajutawu boot yok li atoken li ál̥ubutawu.

²⁷ Nan kutuyaayaku hutok li kúl̥ubaaku kuketumuu foofiil feh kuban, anaalaawu foof li aket.

²⁸ Kama muñowu nan kaketumuu kommuu kuyitowumul li eketayi, ayi li buko ammuu aŋa’ anaalaawu alako aseekool, emmuu buko foofiil feh kuyabeenooyab?

²⁹ Yéesu li aaniil: — Jiliimooliimoo, mata jínaanumut Bakiicelabu. Jínaanumut foof sembaasu sata Ateemit.

³⁰ Mata nan kayitowulaku kata kaketumuu, káyinaabuku let kuyab, kaalaabuku let kuyabo. Bale fan kunokoo loon emalakaayi yammuu haatiya emitayi.

³¹ Kama jijangawut waa Ateemit alobuulumuu mata kayitowulaku kata bukanabuku kaketumuu? Lansaan:

³² «Injé emmuu Ateemitawu ata Abulaham, Ateemitawu ata Isaak, li Ateemitawu ata Sakob.» Mó mújimuu, Ateemit alet Ateemitawu ata bukanabuku kaketumuu, bale Ateemitawu ata bukanabuku kaloŋumuu.

³³ Nan búsukabu bujamumuu kulimaku unku kata Yéesu, li busego feh mata kulimaku kan aliikeniilumuu kúji.

Eluwaayi yahaŋumuu feh

³⁴ Bale nan Kufaaliisiyeŋaku kuyilaat kulob wahoowah, li kujoj.

³⁵ Muñeˈe akee li buko, aliikena ésukayi Eluwaayi yata Móyiis, li agel̥l̥en Yéesu kagel̥l̥en kata jabuutoo aanool:

³⁶ — Anahaan, eluwa yay ehaŋumuu li siluwaasu feh?

³⁷ Yéesu li aanool: — Loote ufañ Amaaŋenawu Ateemit ooli li buyinumi feh, li yaali feh, li kayinooli feh.

³⁸ Eluwaayi inyu ehaŋumuu feh. Yo yommuu yátinaalayi.

³⁹ Yál̥ubutayi yanokoomuu li yátinaalayi yo yommuu inye: «Ufañ afaali an loon awu humumi úfañoolomuu.»

⁴⁰ Li siluwaasu unsu síl̥uba, siluwa saasu feh sata Móyiis sihajomuu, kulimaku kata kufulofetaku li so foof sihajomuu.

Kilisita, Añiil li Amaaŋen ata Dayit

⁴¹ Muñeˈe nan Kufaaliisiyeŋaku kuwoogumuu, Yéesu li agel̥l̥eniil aaniil:

⁴² — Buu jiyinoole li Afakenaawu? Añool ayi laam? Kufaaliisiyeŋaku li koonool: — Afakenaawu Añiil ata Dayit.

⁴³ Yéesu li aaniil: — Kama buu kaane Dayit, li búkaanum bata Buyinumabu Banabaabu, li ahooñ Kilisita Amaaŋen? Mata Dayit lansaan:

⁴⁴ «Amaaŋenawu Ateemit lansaan Amaaŋenawu úmbaam: “Ubil ubah kaŋenom kúli boot yok nan emmuu iŋa’ kulatoolayi ikaani úkakul”.»

⁴⁵ «Kama Dayit ahooñoolumuu Amaaŋen, buu Afakenaawu ayilo alako bale Añool Dayit?»

⁴⁶ Anoowan li buko ayilaat alob to hulim. Nan fú’ tómuu, anoowan foof alaañenut akaañen agel̥l̥en Yéesu wah.