Máciya 20 - Jola-Kasa

Bukittenoolum bata kuloka li etool yata úbiiñ

¹ — Jáyiiyaju jata Ateemit jinokoonokoo li an ata etaam, áfule li bújom bíb ajow huŋes kuloka boot li bul̥ibabu boola bata úbiiñ.

² Li ajamoo li kulokaabuku mata min acaamiil bacaamabu bata etihunaka. Ban li ájowetumiil kujow kulok li bul̥ibabu boola bata úbiiñawu.

³ Nan banakabu búlabulumuu, ewaatuwayi etoken li ebaalikenayi baŋeje, ánayinaawu li alaañen áfu’, li ajuk kuloka kukee kabajut bulok, mayitowe li kaayeenaku.

⁴ Anáyinaawu li aaniil: «Bukuluul foof jijow jilok li bul̥ibabu búmbaam bata úbiiñawu min ban li icaamuul bacaam bajake.» Mal̥egen li kuwuj.

⁵ Anáyinaawu li alaañen áfulul, banakabu bayitene, li bo foof bakel̥e, li alaañen akaan manolamu.

⁶ Muñeˈe nan banakabu bufañumuu kálus, ánayinaawu li áfulul boot bata kaayeenaku, li alaañen ajuk to kuloka kukee mayitowe. Li agel̥l̥eniil aaniil: «Wáa újiye li joono taatu etihunakaayi feh bakaanut wahoowah?»

⁷ Kulokaabuku li koonool: «Mata bajut an áŋaloli jijow jilokool.» Anáyinaawu li aaniil: «Yoo, kama bukuluul foof jijow jilok li bul̥ibabu búmbaam bata úbiiñawu.»

⁸ «Muñeˈe nan títiimomuu, ánayinaawu ata bul̥ibabu li aan anahaanawu ata kulokaabuku koola: “Uhóoñul kulokaabuku min ucaamiil. Ukítum li kulokaabuku kaŋalimuu búsol ujow úbanum li kútinaalabuku.”

⁹ Mal̥egen kulokaabuku kabilumuu banakabu báluse, li kubil kuyab anoowan bacaam bata etihunaka.

¹⁰ Kulokaabuku kútinaalabuku kan ajandumuu aŋa’ li kubil, min kuyinoo li koon bacaamabu booliil fan buhaŋ bata kúsolaabuku. Bale anoowan li buko li ayab foof bacaam bata etihunaka.

¹¹ Nan kútinaalabuku kuyabumuu anoowan bacaam bata etihunaka, li kúmummunoo mata wahawu wan ánayinaawu ata bul̥ibabu bata úbiiñawu akaanumuu.

¹² Muñeˈe kulokaabuku kútinaalabuku li koon ánayinaawu: “Kulokaabuku umbuku kan uŋalumuu búsol, ewaatu yano bale kuloke, ban li ucaamiil loon áloli, jálaamumuu etihunakaayi feh li hásufaahu hata banakabu.”

¹³ Bale ánayinaawu li aan akee li buko: “Atuyom, ifetut li awu maayeet. Inti bucaam bata etihunaka lujamoolaye min icaami?

¹⁴ Uŋa’ bacaamabu buya min ujow. Injé ifañe, li icaam alokaawu ummu ásolaawu le loon awu.

¹⁵ Kama waa iyilaat ikaan ebajayi yúmbaam loon ifañumuu? Bale waa lutiitii min ikaaniilumuu suum?”

¹⁶ Mó mújimuu bukanabuku kúsolaabuku fan kubil kulako kútinaa, min bukanabuku kútinaalabuku kulako kúsola.»

Yéesu li alaañen alob mata eketayi yoola li mata kayitowulaku koola li eketayi

¹⁷ Muñeˈe Yéesu li alako ejow boot Yeelusalem, li aŋa’ kúgoomaku kúfu’ jooliil min aaniil buko li ejowayi:

¹⁸ — Jijanten! Alolaal ummuwaal li ejow boot Yeelusalem ban Añool-An ammuu li abeti li kuŋen kata huhaanaahu hata élambaayi, li kata kaliikenemuu ésukayi Eluwaayi yata Móyiis. Fan koon lafeefet min lako boot min aket.

¹⁹ Ban fan kuŋalool kusen kákaanumutumuu li Ateemit balewool min kulekenool. Fan kuŋa’ kukaluwaas min kutekool, ban li kubaaŋool li ekuluwa. Bale hunakahu húhaajutahu fan ayitowumul li eketayi.

Kal̥awaku kata jaaw ata bañiilabu bata Sebede

²⁰ Muñeˈe jaaw ata bañiilabu bata Sebede li ákoojul Yéesu li bañoolool ló, ban li ákuntuŋ hákilool boot kal̥awool wah ukee.

²¹ Yéesu li agel̥l̥enool aanool: — Waa lufañe? Anaalaawu li aanool: — Ulob min bañoolom búl̥uba umbe bil kubah, akee li buko kaŋeni kúli, aahu kaŋeni kamay nan ommuu ulako li jáyiiyaju jooli.

²² Yéesu li aaniil: — Bukuluul jihaasut waa jil̥awe li wo. Mantee jiyilo jihob ejunkayi yata sílaamasu yan ínje emmuu li ihob? Li koonool: — Jiyilo jihob yo.

²³ Yéesu li aaniil: — Li mal̥egenamu fan jihob ejunkayi yan ínje emmuu li ihob. Bale mata kabah kaŋenom kúli, mantee foof kaŋenom kamay, inti lí ínje éemi li bilumul. Bale kúbahumaku unku kata bukanabuku kan Atuubawom akaan ko tomuu boot.

²⁴ Nan kúgoomaku kuŋenayi kaabuku kujamumuu loon muñaˈa, súumutiil li kutuyaayaku kúl̥ubaaku.

²⁵ Muñeˈe Yéesu li áhooñuliil foofiil feh min aaniil: — Jihaase joon kunahaanaku kata bukanabuku kákaanumutumuu li Ateemit balewool kubabbaj sembe li buko, bukanabuku káamakabuku li kúhiisiil kaanaku sembe kooke.

²⁶ Wahawu unwu wootut ubaj li bukuluul. Bale an afañumuu min alako an áamak li bukuluul, laate alako alokaawu ooluul.

²⁷ Ban an li bukuluul afañumuu min alako átinaa, alako amiikeelawu ooluul.

²⁸ Mo foof Añool-An abilutumuu boot min abaj emiikeel, bale min alako amiikeel. Ban li asen buloŋool bulako búhal boot li bukan kameeŋe.

Yéesu li afaken bukan kúl̥uba káfuume

²⁹ Muñeˈe Yéesu li kúgoomaku koola li kulako ejow kúfu’ li ésukayi yan koonemuu Séliko, búsuk báamak li búnabul li akila.

³⁰ Li baj kánayine kúl̥uba káfuume kabahe li kakaŋaku kata bútinabu. Muñeˈe li kujam kaanaku Yéesu ummu li éjowum tó, li kubaŋulo koonool: — Uyíyenoli, anahaan, Añiil ata Dayit.

³¹ Búsukabu li butaleniil min kooniil kulu. Bale buko li kuhaŋ mabaŋulo koon: — Uyíyenoli, anahaan, Añiil ata Dayit.

³² Yéesu li ayiten ban li ahooñiil, min agel̥l̥eniil aaniil: — Waa jifañe min ikaan boot li bukuluul?

³³ Li koonool: — Anahaan, jifañe min úkaanoli min jinaak jijuk.

³⁴ Yéesu li áyiyeniil ŋáa’. Li ago’ kúkilaku kooliil, li kuyaan kujuk ban li kunab li akila.