Máciya 19 - Jola-Kasa

Yéesu li alob mata búyabo li mata kaban búyabo

¹ Nan Yéesu abanumuu elobayi yata kulimaku unku, li ájowum li etaamayi yata Gálile alo li yata Súde, kageb kaaka katunkaku kaaneyimuu Suuludeŋ.

² Búsuk li bunab li akila. Li afaken to kásomutumuu li buko.

³ Kufaaliisiyeŋ kakee li kufañ kubuutoo Yéesu, li kúkoojulool min kugel̥l̥enool koonool: — Mantee eluwaayi yonsoon ánayine layilo aan aseekool ábalo, mata wahoowah úji?

⁴ Yéesu li aaniil: — Kama jijangawut Hulimahu hata Ateemit haanumuu «Li húkitumahu, Ateemit láwuwenwuwen ánayine li anaale?»

⁵ Ban li aan «Wahawu unwu újimuu ánayinaawu fan áfu’ bata atuubawool li jaawool, min ajow kukin li aseekool, min buko kúl̥uba kulaañ kulako an ano?»

⁶ Min lako muñeˈe kulet bukan kúl̥uba, bale an ano. Kama jakum an ayiis bukan kan Ateemit áginnoole.

⁷ Kufaaliisiyeŋaku li kugel̥l̥en Yéesu koonool: — Kama muñowu wáa újimuu Móyiis li asen eluwa yaane, ánayine áatimuu aan aseekool ábalo, laate akiic eleetal yata kakatoo asenool?

⁸ Yéesu li aaniil: — Mal̥aal̥amu mata uyinumawu wooluul mújimuu Móyiis li akat bo min jinaak jikatoo li kuseekuul. Bale li húkitumahu, nokooleenut loon muñaˈa.

⁹ Bale ínje fan eenuul, ánayine aanumuu aseekool ábalo, ban lakowut anaalaawu ánayine akee ahintenool, min áyabul anaale akee, ánayinaawu ummu lahintenhinten anaale alet oola.

¹⁰ Muñeˈe kúgoomaku koola li koonool: — Kaanumuu loon muñaˈa éemi li nokoo ánayinaawu hákil aseekool, kama haŋe majak ulako to bayabut.

¹¹ Yéesu li aaniil: — Inti bukanabuku feh kuyilo kukaan loon kulimaku unku kulobumuu, bale bukanabuku kan Ateemit asenumuu kayile min kukaan loon kulobumuu.

¹² Baje wah wájiye bukan kameeŋe li kulako to muñaˈa bayabut. Kukee káwuwiil, kaabuku bukan kukaaniil mo, kaabuku buko koone let kuyab mata Jáyiiyaju jata haatiya jíji. An ayilimuu akaan loon kulimaku unku kulobumuu, li akaan.

Yéesu li ásooniyen bañiilabu batitabu

¹³ Muñeˈe bukan li kúŋalul bañiil boot bata Yéesu, mantee li aŋa’ kuŋenool awalen li buko min al̥aw. Bale kúgoomaku koola li kutalen bukanabuku káŋalulumuu bañiilabu.

¹⁴ Yéesu li aan kúgoomaku: — Jikat bañiilabu min bubil búmbaam. Jakum jíhiliil kubilum. Mata Jáyiiyaju jata Ateemit jata bukanabuku kanokoomuu li buko.

¹⁵ Fúlum tó, Yéesu li aŋa’ kuŋenool awalen li buko, ban li ajow.

Yéesu li alob buu ebaj ákoyileniwummuu

¹⁶ Li líiŋ hunak hakee, ánayine akee li ákoojul Yéesu min agel̥l̥enool aanool: — Anahaan, waa leete ikaan wajake min ibaj buloŋabu bábaneliitumuu?

¹⁷ Yéesu li aanool: — Wáa újiye li ugel̥l̥enom mata wah wajake? An ano bale ajake. Ufañumuu min unoken li buloŋabu bábaneliitumuu, ukaan loon eluwaayi yata Móyiis elobumuu.

¹⁸ Anáyinaawu li agel̥l̥en Yéesu aanool: — Eluwa yay? Yéesu li aanool: — Eluwaayi yaanumuu: «Jakum umuk an. Jakum uhinto li anaale mantee li ánayine alet ooli. Jakum úkuwet. Jakum úmal uya li an.

¹⁹ Uluuken atuubayi li jaawi. Loote ufañ afaali an loon awu humumi ufañoolomuu.»

²⁰ Anáyinaawu li aan Yéesu: — Wahawu unwu feh likankaan wo. Waa umite usaŋowom?

²¹ Yéesu li aanool: — Ufañumuu min ulako an anabe hákil Ateemit, ujow újula wahawu feh wan ubajumuu, min uŋa’ sídalamasu ugaben esukateenayi. Fan ubaj hubaj li emitayi. Banumuu, li ubil únabul lí ínje.

²² Bale nan ánayinaawu ajamumuu kulimaku unku, li áyiyenoo ábalo, mata lakankaan usaanum wáamak.

²³ Yéesu li aan kúgoomaku koola: — Li mal̥egenamu fan ilobuul, séngisengi ŋáa’ min usaanum unoken li Jáyiiyaju jata Ateemit.

²⁴ Boot min ilaañen eenuul, séngisengi min eñonkom énokenum li ésuuh yata ekikum, bale haŋ másengi ŋáa’ min usaanum unoken li Jáyiiyaju jata Ateemit.

²⁵ Nan kúgoomaku kujamumuu kulimaku unku, li kusego ŋáa’, min kugel̥l̥en Yéesu koonool: — Kama muñowu ayimaa ayilo afakeni?

²⁶ Yéesu li ajukeliil, ban li aaniil: — Li bukanabuku, an ayilaat afakenoolo, bale bajut wah waheeke Ateemit kakaan.

²⁷ Muñeˈe Fiyeel li aan Yéesu: — Fan ujanten! Alóli jíkatuukatul bo wáholi feh min jínabul li awu. Muñowu waa jóomi li jibaj to?

²⁸ Yéesu li aaniil: — Li mal̥egenamu fan ilobuul, nan Añool-An ammuu li abah li efenjeŋayi yoola yáyiineniyaayi nan wahawu feh wommuu ulaañen uwunkulo, bukuluul kuŋen li kúl̥ubaaku jánabulumuu lí ínje, fan jibah foof li sifenjeŋ min jitiib utoŋawu kuŋen li úl̥ubaawu wata Isilayeel.

²⁹ Ban an akat bomuu siluufool, mantee kutuyool, mantee kúliinool, mantee atuubawool, mantee jaawool, mantee bañoolool, mantee foof etaamool mata ínje íji, fan abil abaj wahawu unwu feh haŋ to ñoono téemeel, ban foof fan abaj buloŋ bábaneliit.

³⁰ Bale kameeŋe li kútinaalabuku fan kulako kúsola. Kameeŋe li kúsolaabuku fan kulako kútinaa.