Máciya 16 - Jola-Kasa

Kufaaliisiyeŋaku li Kusaduusiyeŋaku li kulob Yéesu mantee li áhiisiil búhiisenum báfulumulo li emitayi

¹ Kufaaliisiyeŋaku báhiise kaanaku sembaasu soola li Ateemit sibilumulo.

² Bale Yéesu li aaniil: — Banakabu bujowumuu bukotoo, li jóonul: «Kajom banakabu fan búsuum, mata babbaj banak émunduŋo.»

³ Líiŋumuu li bújom bíb, li jóonul: «Emitayi fan élaalul li búlus ló, mata el̥enl̥em.» Bukuluul min emitayi enokoomuu bale, jiyilimuu jilaso min jihaas. Bale jiyilaat jilaso min jihaas kúhaasumaku kata taŋayi.

⁴ Bukanabuku kata muñeˈe kajakutumuu ban kútuulut Ateemit, kóomi li huŋes min kujuk búhiisenum bájaahaleniye. Bale let kujuk búhiisenum bakee bájaahaleniye bábuto li wahawu wabajumuu Sonaas. Ban Yéesu li akatiil to min ajow.

Yéesu li alob mata kákaanum baliikenelabu baletumuu mal̥egen

⁵ Nan kúgoomaku kulakomuu li kulimb boot kageb kaaka húwajahu, li kumojen kuŋa’ kúmbuulu.

⁶ Yéesu li aaniil: — Jijuke to ban li jíkaanum élebiilayi.

⁷ Muñeˈe kúgoomaku li kunaak koon li uyinumiil: — Min úŋalulootaalumuu kúmbuulu, mó mújimuu li alob loon muñowu.

⁸ Emmuu Yéesu lahaase kayinoolaku kooliil, li agel̥l̥eniil aaniil: — Wáa újiye li joono li elob mata min jíŋaluloot kúmbuulu? Mó káyinenuul kukite kutiti.

⁹ Kama boot muñeˈe jínaanumolut? Jiwayil̥owut mata kúmbuuluwaku hutokayi kagabenimuu bukanabuku koono sínjunne hutokayi, li utekel woono weem jitebumuu jíjowetum wan kúmbuuluwaku kasaŋomuu kumeeŋenumuu?

¹⁰ Jiwayil̥owut foof kúmbuuluwaku hutok li kúl̥ubaaku kagabenimuu bukanabuku koono sínjunne sibakii, li utekel woono weem jitebumuu jíjowetum wan kúmbuuluwaku kasaŋomuu kumeeŋenumuu?

¹¹ Kama buu kaane jiyilaat jínaanum kaanaku ilet li elobuul mata kúmbuulu? Jíkaanum élebiilayi yata Kufaaliisiyeŋaku li Kusaduusiyeŋaku.

¹² Muñeˈe kúgoomaku li kukit kúnaanum kaanaku Yéesu alakowut elobiil mata min kúkaanum élebiilayi yaŋaleyimuu min kaan kúmbuulu, bale mata baliikenelabu bata Kufaaliisiyeŋaku li Kusaduusiyeŋaku.

Fiyeel li alob aan Yéesu ammuu Afakenaawu

¹³ Nan Yéesu áliiŋumuu li halaabahu hata Sesaale Fílib, li agel̥l̥en kúgoomaku koola aaniil: — Kama bukanabuku koone ayi ammuu Añool-An?

¹⁴ Kúgoomaku koola li koonool: — Kukee koone akila ammuu Saŋ Batiis. Kaabuku li koon akila ammuu Elí. Kukee foof li koon akila ammuu Selemi, mantee foof akee li kufulofetaku.

¹⁵ Yéesu li agel̥l̥eniil aaniil: — Yoo, bukuluul li joon ínje emmuu ayi?

¹⁶ Simoŋ Fiyeel li aanool: — Awu ommuu Kilisita, Añiilawu ata Ateemit aloŋumuu.

¹⁷ Yéesu li aanool: — Awólo Simoŋ, añiil ata Sonaas, mata inti an áhiisi wahawu unwu, bale Atuubawom ammuu haatiya.

¹⁸ Bale ínje foof boot min eeni, awu ommuu Fiyeel, húlankiinahu. Li húlankiinahu unhu léemimuu li iteef Ejanguwayi yúmbaam. Sembaasu sata eketayi let siyili li Ejanguwayi inyu wahoowah.

¹⁹ Fan iseni sikul̥umasu sata Jáyiiyaju jata Ateemit. Wahoowah wan úñeyiyene li etaamayi, fan úñeyiyeni li emitayi. Wahoowah foof wan úñeyiyenut li etaamayi, let úñeyiyeni li emitayi.

²⁰ Fúlum tó, Yéesu li anuuloo kúgoomaku koola aaniil jakum kulob an koonool akila ammuu Afakenaawu.

Yéesu li alob mata eketayi yoola li kayitowulaku koola li eketayi

²¹ Yaan no unnu, Yéesu li átoŋ alob kúgoomaku koola aaniil: — Boot min ijow boot Yeelusalem min ílaam ŋáa’ li kuŋen kata kunahaanabuku, li kata huhaanaahu hata élambaayi, li kata kaliikenemuu ésukayi Eluwaayi yata Móyiis. Ban fan kúji li kumukom. Bale li hunakahu húhaajutahu, fan iyitowul li eketayi.

²² Muñeˈe Fiyeel li aŋalool kúfu’ li kakaŋ min alobool aanool: — Ateemit ajow afooyi, Amaaŋen! Wahawu unwu jakum ubaji!

²³ Bale nan Yéesu átiiwowulumuu li aan Fiyeel: — Ulóyiyom, Sayitaane. Awu ummu li káhilom íkaanum húfañumahu hata Ateemit. Mata uyinoolut loon Ateemit ayinoomuu, bale luyinooyinoo loon bukanabuku kuyinoomuu.

Kanab li Yéesu lásengisengi

²⁴ Nan fú’ tómuu, Yéesu li aan kúgoomaku koola: — An afañumuu min ánabul lí ínje, li akat kayinoo mata buloŋool. Ateb ekuluwaayi yoola, min ánabul lí ínje.

²⁵ Mata an aŋesumuu kafaken buloŋool, buloŋabu bábaneliitumuu fan bufakool. Bale an aketumuu mata ínje íji, fan abil abaj buloŋ bábaneliit.

²⁶ Jáliŋ buu yoom to, an babaje wahawu feh wata adunaayi, ban li aŋa’ yaalayi yoola min acaam? Mantee foof, waa an ayilo aŋa’ min ahal boot mata yaalayi yoola?

²⁷ Mata Añool-An ummu li abil li máyiineniyamu mata Atuubawool li emalakaayi yoola ló. Fan acaam anoowan nab li waa lakaanumuu li buloŋabu boola.

²⁸ Li mal̥egenamu fan ilobuul, kukee li bukuluul káamimee taate, let kuket buko bajukut Añool-An li abil li Jáyiiyaju joola.