Máciya 15 - Jola-Kasa

Yéesu li ahoy múkaaniinamu manabutumuu li húnongumahu hata Ateemit

¹ Muñeˈe Kufaaliisiyeŋ li Kaliikenemuu ésukayi Eluwaayi yata Móyiis, li kúfulumul Yeelusalem kubil kutook Yéesu min kugel̥l̥enool koonool:

² — Kama wáa újiye kúgoomaku kooli li kunaak kuhuusul múkaaniinamu mata situubawolaal sihaan? Mata kúfoseliit kuŋeniil kútowum kutiñ.

³ Yéesu li aaniil: — Bukuluul wáa újiye li jinaak jihoy banab li eluwaayi yata Ateemit, min jinaak jinab li múkaaniinamu mooluul?

⁴ Ateemit laane: «Uluuken atuubayi li jaawi.» Li aan foof: «An alobumuu kulim kajakut aya li atuubawool mantee foof li jaawool, laate amuki.»

⁵ Bale bukuluul li jinaak joon bukanabuku kulob situubayiil li sijaawiil kooniil: «Wahawu wan eeteenumuu iŋa’ min ilambenuul, wo liŋalumuu isen Ateemit.»

⁶ Min lako anawu ummu muñeˈe asohulawut min aluuken sibukoolawool. Muñowu jíkajenummuu hulimahu hata Ateemit, min jijok jak múkaaniinamu mooluul.

⁷ Min jíhoolo muñowu! Esay ammuu afulofet lakonkooŋ li bukuluul, nan aanumuu:

⁸ «Esúkayi inyu li utumiil bale kuluukenumom. Bale uyinumiil ulet lí ínje maayeet tuf.

⁹ Kamanenaku kan kumanenewommuu hin kakaal̥o, mata siluwaasu san kukittenemuu bukanabuku, loon eenimuu sata Ateemit, siluwa sata bukan.»

Wahawu wakaanemuu an ásetaati hákil Ateemit

¹⁰ Fúlum tó, Yéesu li ahooñul ésukayi min aaniil: — Jijantenom jak ban li jínaanum.

¹¹ Inti wah wan an atiñe, wo woote úji li eeni lasikosiko hákil Ateemit, bale wahawu wáfulumulemuu li butumool.

¹² Muñeˈe kúgoomaku kata Yéesu li kúkoojulool min koonool: — Luhaasumuu oon kulimaku kan Kufaaliisiyeŋaku kujamimuu li ulob kúsengiyiisengi?

¹³ Yéesu li aaniil: — Anuunuken anoowan an Atuubawom ammuu haatiya al̥ukut, fan aluuci.

¹⁴ Jikatiil bo. Laalu bukan káfuume kayabe hákil bukan káfuume boot min kúhiisiil bútinabu! Ban an áfuume ajowumuu ayab hákil afaalool áfuumandiin boot min áhiisool bútinabu, buko kúl̥uba feh fan kulo li buwokaay.

¹⁵ Muñeˈe Fiyeel li aan Yéesu: — Ukíttenoli bukittenoolumabu umbu waa bulobe.

¹⁶ Yéesu li aaniil: — Kama bukuluul foof jiyiliwolut jínaanum?

¹⁷ Jihaasut joon wah wanokene li butum, fan ujow boot li halahu, ban li ujowi li siŋam?

¹⁸ Bale wah wáfulumulo li butum li buyinumabu ubilume, ban wahawu unwu ukaanemuu an min eeni lasikosiko hákil Ateemit.

¹⁹ Mata li buyinumabu uyinoolawu wajakutaawu úfulumulemuu: jamuk bukan, kahinten anaale alet ooli, húfulo an an jiyabowut, ékuwet, émalimiñ, li kúloboo.

²⁰ Wahawu unwu ukaanemuu an min eeni lasikosiko hákil Ateemit, bale inti hutiñ bafosut kuŋen.

Yéesu li afaken jísungute jata anaale alet Asuwif

²¹ Fúlum tó, Yéesu li ajow boot halaabahu hata sísukasu sata Tiil li Sidoŋ.

²² Muñeˈe li baj anaale áfulumulo halaabahu unhu hata Kanaan abil boot bata Yéesu, áliiŋul li al̥okoolool butiya aanool: — Amaaŋen, ubonket úyiyenom, Añiil ata Dayit! Asúngutaawu úmbaam buyinum bajakut bújufowool, li buyokenool ŋáa’!

²³ Bale Yéesu abagut. Kúgoomaku koola li kúkoojulool min koonool: — Oonool alaañ, mata ummu min akaawemuu butiya ánabul li ololaal.

²⁴ Yéesu li aan: — Líboñuliboñul boot li bukanabuku bale kata Isilayeel kanokoomuu li kúgalalaan kájime.

²⁵ Bale anaalaawu li abil ákuntuŋ hákil Yéesu min aanool: — Amaaŋen, ubonket ulambenom!

²⁶ Yéesu li aanool: — Colut min an aŋa’ hutiñahu hata bañiilabu utahen bajangiyabu batitabu.

²⁷ Anaalaawu li aanool: — Amaaŋen, lukooŋe. Bale maayeet bajangiyabu batitabu butiñetiñ bafoyabu bálowumulemuu li uyinjaayawu wata kata so.

²⁸ Muñeˈe Yéesu li aan anaalaawu: — Anaale, mo káyineni kukite kuluuk! Jow kaani loon ufañumuu. Asúngutaawu ata anaalaawu li ayaan afak.

Yéesu li afaken kúsomuta kameeŋe

²⁹ Yéesu li áfulum tó min ajow boot bata katantaku kata húwajahu hata Gálile. Alíiŋ, li ajow aŋito li huyuuy ajow abah ló.

³⁰ Muñeˈe búsuk báamak li búkoojulool. Li kúŋaloolul utankiñ, li bukan kakaje, li bukan káfuume, li kukumb, li kúsomuta kukee kameeŋe. Nan kúliiŋulumuu li kuwaleniil li kootaku kata Yéesu min afakeniil.

³¹ Muñeˈe búsukabu li busego ŋáa’ nan kujukumuu kukumbaku li kúlobul, utankiñawu li ufak, kakajumuu li kujow jak, káfuumumuu li kujuk. Li kúbinken Ateemitawu ata Isilayeel.

Yéesu li ákuumen bukan koono sínjunne sibakii

³² Muñeˈe Yéesu li áhooñul kúgoomaku koola min aaniil: — Líyiyenyiyen bukanabuku umbuku. Mata muñeˈe baje kunak kúhaaji buko taate lí ínje, ban kubajut muñeˈe wah wan kóomi li kutiñ. Ifañut min ilaañeniil kúbalo macaalete, jakum bil kulo li bútinabu.

³³ Kúgoomaku koola li kugel̥l̥enool koonool: — Bay luyilowaale úŋalumulaal kúmbuulu kafame kayilo kúkuumen búsuk báamak loon umbu, baabe ban wayito muñeˈe?

³⁴ Yéesu li agel̥l̥eniil aaniil: — Kúmbuulu keem jooke? Li koonool: — Kúmbuulu hutok li kúl̥uba jooke, li muwol mafamut.

³⁵ Muñeˈe li aan búsukabu bubah teetaam.

³⁶ Nan búsukabu bubahumuu, Yéesu li aŋa’ kúmbuuluwaku hutok li kúl̥ubaaku li muwolamu, min asal Ateemit aban, li amuncul asen kúgoomaku. Kúgoomaku li kuŋa’ kumunculaku kugaben búsukabu.

³⁷ Buko foofiil feh li kutokoñ kujow kufooñ. Kúgoomaku li kúwomenul kumunculaku kasaŋomuu kukaan li utekel kujow kumeeŋen woono hutok li úl̥uba kuteb kújowetum.

³⁸ Katokoñumuu kúmbuuluwaku li muwolamu koono sínjunne sibakii, ban kanaalaabuku li bañiilabu kucobuti ló.

³⁹ Muñeˈe nan Yéesu alaañenumuu búsukabu búbalo aban, li ájufo li busaanaabu min ajow boot halaabahu hata Magadan.