Máciya 14 - Jola-Kasa

Eketayi yata Saŋ Batiis

¹ No unnu, Elod alako nomuu águubelunaalawu ata Gálile, li ajam li kulob mata Yéesu.

² Muñeˈe li aan kulokaabuku koola: — Laalu Saŋ Batiis. Layitowuuyitowul li kaketumuu. Wahawu unwu újimuu li abaj sembe sata kakaan wah wájaahaleniye.

³ Elod lajoojok no Saŋ ajenk ban li aŋalool akul̥, mata Elodiyaas áji, an Elod aŋa’muu akaan aseekool, ban anaale ata atuyool Fílib.

⁴ Elod lakankaan mo, mata Saŋ laanoosaan: — Loon Eluwaayi yata Móyiis elobumuu, colut min uŋa’ Elodiyaas ukaan aseeki.

⁵ Elod li afañeen min amuk Saŋ, bale li ákoli ésukayi, mata bukanabuku kujoojok Saŋ loon afulofet.

⁶ Bale nan hunakahu hawayil̥enumuu kabukiyaku kata Elod húliiŋumuu, ásungutaawu ata Elodiyaas li agom hákil ésukayi yan Elod áhooñulumuu, li súum Elod ŋáa’.

⁷ Elod li anuu aan fan asen ásungutaawu wahoowah wan ammuu al̥awool.

⁸ Elodiyaas li atiken ásungutaawu oola min aan Elod: — Usénulom taate li buyinjaay húkowahu hata Saŋ Batiis!

⁹ Nan ásungutaawu alobumuu áyiiyawu Elod loon muñaˈa, li jokool ŋáa’. Bale hunuulahu han anuulumuu hákil bukanabuku kan áhooñulumuu, li hújiwool li alob min kusen ásungutaawu húkowahu hata Saŋ Batiis.

¹⁰ Mal̥egen li aboñ kujow kúfalenul húkowahu hata Saŋ Batiis li hukul̥ahu.

¹¹ Li kúŋalul húkowahu hata Saŋ Batiis li buyinjaay kujow kusen ásungutaawu, min aŋa’ ho ajow asen jaawool.

¹² Kúgoomaku kata Saŋ li kubil kuŋa’ ehuluŋayi yoola kujow kuhok, ban li kujow kulob Yéesu wahawu wabajumuu feh.

Yéesu li ákuumen bukan koono sínjunne hutok

¹³ Nan Yéesu ajamumuu wahawu wabajumuu Saŋ Batiis, li aŋa’ busaana min ayinno tan alakomuu ajow balewool boot ban wayitowe. Bale nan búsukabu bujamumuu, li búfulumul li sísukasu, bujow koot bunabenool.

¹⁴ Nan Yéesu áwalowulumuu li busaanaabu, li ajuk búsuk báamak, li áyiyen min afaken kásomutumuu li buko.

¹⁵ Li líiŋ kátiimaku, kúgoomaku kata Yéesu li kúlohulool min koonool: — Baabe wayitowayito ban banakabu bujone. Ulob búsukabu min bujow boot li sísukasu mantee li kunoom bo wah kutiñ.

¹⁶ Bale Yéesu li aaniil: — Jakum kuyok li ejow. Jiseniil bukuluul humumuul kutiñ.

¹⁷ Li koonool: — Kúmbuulu hutok bale jooke taate, li muwol múl̥uba.

¹⁸ Yéesu li aaniil: — Jíŋalulom kúmbuuluwaku li muwolamu taate.

¹⁹ Muñeˈe nan kúŋalulumuu Yéesu kúmbuuluwaku li muwolamu, li aan búsukabu bubah li mahosamu. Nan bubahumuu, li aŋa’ kúmbuuluwaku hutokayi li muwolamu múl̥ubaamu, ban li ateb kúkilool ajooŋoo haatiya emitayi, min asal Ateemit. Fúlum tó, li amuncul kúmbuuluwaku asen kúgoomaku koola min kugaben ko búsukabu.

²⁰ Bukanabuku feh li kutokoñ kujow kufooñ, min kúgoomaku kuwomen kumunculaku kasaŋomuu, kujow kuyok kumeeŋen utekel woono kuŋen li úl̥uba kuteb kújowetum.

²¹ Ban kánayinaaku katokoñumuu kúmbuuluwaku li siwolasu kuyilo kúliiŋ sínjunne hutok. Ban kaalaabuku li bañiilabu kucobuti ló.

Yéesu li akak li malamu min ajow

²² Nan yaane fúlum tómuu, Yéesu li atuuŋ kúgoomaku koola kújufo li busaana, min kujow ló boot kageb kaaka húwajahu, min akila alob búsukabu min buyiisoo.

²³ Nan Yéesu alobumuu búsukabu min buyiisoo aban, li aŋito li huyuuy ajow al̥aw ló balewool. Banakabu li bujon, akila buloŋe ló liwoonool.

²⁴ Bale emmuu busaanaabu bo báloyiye katantaku, kulambajaku li kunaak kufamb bo, mata bulallaaj élusayi.

²⁵ Muñeˈe nan banakabu bulakomuu kákatenul, Yéesu li ájowum koot li malamu ajooŋoo ban kúgoomaku koola kulakomuu.

²⁶ Nan kúgoomaku kujukumuu Yéesu li abil koot li malamu, li kúkoli ŋáa’ min koon: — Afúlafu’! Li kúluulen, mata kúkolikoli.

²⁷ Bale Yéesu li ayaan aaniil: — Sákoluul, jítik, laalu ínje.

²⁸ Muñeˈe Fiyeel li aanool: — Amaaŋen, nokoomuu loon mal̥egen awu, kama ulobom min ibilum li malamu li koot boot buya.

²⁹ Yéesu li aanool: — Ubil. Mal̥egen Fiyeel li áwalowumul li busaanaabu min ájowum koot li malamu ajooŋoo ban Yéesu alakomuu.

³⁰ Bale nan Fiyeel ajukumuu kaanaku búlusabu bululluuk, li ákoli. Nan ákolimuu, li átoŋ ayooko li malamu. Li akaaw butiya aan Yéesu: — Amaaŋen, ufakenom!

³¹ Yéesu li ayaan atooken ájokulool, ban li aanool: — Mo káyineni kukite kutiti! Wáa újiye li úwettoo?

³² Muñeˈe nan kújufomuu buko kúl̥uba li busaanaabu, búlusabu li buyaan buweelen.

³³ Bukanabuku kalakomuu li busaanaabu li kúkuntuŋ hákil Yéesu min kumanenool koon: — Li mal̥egenamu awu ommuu Añiilawu ata Ateemit!

Yéesu li afaken kásomutumuu li etaamayi yata Genesalet

³⁴ Nan Yéesu li kúgoomaku koola kulimbumuu húwajahu, li kúliiŋ li etaamayi yata Genesalet.

³⁵ Muñeˈe nan bukanabuku kakin bomuu kuhaasumuu Yéesu, li kuheben bukanabuku feh kakinumuu li sísukasu sata halaabahu unhu jow kujam. Li kúŋalul Yéesu bukanabuku kásomutumuu feh.

³⁶ Li kuyaakoo Yéesu mantee li akat kásomutumuu min kugo’ kabeyaku bale kata kañaku koola. Mal̥egen kago’ komuu feh li kufak.