Máciya 13 - Jola-Kasa

Bukittenoolum bata an áami li ebet sígul

¹ Li hunakahu unhu hanolahu, Yéesu li áfulul li eluufayi ajow abah bata katantaku kata húwajahu.

² Muñeˈe búsuk li bubil búguutool, gay li ájufo li busaana ajow abah ló. Búsukabu feh li bulako bata katantaku kata húwajahu.

³ Yéesu li aŋa’ bukittenoolum min alobiil wah fiyo, aaniil: — Bile baj awaña áfule ajow ebet sígul.

⁴ Nan alakomuu ebetayi, búgin bakee bata sígulasu li bulo li bútinabu. Basuuwabu li bubil butiñ so.

⁵ Búgin baabu li bulo li etaam yata bagisa, tan tiŋowe. Sígulasu li siyaan sil̥iilul, mata mul̥uyisamu mata etaamayi mumeeŋut to.

⁶ Bale nan banakabu bulumulumuu, sígulasu li sísulo min sisay, mata siyawut kuhaa’ káloyiye.

⁷ Búgin bakee li bulo li banuunuken bata úbuja. Nan banuunukenabu bata úbujaawu bul̥iilulumuu, li búgoben sígulasu sal̥iilumuu.

⁸ Búgin baabu bata sígulasu li bulo li etaam yakonete. Li sibuk ŋáa’, min kabas kano kubaj ukake’ woono éteemeel, kakee li kubaj woono kúyii kúhaaji, kufaal ko li kubaj woono áyii li kuŋen.

⁹ An áakimuu sijan, li ajanten jak min ajam!

Wahawu wájimuu Yéesu li aŋa’ bukittenoolum min alob

¹⁰ Muñeˈe kúgoomaku kata Yéesu li kúlohulool min kugel̥l̥enool koonool: — Wáa újiye li unaak uŋa’ bukittenoolum min ulob li buko?

¹¹ Yéesu li aaniil: — Mata bukuluul, Ateemit lakaanuukaan min jihaas wahawu wahaasutimuu wata Jáyiiyaju jata haatiya. Bale umbuku áhiisutiil wo.

¹² Mata an abajumuu, Ateemit fan afamenool. Bale an abajutumuu wahoowah, maayeet jatitaju jan abajumuu, Ateemit fan ayab jo.

¹³ Wahawu unwu újimuu li inaak iŋa’ bukittenoolum min ilob li buko. Mata kujukelejuke ban let kujuk. Li kujanten ban let kujam, let foof kúnaanum.

¹⁴ Muñeˈe hulimahu han afulofetawu Esay alobumuu, húbajummuu li buko, haanumuu: «Fan jijanten ban li jijam jak, bale let jínaanum maayeet tuf. Fan jijuke ban li jijuk jak, bale let jikooñaam maayeet tuf.

¹⁵ Mata bukanabuku umbuku kuhokenhoken uyinumiil min kuhoy bajam. Kutottoj sijaniil, kúmimmib kúkiliil, jakum bil kúkiliil kujuk, jakum bil sijaniil sijam, jakum bil kúnaanum li uyinumiil. Jakum bil eeni kukomenkomen kúlaañul boot búmbaam min ifakeniil.

¹⁶ «Bale áwolowuul, mata jijuujuk li kúkiluul, ban li jijam li sijanuul.

¹⁷ Li mal̥egenamu fan ilobuul, bukan kameeŋe kan Ateemit álobume li buko li bukan kameeŋe kátuule Ateemit, kufañeene min kujuk wahawu wan jijukemuu li wo, bale kujukut wo. Li kufañeen min kujam wahawu wan jijamemuu li wo, bale kujamut wo.

Yéesu li akitten bukittenoolumabu bata abetaawu ata sígulasu

¹⁸ — Muñeˈe kama bukuluul jijanten min jínaanum waa bukittenoolumabu bata abetaawu ata sígulasu bulobe.

¹⁹ An ajantenumuu Hulimahu Hásuumaahu hata Jáyiiyaju jata Ateemit ban ánaanumut ho, Sayitaane fan abil áfulen li buyinumabu bata anawu Hulimahu han ajamumuu. Anawu ummu, akila ammuu kagendenaku kata bútinabu tan sígulasu silomuu.

²⁰ Etaamayi yata bagisaabu dán sígulasu silomuu, yo yommuu anawu ayaane ajamumuu Hulimahu Hásuumaahu hata Jáyiiyaju jata Ateemit, li ayab ho li ésuumansuum ló.

²¹ Bale emmuu Hulimahu hubajut kuhaa’ li anawu ummu, nan sílaamasu síŋejulumuu, jálaatenaju foof li jíliiŋul mata Hulimahu húji, li ayaan akat bo káyinenaku koola.

²² Etaamayi yata banuunukenabu bata úbujaawu dán sígulasu silomuu, yo yommuu anawu ajamumuu Hulimahu hata Ateemit aban, uyinoolawu wata buloŋabu bata muñeˈe, li jabuntaju jata kásuumaku kata ebajayi, li kúgoben Hulimahu, min jí anawu li áloŋaati loon Hulimahu hulobumuu.

²³ Etaamayi yakonetumuu dán sígulasu silomuu, yo yommuu anawu ajamumuu Hulimahu hata Ateemit, ban li ánaanum ho. Anawu ummu li abaj buloŋ bajake banokoole li kamaano kan kabas kano kubaje ukake’ woono éteemeel, kakee li kubaj woono kúyii kúhaaji, kufaal ko li kubaj woono áyii li kuŋen.

Yéesu li aŋa’ emaanobasuu akaan bukittenoolum

²⁴ Yéesu li alaañen alobiil bukittenoolum bakee aaniil: — Jáyiiyaju jata Ateemit jinokoonokoo li an abete sígul sajake, li kal̥aakaku koola.

²⁵ Bale nan ésukayi elakomuu kámooliyaku, alatoolaawu oola li ajow aŋa’ emaanobasuu ahin abet li kal̥aakaku ágiiw li edenfeteŋayi, ban li ajow.

²⁶ Nan sígulasu sata edenfeteŋayi sil̥iilulumuu, ejow éfulen, emaanobasuuwayi li ehin el̥iilul.

²⁷ Muñeˈe kulokaabuku kata ata eluufayi li kubil kugel̥l̥enool koonool: «Anahaan, kama inti sígul sajake lubete li kal̥aakaku kooli? Kama emaanobasuuwayi yammuu li kal̥aakaku bay éfulumulo?»

²⁸ Li aaniil: «An alatom akaane loon muñaˈa.» Kulokaabuku li koonool: «Lufañe min jijow jiluuc emaanobasuuwayi?»

²⁹ Ata eluufayi li aaniil: «A’aa’, mata jibanumuu li jilako kaluucaku kata emaanobasuuwayi, nakee li jiluucoo edenfeteŋayi.

³⁰ Jikat edenfeteŋayi li emaanobasuuwayi min yankoo li mano, boot nan ecacayi yommuu éliiŋ. Nan ecacayi yommuu éliiŋ, fan ilob kucacaaku eeniil: “Jijand jiluuc emaanobasuuwayi ban li jikaan yo kukoken boot kásu’. Jibanumuu li jikit jicac edenfeteŋayi jijow jitah li bulaŋenabu búmbaam.”»

Yéesu li aŋa’ ekool yata bunuunuken ban koone mutaad, akaan bukittenoolum

³¹ Yéesu li alaañen aseniil bukittenoolum bakee. Li aaniil: — Jáyiiyaju jata Ateemit jinokoonokoo li ekool yata anuunuken an koone mutaad, yan an ajowe al̥uk li bul̥ibabu boola.

³² Ekoolayi yata anuunukenawu ummu ehaŋumuu matiti bakoolabu feh. Bale ejowumuu el̥iilul, li ehaŋ banuunukenabu feh. Li ebil ekaan bunuunuken min naak basuuwabu bubil buseeh li waanawu wata bo.

Yéesu li aŋa’ élebiil akaan bukittenoolum

³³ Yéesu li alaañen alobiil bukittenoolum bakee aaniil: — Jáyiiyaju jata Ateemit jinokoonokoo li élebiil yan anaale aŋale ágiiwoo li kukiib kúhaaji kata efo’ min asiiw, boot yok nan basiiwelabu búkaakumuu foof bo feh.

Yéesu li aŋa’ bukittenoolum min alob bukanabuku wah wayolowe

³⁴ Yéesu li aŋa’ bukittenoolum min alob wahawu unwu feh búsukabu. Bajut wah wan alobe búsukabu, akila baŋalut bukittenoolum min alob wo,

³⁵ bájum wahawu wan afulofetawu alobumuu, li ubaj. Lansaan: «Fan ílobum li buko li ukittenoolum. Fan ilobiil wahawu wan Ateemit ayolumuu nan adunaayi étuutimuu.»

Yéesu li akitten bukittenoolumabu bata emaanobasuuwayi

³⁶ Fúlum tó, Yéesu li akat to búsukabu min ajow anoken li eluufayi dán alakomuu. Muñeˈe kúgoomaku koola li kúkoojulool min koonool: — Uhéboli bukittenoolumabu bata emaanobasuuwayi yalakomuu li kal̥aakaku, waa bufañe bulob.

³⁷ Yéesu li aaniil: — Anawu abetumuu sígulasu sajakaasu, akila ammuu Añool-An.

³⁸ Kal̥aakaku ko kommuu adunaayi. Sígulasu sajakaasu so sommuu bañiilabu bata Jáyiiyaju. Emaanobasuuwayi yo yommuu bañiilabu bata Sayitaane.

³⁹ Alatoolaawu abetumuu emaanobasuuwayi, akila ammuu Sayitaane. Ecacayi, yo yommuu nan buloŋabu umbe bommuu li buban. Kucacaaku, buko kommuu kumalakaabuku.

⁴⁰ Mó mújimuu, loon emaanobasuuwayi eluucimuu ban li ebeteni li sambun, mo foof emmuu bil nokoo nan buloŋabu umbe bommuu li buban.

⁴¹ Añool-An fan abil áboñul kumalakaabuku koola, min kúfulen li Jáyiiyaju bukanabuku feh kájiyemuu ésukayi li elo li kahoofoo, li bukanabuku feh kakaanemuu majakut.

⁴² Kumalakaabuku fan kubeteniil li sambun sáamak, dán emmuu baj jíl̥ok li sílaam sáamak.

⁴³ No unnu bukanabuku kátuulumuu Ateemit, fan kuleñ loon banakabu li Jáyiiyaju jata Atuubayiil. An áakimaa sijan, li ajanten jak min ajam.

Yéesu li aŋa’ ebaj yayoli akaan bukittenoolum

⁴⁴ — Jáyiiyaju jata Ateemit jinokoonokoo loon ebaj yayoli li kal̥aak, yan an ajuke li alaañen yo ayo’. Muñeˈe buyinumool li búsuum, li ajow anoomen wahawu wan abajumuu feh aban, li anoom kal̥aakaku kata ebajayi.

Yéesu li aŋa’ esis yata bunoom baluuke ŋáa’ akaan bukittenoolum

⁴⁵ — Jáyiiyaju jata Ateemit jinokoonokoo foof loon ájulaˈa aano li huŋes usis wajake.

⁴⁶ Nan ajukumuu esis yano yata bunoom baluuke ŋáa’, li ajow anoomen wahawu wan abajumuu feh aban, li anoom yo.

Yéesu li aŋa’ embaal akaan bukittenoolum

⁴⁷ — Jáyiiyaju jata Ateemit jinokoonokoo foof loon embaal yan kumbaala kubetene li husamu, min éjokul jíwoloojiwol.

⁴⁸ Nan embaalayi emeeŋumuu, kumbaalaaku li kúñakul yo boot bata katantaku, ban li kubah min kul̥us siwolasu sajakumuu kukaan li utekel, min kubeten sajakutumuu.

⁴⁹ Muñaˈa foof emmuu bil nokoo nan buloŋabu umbe bommuu li buban. Emalakaayi fan ebil égitul bukanabuku kajakutumuu li bukanabuku kátuulumuu Hulimahu hata Ateemit.

⁵⁰ Banumuu emalakaayi fan ebeten bukanabuku kajakutumuu li sambun sáamak, dán emmuu baj jíl̥ok li sílaam sáamak.

⁵¹ Yéesu li agel̥l̥en kúgoomaku koola aaniil: — Jínaanume ukittenoolumawu unwu feh? Li koonool: — Eéhe’, jínaanume.

⁵² Muñeˈe Yéesu li aaniil: — Mó mújimuu, anoowan aliikene bukanabuku eluwaayi yata Móyiis, abile alako ágoom ata Jáyiiyaju jata Ateemit, lanokoonokoo li anahaan ata eluuf, áfulenulo li ebajayi yoola, wah wawunkul li foof wah wahaan.

Bukanabuku kata Nasalet kúyinenut li Yéesu

⁵³ Nan Yéesu abanumuu elobayi li ukittenoolumawu unwu, li ajow awuj.

⁵⁴ Muñeˈe li ajow boot li ésukayi yoola áliiŋ, li anaak aliiken bukanabuku li siluufasu sata kal̥awaku. Baliikenelabu boola li búji bukanabuku feh kanaake kujantenoolumuu li kusego. Li kunaak kugel̥l̥enoo koon: — Kama bay ánayinaawu ummu aliikenumulo bújallowabu umbu? Buu kaane li ayili akaan wahawu unwu wájaahaleni muñowu?

⁵⁵ Kama kele inti akila ammuu añiilawu ata adaajaawu ata siluufasu? Inti Mali ammuu jaawool. Ban kama inti Saak, Suseef, Simoŋ, li Súd kommuu kutuyool?

⁵⁶ Inti kúliinool feh kumbuku taate li ololaal? Kama bay láŋalumulo bújallowabu umbu li sembaasu unsu feh?

⁵⁷ Wahawu unwu li úhiliil kúyinenum li Yéesu. Muñeˈe Yéesu li aaniil: — Afulofet áluukeneliiti li etaamayi ban abukimuu, li butoŋool.

⁵⁸ Muñeˈe Yéesu akaanut to wah wájaahaleniye wameeŋe, mata ésukayi éyinenut li akila.